រាជធានីភ្នំពេញ ៖ បុរសម្នាក់ដោយសារទាស់សម្តីគ្នាក្នុងវង់ផឹកស៊ី បានត្រូវជនម្នាក់ដែលធ្វើការជាមួយគ្នាយកកាំបិតកាប់បណ្ដាលឲ្យរងរបួសហូរឈាមជោកខ្លួន កាលពីវេលាម៉ោង៧និង៣០នាទីយប់ថ្ងៃទី១២ ខែមិថុនា នៅទល់មុខឃ្លាំងស៊ីម៉ង់ត៍នាគខៀវ ផ្លូវបេតុង ភូមិដំណាក់ធំ៣ សង្កាត់ស្ទឹងមានជ័យ ខណ្ឌមានជ័យ ។
ជនរងគ្រោះឈ្មោះ សៀប កុសល អាយុ៣៨ឆ្នាំ ជាកម្មករលីស៊ីម៉ង់ត៍ ស្នាក់នៅឃ្លាំងស៊ីម៉ង់ត៍ក្នុងភូមិទ្រា៤ សង្កាត់ស្ទឹងមានជ័យ ឯជនដៃដល់ឈ្មោះ ផន ភេទប្រុស ជាកម្មករធ្វើការក្នុងឃ្លាំងជាមួយគ្នា ។ ជនរងគ្រោះនិយាយថា មុនពេលកើតហេតុ រូបគាត់បានផឹកស៊ីជាមួយមិត្តភក្ដិមានគ្នា៤ទៅ៥នាក់ ។ លុះផឹកអស់ស្រាបៀរ១កំប៉ុង ស្រាប់តែមានរថយន្តមួយគ្រឿងបើកចូលទៅក្នុងឃ្លាំង ហើយគាត់ក៏បានទៅជួយធ្វើសញ្ញាឲ្យរថយន្ត ថយ ។ ខណៈរូបគាត់កំពុងលើកដៃធ្វើសញ្ញា ស្រាប់តែឈ្មោះ ផន ដែលជាកម្មករធ្វើការក្នុងឃ្លាំងនោះ មិនដឹងថាចេញពីណាមកទេ បានយកកាប់បិតមកកាប់រូបគាត់ជាច្រើនកាំបិត បណ្តាលឲ្យរយះកំភួនជើងឆ្វេង និងរយះខ្នងចំហៀងខាងឆ្វេងហូរឈាមជោកពេញខ្លួន ។
ភ្លាមៗ គាត់បានរត់ទៅឲ្យគេជួយនៅម្ដុំផ្សារ សែនមេត្រីជិតបុរីជ័យជំនះ ហើយអ្នកភូមិក៏រាយការណ៍ប្រាប់សមត្ថកិច្ច និងទាក់ទងហៅរថយន្តសង្គ្រោះឲ្យមកដឹកគាត់យកទៅគ្លីនិកឯកជនសួគា៌ ។ ដោយឡែកជនដៃដល់ បន្ទាប់ពីបង្កហិង្សារួចបានរត់គេចខ្លួនបាត់ស្រមោល ។ ក្រោយពេលកើតហេតុ សមត្ថកិច្ចមូលដ្ឋាន បានទៅដល់មន្ទីរពេទ្យសាកសួរជនរងគ្រោះ ដែលបន្ទាប់ពីព្យាបាលរួចឲ្យទៅដាក់ពាក្យបណ្ដឹងនៅប៉ុស្តិ៍នគរបាលស្ទឹងមានជ័យ ៕
ចែករំលែកព័តមាននេះ