រាជធានីភ្នំពេញ ៖ បុរសម្នាក់ជិះម៉ូតូឆ្លងផ្លូវមិនទាន់ផុតផងត្រូវរថយន្តប្រមូលសំរាមរបស់ក្រុមហ៊ុនស៊ីនទ្រី បុកត្រង់ចំណុចផ្លូវកែងបណ្តាលឲ្យរងរបួសធ្ងន់បាក់ជើងខាងឆ្វេង និងខូចខាតម៉ូតូ ហេតុការណ៌នេះបានកើតឡើងកាលពីវេលាម៉ោង០៩និង៤៥នាទីយប់ ថ្ងៃទី១៣ ខែមិថុនា ឆ្នាំ២០១៧ ស្ថិតតាមបណ្តោយផ្លូវ១៨២ កែងផ្លូវ២៦១ សង្កាត់ទឹកល្អក់ទី២ ខណ្ឌទួលគោក ។
ម៉ូតូរងគ្រោះម៉ាក ស្មាសវី ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ ភ្នំពេញ ១AU-៣២៨១ បើកបរដោយបុរសម្នាក់មិនស្គាល់ឈ្មោះ ។ ចំណែករថយន្តបង្កម៉ាក FUSO ពណ៌លឿង អត់ស្លាកលេខ ជាប្រភេទរថយន្តដឹកសំរាមរបស់ក្រុមហ៊ុន ស៊ីនទ្រី លេខរៀង៣២០ បើកបរដោយបុរសម្នាក់ និងកម្មករលើកសំរាមពីរទៅ៣នាក់ ។ តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញម៉ូតូរងគ្រោះបើកបរតាមបណ្តោយផ្លូវ១៨២ ក្នុងទិសដៅពីលិចទៅកើត លុះមកដល់ត្រង់ចំណុចកើតហេតុបម្រុងបត់ឆ្វេងឡើងទៅផ្លូវ២៦១ ខណៈពេលដែលកំពុងតែបត់ឆ្លងមិនទាន់ផុតផង ស្រាប់តែមានរថយន្តបង្កបើកតាមបណ្តោយផ្លូវ១៨២ ក្នុងទិសដៅពីកើតទៅលិចដោយខ្វះការប្រុងប្រយ័ត្នក៏ជ្រុលទៅបុក នឹងម៉ូតូរងគ្រោះចំពាក់កណ្តាលពេញទំហឹង បណ្តាលឲ្យម៉ូតូ និងអ្នកបើកបរអូសពីក្រោមរថយន្តប្រមាណជាង១០ម៉ែត្រ បណ្តាលឲ្យម៉ូតូរងការខូចខាតបាក់កាបាំងខាងស្តាំ និងវៀចខ្នងកង់ខាងមុខ ឬឯអ្នកបើកបររងរបួសធ្ងន់បាក់ជើងខាងឆ្វេង ។ ភ្លាមៗនោះអ្នកបើកបររថយន្ត និងកម្មករលើកសំរាមបានបើកទ្វារចុះរួចរត់គេចខ្លួនបាត់ស្រមោល ។
ក្រោយពេលកើតហេតុប្រជាពលរដ្ឋដែលធ្វើដំណើរឆ្លងកាត់ចំណុចកើតហេតុបានជួយទូរស័ព្ទហៅរថយន្តសង្គ្រោះបន្ទាន់របស់គ្លីនិក ហុងហាក់ ដឹកយកជនរងគ្រោះទៅព្យាបាល ។ ចំណែកម៉ូតូ និងរថយន្តត្រូវបានសមត្ថកិច្ចជំនាញចរាចរណ៌ខណ្ឌទួលគោក ចុះទៅធ្វើការវាស់វែង នឹងអូសយករថយន្ត និងម៉ូតូទៅរក្សារទុកនៅអធិការដ្ឋាននគរបាលខណ្ឌទួលគោក ដើម្បីរងចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