រាជធានីភ្នំពេញ ៖ សំណុំរឿងយុវជនម្នាក់អតីតជាពិធីករ វិទ្យុABC បានក្លាយជាជនជាប់ចោទពីបទ(ប៉ុនប៉ងឃាតកម្ម) លើនារីជាគូដណ្តឹងគ្រាន់តែនាងសុំចែកផ្លូវគ្នា នាព្រឹកថ្ងៃទី៩ មិថុនា ២០១៧ ត្រូវបានសាលាដំបូងរាជធានីភ្នំពេញ លើកយកមកបើកសវនាការជំនុំជម្រះទោស។ ប៉ុន្តែក្រោយពេលអង្គសវនាការសាកសួរដេញដោលចប់ ប្រធានក្រុមប្រឹក្សាជំនុំជម្រះ បានលើកពេលប្រកាសសាលក្រមផ្តន្ទាទោស លើជនជាប់ចោទទៅថ្ងៃទី២០ មិថុនា ខាងមុខនេះ។ អង្គសវនាការមានលោកស្រី ថ្លាង ផាណែត ជាប្រធានក្រុមប្រឹក្សា និងលោក ខាំ ផារី ព្រះរាជអាជ្ញារងជាតំណាងអយ្យការ ដោយចំពោះមុខជនជាប់ចោទ រួមទាំងមេធាវីការពារក្តី ដែលសវនាការនេះបានធ្វើឡើងជាសាធារណៈ។
ជនជាប់ចោទឈ្មោះ សយ ញ៉ក់ ហៅ សុខជា ភេទប្រុស អាយុ២៤ឆ្នាំ មុខរបរជាបុគ្គលិក វិទ្យុABC កម្ពុជា ស្នាក់នៅភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប។ ចំណែកនារីជាគូដណ្តឹងឈ្មោះ ខាត់ រចនា អាយុ២៦ឆ្នាំ ស្នាក់នៅផ្លូវលេខ១៩ ភូមិ៣ សង្កាត់ចតុមុខ ខណ្ឌដូនពេញ រាជធានីភ្នំពេញ។ នៅមុខរង្វង់ក្រចកសេះជនជាប់ចោទបានឆ្លើយសារភាពជូនអង្គសវនាការថា កាលពីវេលាម៉ោង៦ល្ងាច ថ្ងៃទី២៧ ធ្នូ ២០១៦ ខ្លួន(សយ ញ៉ក់) បានទៅផ្ទះគូដណ្តឹង ដើម្បីនិយាយគ្នាថា ហេតុអីភ្ជាប់ពាក្យបានរយៈពេលពីរខែហើយ បែរជាសុំបែកផ្លូវគ្នាវិញ។ ជនជាប់ចោទបន្តថា ខ្លួនមិនអាចបាត់បង់នាងបានទេ ហើយនាងក៏មិនអាចធ្វើដូច្នេះបានដែរ សុខៗសុំចែកផ្លូវ។
ពេលនិយាយយ៉ាងដូច្នេះ ក៏កើតមានការទាស់ពាក្យសម្ដីគ្នា ធ្វើឲ្យខ្លួនខឹងពេក ក៏ស្ទុះទៅទាញបានកាំបិតចុងស្រួច ចាក់នាងជាគូដណ្តឹងចំនួន៣កាំបិតប៉ុនប៉ងសម្លាប់ បណ្តាលឲ្យឈាមហូរជោគខ្លួន ពេលនោះនាងបានស្រែហៅអ្នកជិតខាងឲ្យជួយដឹកទៅសង្គ្រោះនៅមន្ទីរពេទ្យ។ ចម្លើយបន្តថា ពេលឃើញនាងមានរបួសដូច្នោះ ខ្លួនក៏បានយកកាំបិតអារកសម្លាប់ខ្លួនឯងដែរ ព្រោះមិនចង់រស់ទៀតទេ ខណៈមនុស្សដែលខ្លួនស្រឡាញ់ហើយ បែរជាគេសុំចែកផ្លូវទៅវិញ។ ជនជាប់ចោទទទួលស្គាល់កំហុសដែលខ្លួនបានប្រព្រឹត្ត និងបានទទួចសុំឲ្យតុលាការបន្ធូរបន្ថយទោស ដែលខ្លួនធ្វើខុសព្រោះស្រឡាញ់មិនចង់បែកគូរដណ្តឹងនោះ ។ ទោះជាយ៉ាងណាតំណាងអយ្យការ បាននិង នៅតែរក្សាការចោទប្រកាន់លើជនជាប់ ពីបទ.ប៉ុនប៉ងឃាតកម្ម ហើយបានស្នើសុំឲ្យតុលាការផន្តាទោសជនជាប់តាមផ្លូវច្បាប់ ៕
ចែករំលែកព័តមាននេះ