ខេត្តព្រះវិហារ ៖ កាលពីថ្ងៃទី១១ ខែមិថុនា ឆ្នាំ២០១៧នេះ ប្រជាពលរដ្ឋ រស់នៅឃុំស្អាង ស្រុកជ័យសែន និងឃុំទឹកក្រហម ស្រុកជាំក្សាន្ត បាននាំគ្នាប្រមូលអាវុធកែច្នៃ
ខេត្តព្រះវិហារ ៖ កាលពីថ្ងៃទី១១ ខែមិថុនា ឆ្នាំ២០១៧នេះ ប្រជាពលរដ្ឋ រស់នៅឃុំស្អាង ស្រុកជ័យសែន និងឃុំទឹកក្រហម ស្រុកជាំក្សាន្ត បាននាំគ្នាប្រមូលអាវុធកែច្នៃ និងគ្រាប់យុទ្ធភណ្ឌមិនទាន់ផ្ទុះ មកឲ្យ សមត្ថកិច្ចនគរបាលតាមប៉ុស្តិ៍រដ្ឋបាលនីមួយៗ បន្ទាប់ពីមានការផ្សព្វផ្សាយដាស់តឿនជារឿយៗពី អាជ្ញាធរ មូលដ្ឋាន អំពីការប្រើប្រាស់ និងរក្សាទុកនូវអាវុធជាតិផ្ទុះខុសច្បាប់កន្លងទៅ។
នេះបើតាមលោកវរៈសេនីយ៍ឯក ឆយ បូរិន នាយសេនាធិការដ្ឋាន នៃស្នងការដ្ឋាននគរបាល ខេត្តព្រះវិហារ បានឲ្យដឹងថា បច្ចុប្បន្ននេះប្រជាពលរដ្ឋនៅតាមមូលដ្ឋានដាច់ស្រយាល មានការយល់ដឹងច្រើនពីគោលនយោបាយភូមិឃុំមានសុវត្ថិភាព ជាក់ស្តែងកាលពីថ្ងៃទី១១ ខែមិថុនា ឆ្នាំ២០១៧ ប្រជាពលរដ្ឋ រស់នៅឃុំស្អាង ស្រុកជ័យសែន និងឃុំទឹកក្រហម ស្រុកជាំក្សាន្ត បាននាំគ្នាប្រមូលអាវុធកែច្នៃ និងគ្រាប់យុទ្ធភណ្ឌមិនទាន់ផ្ទុះ មកឲ្យសមត្ថកិច្ចនគរបាលតាមប៉ុស្តិ៍រដ្ឋបាលនីមួយៗ ក្នុងនោះមានអាវុធកែច្នៃប្រភេទកាប៊ីន ៧ដើម កាំភ្លើងខ្យល់១ដើម គ្រាប់កាំភ្លើងប្រភេទ ១២,៧ ចំនួន៣កេះ គ្រាប់បែកដៃ២គ្រាប់ មីនប្រភេទ៦៩ ចំនួន២គ្រាប់ និងគ្រាប់៦០មីល្លីម៉ែត្រ ចំនួន១គ្រាប់ផងដែរ។
លោក ឆយ បូរិន ក៏ស្នើឲ្យប្រជាពលរដ្ឋនៅគ្រប់មូលដ្ឋានទាំងអស់ ជាពិសេសតំបន់ដាច់ស្រយាលតែម្តង ដែលតែងតែកែច្នៃកាំភ្លើងកាប៊ីន កាំភ្លើងខ្យល់ ទាំងអស់សម្រាប់បរបាញ់សត្វ ត្រូវធ្វើយ៉ាងណានាំគ្នាប្រមូលយកមកប្រគល់ជូនអាជ្ញាធរមានសមត្ថកិច្ច ដើម្បីចូលរួមចំណែក អនុវត្តន៍នូវគោលនយោបាយភូមិឃុំ មានសុវត្ថិភាពឲ្យមានប្រសិទ្ធភាព។ ប្រជាពលរដ្ឋ ប្រមាណ២៥នាក់ ដែលរស់នៅឃុំស្អាង ដែលបានប្រគល់កាំភ្លើងកែច្នៃជូនសមត្ថកិច្ច បានសម្តែងការរីករាយ និងចូលរួមសហការជាមួយសមត្ថកិច្ចបន្ថែមទៀត រាល់ការងារអនុវត្តភូមិឃុំមានសុវត្ថិភាពរបស់រាជរដ្ឋាភិបាល ដើម្បីធានាសណ្តាប់ធ្នាប់សាធារណៈ សន្តិសុខសុវត្ថិភាពដល់ភូមិឃុំ។
គួររំឭកថា កន្លងទៅពី១ឆ្នាំទៅ១ឆ្នាំ នៅខេត្តព្រះវិហារ តែងតែមានមនុស្សស្លាប់ជារឿយៗ ដោយសារតែការប្រើប្រាស់កាំភ្លើងកែច្នៃនេះ ពេលខ្លះរាលកៃកាំភ្លើង ស្លាប់ខ្លួនឯង និងខ្លះទៀត បានយកកាំភ្លើងនេះបាញ់សម្លាប់មនុស្សតែម្តង នៅពេលមានហិង្សាកើតឡើង។ សូមបញ្ជាក់ថា កាលពីឆ្នាំ២០១៦កន្លងនេះ ស្នងការដ្ឋាននគរបាលខេត្តព្រះវិហារ ប្រមូលបានអាវុធកែច្នៃ ប្រភេទកាប៊ីន កាំភ្លើងខ្យល់ប្រមាណជិត២០០០ដើម ដែលគ្រោង និងដុតកម្ទេចចោល នៅពេលខាងមុខ ៕
ចែករំលែកព័តមាននេះ