រាជធានីភ្នំពេញ ៖ ថ្មីៗនេះមានពាក្យចចាមអារ៉ាមមួយកំពុងតែផុសផុលក្នុងវិស័យវិនិយោគដីធ្លីនៅខេត្តព្រះសីហនុ ថា មហាសេដ្ឋីលំដាប់ទី១របស់ចិន លោក Jack Ma បានមកទិញដីនៅតំបន់ឆ្នេរអូរត្រេះដើម្បីវិនិយោគដ៏ធំ។ ពាក្យចចាមអារ៉ាមនេះ បានធ្វើឲ្យដីធ្លីនៅតំបន់នោះមានសកម្មភាព និងសន្ទុះផងដែរ ហើយប្រសិនបើមហាសេដ្ឋីរូបនេះពិតជាទិញដីដើម្បីវិនិយោគនៅតំបន់នោះមែន វាជាសញ្ញាវិជ្ជមាន មិនមែនសម្រាប់តែខេត្តជាប់មាត់សមុទ្រមួយនេះទេ ថែមទាំងប្រទេសកម្ពុជាទាំងមូលផងដែរ។
ការបញ្ចេញពាក្យចចាមអារ៉ាមនេះ ក៏ជាយុទ្ធសាស្ត្រនៅក្នុងអាជីវកម្មផងដែរដែលក្រុមហ៊ុនល្បីៗនៅលើពិភពលោកកំពុងប្រើប្រាស់ ដើម្បីងាយស្រួលបញ្ជ្រាបព័ត៌មានអំពីផលិតផល សេវាកម្ម ឬគម្រោងរបស់ពួកគេដល់សាធារណជន ដោយមិនចាំបាច់ចំណាយការផ្សព្វផ្សាយ ។
បើតាមអ្នកជំនាញអចលនទ្រព្យ លោកឧកញ៉ា នួន រឹទ្ធី អគ្គនាយកក្រុមហ៊ុនប្រឹក្សា និងវាយតម្លៃអចលនទ្រព្យ Khmer Foundation Appraisal ឱ្យដឹងថា មួយរយៈពេលចុងក្រោយនេះ លោកបានទទួលព័ត៌មានជាច្រើនទាក់ទងនឹងវិនិយោគិនចិនមកបណ្ដាក់ទុនវិនិយោគនៅក្នុងខេត្តព្រះសីហនុ ហើយព័ត៌មានពីមហាសេដ្ឋីចិនលោក Jack Ma មកទិញឬយ៉ាងណានោះ មិនច្បាស់ទេ មិនដឹងថា គាត់មកទិញតាមរយៈវិនិយោគិនចិនមួយណាដែរ ។
លោកឧកញ៉ាបន្តថា ពាក់ព័ន្ធនឹងបញ្ហានេះ បើសិនជាមានអ្នកបំផុសព័ត៌មានដើម្បីឲ្យហាងឆេងដីធ្លីនៅទីនោះឡើងខ្ពស់ វាប្រហែលជាមិនអាចឡើងថ្លៃទៀតទេ ព្រោះនៅក្នុងអំឡុងចុងឆ្នាំ២០១៦ ឬដើមឆ្នាំ២០១៧នេះ តម្លៃដីធ្លីនៅក្នុងខេត្តព្រះសីហនុ បានឡើងគុណនឹង១០ទៅហើយ។ ដូចនេះ បើមានព័ត៌មានបំផុសឲ្យតម្លៃដីធ្លីនៅទីនោះឡើងថ្លៃ ប្រហែលជាមិនអាចឡើងទៀតទេ ។
លោកឧកញ៉ាបន្ថែមថា ៖ « ដីធ្លីនៅក្រុងព្រះសីហនុនាពេលបច្ចុប្បន្ននេះ មិនអាចទិញសម្រាប់ទុកលក់បន្តដើម្បីយកចំណេញបានទេ។ បើមានអ្នកទិញហើយ គឺនឹងអភិវឌ្ឍន៍ ឬសាងសង់ជាអ្វីផ្សេងៗតែម្ដង ព្រោះតម្លៃវានៅពេលនេះខ្ពស់ ដែលមិនអាចទិញហើយទុកលក់បន្តយកចំណេញទេ ។ ជាក់ស្ដែង ដីនៅតំបន់ដែលមានព័ត៌មានថា លោក Jack Ma ទិញសម្រាប់វិនិយោគនៅតំបន់អូរត្រេះ វាឡើងស្ទើរ១០ដងទៅហើយ អីចឹងមិនអាចឡើងតទៀតបានទេ » ។
