ខេត្តកំពង់ស្ពឺ ៖ បន្ទាប់ពីមានការចុះផ្សាយរបស់វេបសាយកោះសន្តិភាពចេញផ្សាយករណីរឿងបាត់លុយការពារបោះឆ្នោតរួចមក លោកអនុសេនីយ៍ឯក យ៉ាង សុខលី អធិការនគរបាលស្រុកបសេដ្ឋ បានបំភ្លឺថា រឿងលុយការពារ លោកបានបើកជូនមន្ត្រីតាមបណ្តាប៉ុស្តិ៍គ្រប់ចំនួនអស់ហើយ ដោយពុំមានការបាត់បង់ ឬខ្វះខាតនោះទេ។
លោកអធិការបន្តថា ករណីនេះគឺមានមនុស្សមួយចំនួនតូចចង់កាច់កុងរូបលោក ទើបរាយការណ៍បំផ្លើសបែបនេះ ខណៈដែលការពិតមិនដូចការលើកឡើងខាងលើនោះទេ។ លោកអធិការបន្តថា ក្នុងនាមលោកជាអ្នកដឹកនាំនគរបាលស្រុកមិនដែលគិតចង់បាន ឬកឹបកេងលុយកាក់របស់កូនចៅក្រោមឱវាទនោះទេ គឺលោកមានតែជួយទំនុកបំរុងដល់កូនចៅដែលខ្វះខាត។ សូម្បីតែការចំណាយទៅលើការហូបចុករបស់មន្ត្រីនៅអធិការដ្ឋានស្រុកក៏លោកជាអ្នកទំនុកបំរុងទាំងស្រុងដែរ។
ពាក់ព័ន្ធនឹងការលើកឡើងករណីបាត់លុយការពារបោះឆ្នោតនេះដែរ មន្ត្រីនគរបាលប៉ុស្តិ៍ពោធិម្រាល ក៏ដូចជាលោកនាយប៉ុស្តិ៍បានបំភ្លឺដែរថា ខាងមន្ត្រីទាំងអស់បានទទួលលុយគ្រប់ចំនួនគ្រប់ៗគ្នាពុំមានការបាត់បង់នោះទេ។
លោកអធិការបានបន្តថា ករណីនេះគឺជាការបំផ្លើសហួសពីការពិតដែលមិនអាចទទួលយកបាន តែលោកមិនខឹង ឬធ្វើការឆ្លើយតបនោះទេ ព្រោះអ្នកថា ខុសពីអ្នកធ្វើ ដោយលោកបានលើកឡើងថា «មនុស្សទាំងនោះមិនបានមកបំពេញការងារនោះទេ ទើបចេះតែមានការនិន្ទាដូច្នេះ ដោយឡែកអ្នកដែលបានបំរើការងារពិតប្រាកដពួកគេអាចទទួលយកបាន»។
លោកអធិការក៏បានសំណូមពរផងដែរដល់មជ្ឈដ្ឋានមហាជនក៏ដូចជាថ្នាក់លើនៃស្នងការនគរបាលខេត្ត ក៏ដូចក្រសួងមេត្តាឈ្វេងយល់ប្រកបដោយគតិបណ្ឌិត ដោយពុំមានការជឿតែម្ខាងៗទៅតាមបុគ្គលខិលខូចនោះទេ។
សូមរំលឹកថា មានមន្ត្រីតាមបណ្តាប៉ុស្តិ៍មួយចំនួនបានសម្ដែងនូវការអាក់អន់ចិត្ត បន្ទាប់ពីទទួលលុយមិនបានគ្រប់ចំនួន ដោយបានលើកឡើងថា លោកអធិការបានធ្វើឱ្យបាត់លុយរបស់ពួកគាត់។ អាចបញ្ជាក់ទៀតថា មានតែប៉ូលិសខិលខូចបន្តិចបន្តួចដែលខ្ជិលការងារ បាត់មុខពីការងារ ម្ល៉ោះហើយអ្នកខ្ជិលបែបនេះចង់បានលាភដូចគេដែរ ក៏ខឹងសំបាររាយការណ៍បង្ខូចបង្កាច់កិត្តិយសមេរបស់ខ្លួន ។ ប៉ូលិសបែបនេះ ទុកក៏មិនចំណេញ ដកចេញក៏មិនខាតដែរ ដកគ្រវែងចោលទៅ!
ចែករំលែកព័តមាននេះ