រាជធានីភ្នំពេញ ៖ តម្លៃដីធ្លីនៅតាមបណ្តាខេត្តមានសក្តានុពលសេដ្ឋកិច្ចមួយចំនួន ជាពិសេស ខេត្តព្រះសីហនុកំពុងកើនឡើង ខណៈលំហូរចូលនូវវិនិយោគិនមកពីប្រទេសចិន និងការភ្ជាប់ជើងហោះហើរកាន់តែច្រើន ។
រាជធានីភ្នំពេញ ៖ តម្លៃដីធ្លីនៅតាមបណ្តាខេត្តមានសក្តានុពលសេដ្ឋកិច្ចមួយចំនួន ជាពិសេស ខេត្តព្រះសីហនុកំពុងកើនឡើង ខណៈលំហូរចូលនូវវិនិយោគិនមកពីប្រទេសចិន និងការភ្ជាប់ជើងហោះហើរកាន់តែច្រើន ។
ដីនៅតំបន់ពាណិជ្ជកម្មនៅក្រុងព្រះសីហនុ មានតម្លៃ១.៥០០ទៅ២.០០០ដុល្លារ និងដីនៅតាមផ្លូវតូចៗមានតម្លៃចាប់ពី១០០ទៅ២០០ដុល្លារក្នុង១ម៉ែត្រការ៉េ ។ នេះបើតាមការបញ្ជាក់របស់លោកឧកញ៉ា ចេង ខេង ។
អគ្គនាយកក្រុមហ៊ុន Key Real Estate លោក សន សៀប បានថ្លែងតាមទូរស័ព្ទនាព្រឹកថ្ងៃទី៩ មិថុនា ថា លោកកត់សម្គាល់ឃើញថា តម្លៃដីធ្លីនៅខេត្តព្រះសីហនុកើនឡើង ជាពិសេស គម្រោងសាងសង់អគារខ្ពស់ៗនៅខេត្តនេះ ដោយសារការមកដល់របស់វិនិយោគិនចិនកាន់តែច្រើន ។ លោកបន្តថា បច្ចុប្បន្ន មានគម្រោងខុនដូជាច្រើនបាននិងកំពុងសាងសង់នៅខេត្តជាប់ឆ្នេរសមុទ្រដ៏ស្រស់ស្អាតមួយនេះ ។
លោកបន្តថា ៖ « ខេត្តព្រះសីហនុ នឹងកាន់តែមានសក្តានុពលខ្លាំងនៅពេលអនាគត ដោយសារតែការមកដល់របស់ភ្ញៀវទេសចរ ការភ្ជាប់ជើងហោះហើរ និងអ្នកវិនិយោគចិនកាន់តែច្រើនបានចូលទៅវិនិយោគនៅតំបន់សេដ្ឋកិច្ចពិសេសក្នុងខេត្ត » ។
បច្ចុប្បន្ននេះ មានសហគ្រាស និងរោងចក្រចិនជាង១០០ កំពុងវិនិយោគនៅតំបន់សេដ្ឋកិច្ចពិសេសខេត្តព្រះសីហនុ ជាខេត្តដែលរាជរដ្ឋាភិបាលបាននិងកំពុងរៀបចំជាតំបន់ឧស្សាហកម្ម នៅក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ។
លោកឧកញ៉ា ចេង ខេង អគ្គនាយកក្រុមហ៊ុន Hutton CPL បានថ្លែងដែរថា បើនិយាយពីខេត្តមានសក្តានុពលសេដ្ឋកិច្ច ខេត្តព្រះសីហនុកំពុងមានភាពលេចធ្លោ ដែលបានធ្វើឲ្យតម្លៃដីធ្លីកើនឡើង ដោយសារការវិនិយោគកាន់តែច្រើននៅខេត្តជាប់មាត់សមុទ្រនេះ ព្រមទាំងសកម្មភាពទិញដីពុះឡូត៍លក់កំពុងតែសកម្ម ។
លោកបន្តថា ៖ « តម្លៃដីនៅខេត្តព្រះសីហនុ នឹងអាចឡើងថ្លៃតទៅទៀត ដោយសារមានសកម្មភាពវិនិយោគថ្មីៗច្រើន ប៉ុន្តែបើនិយាយពីកម្រិតនៃការឡើងថ្លៃប៉ុន្មានភាគរយ ខ្ញុំមិនទាន់អាចវាយតម្លៃបានទេ ចំណែកខេត្តបាត់ដំបង ខ្ញុំមិនសូវមានព័ត៌មានក្នុងដៃទេ » ៕
ចែករំលែកព័តមាននេះ