លោកឧកញ៉ាបញ្ជាក់ថា បើសិនជាមានការវិនិយោគពីមហាសេដ្ឋីចិនមកកម្ពុជាមែន វាជារឿងល្អប្រសើរណាស់សម្រាប់ជំរុញកំណើនសេដ្ឋកិច្ចកម្ពុជា ។ វាជាផ្នែកមួយដ៏ធំសម្រាប់ទាក់ទាញវិនិយោគិនផ្សេងទៀតមកបណ្ដាក់ទុននៅកម្ពុជា ជាពិសេស វិនិយោគលើតំបន់មាត់សមុទ្រនេះ ។ លោកឧកញ៉ាមានប្រសាសន៍ថា ៖ « បើមានសហគ្រិនដ៏ធំមកវិនិយោគនៅកម្ពុជា ប្រៀបបាននឹងជួយផ្សព្វផ្សាយពីទីផ្សាររបស់ប្រទេសយើងទៅកាន់ពិភពលោកដែរ ហើយមួយទៀត ប្រទេសកម្ពុជា ក៏ជាគោលដៅទេសចរណ៍ដ៏ធំបំផុត ព្រោះកម្ពុជាមានកន្លែងទេសចរណ៍ល្បីៗជាច្រើន ដែលភ្ញៀវបរទេសចាប់អារម្មណ៍ ។ ម្យ៉ាងទៀត តំបន់មាត់សមុទ្រខេត្តព្រះសីហនុ ក៏មានគម្រោងដាក់ឱ្យប្រើប្រាស់តំបន់សេដ្ឋកិច្ចដូចទីក្រុងស៊ិនជិន នៅប្រទេសចិនផងដែរ ។ អ្វីពិសេសនោះ កម្ពុជា ក៏ជាប្រទេសបេះដូងនៃអាស៊ាន ដែលអ្នកវិនិយោគជាច្រើនចាប់អារម្មណ៍មកបណ្ដាក់ទុន ព្រោះតែតមៃ្លដីធ្លីនៅកម្ពុជាធូរថ្លៃច្រើន បើធៀបនឹងប្រទេសជិតខាងរបស់យើង » ។
ទោះបីយ៉ាងណា បើតាមអាជ្ញាធរខេត្តនេះអះអាងកាលពីថ្ងៃទី៩ មិថុនា ថា មានការទិញ-លក់ដីច្រើននៅក្នុងខេត្តព្រះសីហនុ ប៉ុន្តែមិនដឹងជានរណាខ្លះមកទិញទេ ។ ចំណែកពាក្យចចាមអារ៉ាមថា លោក Jack Ma មកទិញដីនោះ មិនមានព័ត៌មានផ្លូវការណាមួយទេ ហើយបើទិញ ក៏តាមរយៈបណ្ដាញក្រុមហ៊ុនរបស់លោកដែរ ។
ថ្លែងប្រាប់សារព័ត៌មានកោះសន្តិភាពតាមទូរស័ព្ទ លោក យន្ដ មីន អភិបាលខេត្តព្រះសីហនុ ឲ្យដឹងថា លោកបានទទួលព័ត៌មានពីការទិញដីធ្លីនៅក្នុងខេត្ត ដើម្បីវិនិយោគផ្សេងៗជាច្រើន ព្រោះខេត្តព្រះសីហនុមានតំបន់ទេសចរណ៍ច្រើន ដែលអាចទាក់ទាញភ្ញៀវទេសចរជាតិ និងអន្តរជាតិមកសម្រាកលំហែ ប៉ុន្ដែរឿងព័ត៌មានថា លោក Jack Ma មកទិញដីនៅខេត្តនេះដើម្បីវិនិយោគនោះ គ្មានព័ត៌មានផ្លូវការណាមួយបញ្ជាក់ច្បាស់ទេ ដូចនេះ លោកមិនដឹងច្បាស់ឡើយ ៕
ចែករំលែកព័តមាននេះ