រាជធានីភ្នំពេញ ៖ កាកបាទក្រហមកម្ពុជា នៅព្រឹកថ្ងៃទី១៣ ខែមិថុនា ឆ្នាំ២០១៧ នេះ ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានផ្តល់ថវិកា $១.000.000 (មួយលានដុល្លារអាមេរិក) ជាលើកទី៦ ជូនមូលនិធិគន្ធបុប្ផា ។
ពិធីនេះប្រព្រឹត្តទៅនៅទីស្នាក់ការកណ្តាលកាកបាទក្រហមកម្ពុជា ក្រោមវត្តមានរបស់លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា ។ ក្នុងឱកាស លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានពាំនាំប្រសាសន៍ផ្តាំផ្ញើសួរសុខទុក្ខ ក្តីសោមនស្សរីករាយ និងការកោតសរសើរពីសំណាក់ សម្តេចកិត្តិព្រឹទ្ធបណ្ឌិតប្រធាន ជូនចំពោះគណៈប្រតិភូ ជាពិសេស ក្រុមគ្រូពេទ្យ និងបុគ្គលិកនៃមន្ទីរពេទ្យគន្ធបុប្ផាទាំងអស់ ដែលបានខិតខំប្រឹងប្រែងព្យាបាលជំងឺជូនស្ត្រីមានផ្ទៃពោះឆ្លងទន្លេ និងកុមារកម្ពុជារាប់ពាន់រាប់ម៉ឺននាក់ ឱ្យរួចផុតពីសេចក្តីស្លាប់ និងពិការភាព ។ ជាមួយគ្នានោះ លោកជំទាវ ក៏បានពាំនាំប្រសាសន៍សម្តេចកិត្តិព្រឹទ្ធបណ្ឌិត ដែលផ្តាំសួរសុខទុក្ខចំពោះលោក បេអាត រិចនឺ ដែលបានកំពុងសម្រាក ក្រោយការព្យាបាលជំងឺ និងបួងសួងឲ្យលោកឆាប់បានជាសះស្បើយផ្តល់ជាកម្លាំងចិត្ត ដល់ការបន្តទ្រទ្រង់មន្ទីរពេទ្យគន្ធបុប្ផាដើម្បីកុមារកម្ពុជា ។ ជាកិច្ចឆ្លើយតប លោកវេជ្ជ. ដេនីស ឡូរ៉ង់ (Denis LAURENT) ប្រធានប្រតិបត្តិមូលនិធិគន្ធបុប្ផា និងលោកជំទាវវេជ្ជ. យក់ សម្បត្តិ អគ្គនាយិការដ្ឋបាល និងហិរញ្ញវត្ថុ ទីប្រឹក្សាក្រសួងសុខាភិបាល ព្រមទាំងគណៈប្រតិភូ បានថ្លែងអំណអរគុណដល់សណ្តានចិត្តរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលនៅតែបន្តជួយឧបត្ថម្ភគាំទ្រថវិកា ១លានដុល្លារ បាន ៦ឆ្នាំ ជាបន្តបន្ទាប់តាំងពីឆ្នាំ ២០១២រៀងមក ។ លោកបញ្ជាក់ថា ការផ្តល់មូលនិធិថវិកាដ៏ច្រើននេះក៏ជាការ លើកទឹកចិត្តដល់បុគ្គលិកទាំងអស់បន្តនូវការបំពេញភារកិច្ចរបស់ខ្លួនឱ្យកាន់តែមានប្រសិទ្ធភាព និងទទួលបានគាំទ្រកាន់តែច្រើនពីសំណាក់ជាតិ និងអន្តរជាតិ ជាពិសេសចំពោះប្រជាជនកម្ពុជាឱ្យមានទំនុកចិត្តក្នុងការនាំកូនៗរបស់ខ្លួនមកព្យាបាល ។
គួបញ្ជាក់ថា ជារៀងរាល់ឆ្នាំ កាកបាទក្រហមកម្ពុជាក្នុងនាមជាស្ថាបនមនុស្សធម៌ធំជាងគេ នៅកម្ពុជាមិនដែលខកខានឡើយម្តងណាឡើយ ក្នុងការផ្តល់វិភាគទានជួយដល់មន្ទីរពេទ្យគន្ធបុប្ផា ។ សព្វថ្ងៃនេះ មន្ទីរពេទ្យគន្ធបុប្ផាមានចំនួន២កន្លែងគឺនៅភ្នំពេញ និងនៅខេត្តសៀមរាប ហើយការចំណាយក្នុងមួយថ្ងៃមន្ទីរពេទ្យមួយនេះបានប្រើថវិកាអស់ចំនួនប្រមាណ ១២ ម៉ឺនដុល្លារ និងមួយឆ្នាំជាង៤០លានដុល្លារ ៕
ចែករំលែកព័តមាននេះ