ប្រតិបត្តិការស្វែងរកមនុស្សចំនួន ១២នាក់ដែលបាត់ខ្លួនបន្ទាប់ពីគ្រោះរអិលបាក់ដីវា.យប្រហារកន្លែងបោះជំរុំក្នុងប្រទេសម៉ាឡេស៊ី បានឈានចូលដល់ថ្ងៃទី ២ ប៉ុន្តែភ្លៀងធ្លាក់កាលពីយប់ថ្ងៃសុក្រម្សិលមិញនេះបង្កឱ្យមានភាពស្មុគស្មាញដល់ប្រតិបត្តិការ។
មនុស្សយ៉ាងតិច ២១នាក់ រួមទាំងកុមារ ៥នាក់ផងបានស្លា.ប់ បន្ទាប់ពីមានការរអិលបាក់ដីនៅតំបន់ភ្នំ Batang Kali កាលពីព្រឹកថ្ងៃសុក្រ ទី ១៦ ធ្នូម្សិលមិញនេះ។
មនុស្សចំនួន ៩៤នាក់រងការវា.យប្រហារពីការរអិលបាក់ដី ប៉ុន្តែមនុស្សចំនួន ៦១នាក់មានសុវត្ថិភាព ខណៈ ១២នាក់ទៀតនៅបន្តបាត់ខ្លួន។ នេះបើយោងតាមនាយកដ្ឋានពន្លត់អគ្គិភ័យ និងជួយសង្គ្រោះ។
ប្រធាននាយកដ្ឋានពន្លត់អគ្គីភ័យ និងសង្គ្រោះរដ្ឋ Selangor លោក Norazam Khamis បាននិយាយថា ប្រតិបត្តិការស្វែងរក និងជួយសង្គ្រោះត្រូវបានផ្អាកនៅពេលយប់ដោយសារភ្លៀងធ្លាក់ខ្លាំង និងបានបន្តនៅម៉ោងប្រហែល ៨កន្លះព្រឹកថ្ងៃសៅរ៍នេះ ដោយមានជំនួយពីខាងគ្រឿងចក្រកាយ និងសុនកហិតក្លិន។
ការស៊ើបអង្កេតបឋមបានបង្ហាញថា ទំនប់ទឹកប្រហែល ៤៥.០០០ម៉ែត្រគួបបានបាក់។ ដីបានរអិលបាក់មកពីកម្ពស់ប្រហែល ៣០ម៉ែត្រ និងបានគ្រប់ដណ្តប់លើផ្ទៃដីប្រហែល ០,៤ហិកតា។
នាយករដ្ឋមន្ត្រីម៉ាឡេស៊ីលោក Anwar Ibrahim ប្រាប់អ្នកសារព័ត៌មាននៅថ្ងៃសុក្រម្សិលមិញថា រដ្ឋាភិបាលនឹងផ្តល់ប្រាក់ជំនួយចំនួន ២.២៦០ដុល្លារទៅដល់គ្រួសារម្នាក់ដែលមានសមាជិកស្លា.ប់ក្នុងសោកនាដកម្មនេះ ខណៈអ្នកនៅរស់រានមានជីវិតទទួលបាន ១.០០០រីងហ្គីត (២២៦ដុល្លារ)។
សូមបញ្ជាក់ថា ការរអិលបាក់ដីកើតមានឡើងជាញឹកញាប់នៅក្នុងប្រទេសម៉ាឡេស៊ី ប៉ុន្តែជាធម្មតាវាកើតមានឡើងបន្ទាប់ពីមានភ្លៀងធ្លាក់ខ្លាំងប៉ុណ្ណោះ៕ (យោងតាមប្រភព៖ Bangkok Post)
ចែករំលែកព័តមាននេះ