រាជធានីភ្នំពេញ ៖ អ្នកផលិតកម្មវិធីកម្សាន្តរបស់ស្ថានីយទូរទស្សន៍ស៊ីធីអ៊ិន លោកសុវណ្ណ រិទ្ធី ហៅលោកតាវ៉ិចទ័រ បានអះអាងថាលោកមានបំណងចង់បណ្តុះបណ្តាលឱ្យកូនស្រីច្បងរបស់លោកអ៊ិត សេដ្ឋា ក្លាយជាអ្នកដឹកនាំកម្មវិធី ដើម្បីស្នងតំណែងឪពុក ដែលទើបតែទទួលមរណៈភាពនោះ ។
យ៉ាងណាក៏ដោយ គោលបំណងនេះ ត្រូវបានលោកតាវ៉ិចទ័រ បញ្ជាក់ថា នៅមិនទាន់បានចេញជាផលវិជ្ជមានណាមួយនៅឡើយទេ ព្រោះត្រូវរង់ចាំមើលពីការយល់ព្រមជាមុន ពីសំណាក់កូនស្រីច្បងរបស់លោកអ៊ិត សេដ្ឋា ។ លោកសុវណ្ណ រិទ្ធី ហៅលោកតាវ៉ិចទ័រ បានអះអាងប្រាប់កោះសន្តិភាពតាមទូរស័ព្ទថា បច្ចុប្បន្ន ក្រៅអំពីបង្កើតមូលនិធិជួយដល់ក្រុមគ្រួសាររបស់លោកអ៊ិត សេដ្ឋា ក្រុមហ៊ុនCBS ទាំងមូល ក៏បានបង្កើតនូវមូលនិធិការងារ សម្រាប់ក្រុមគ្រួសាររបស់លោកផងដែរ ។ ការបង្កើតមូលនិធិការងារនេះ គឺក្នុងគោលបំណងឲ្យក្រុមគ្រួសាររបស់លោកអ៊ិត សេដ្ឋា មានចំណូល ដើម្បីយកមកផ្គត់ផ្គង់គ្រួសារ ដែលកំពុងតែជួបទុក្ខលំបាកនាពេលនេះ។
បើតាមលោកតាវ៉ិចទ័រ ឈរលើគោលការណ៍នេះ ហើយលោកបានមានគំនិតចង់បណ្តុះកូនស្រីច្បងរបស់លោកអ៊ិត សេដ្ឋា ឱ្យក្លាយជាអ្នកដឹកនាំកម្មវិធីទៅថ្ងៃអនាគត ដើម្បីជំនួសតំណែងលោក អ៊ិត សេដ្ឋា ។ លោកបញ្ជាក់ថា បញ្ហាខាងលើនេះ លោកបានពិភាក្សាជាមួយកូនរបស់លោកអ៊ិត សេដ្ឋារួចរាល់ហើយ ប៉ុន្តែលោកនៅមិនទាន់បានទទួលភ្លើងសញ្ញាខៀវណាមួយពីកូនលោកនៅឡើយទេ ដោយសារតែក្នុងកាលៈទេសៈនេះ ក្រុមគ្រួសារទាំងមូលនៅតែមានអារម្មណ៍ក្តុកក្តួលនៅឡើយ ។ ម្យ៉ាងទៀត ត្រូវរង់ចាំការធ្វើបុណ្យ៧ថ្ងៃ ឲ្យបានចប់សព្វគ្រប់ជាមុនសិន ។
បើតាមការអះអាងរបស់លោកតាវ៉ិចទ័រថា ប្រសិនបើមានការយល់ព្រមពីកួនរបស់លោកអ៊ិត សេដ្ឋា ហើយនោះ លោកនឹងឱ្យនាងមកនៅជាជំនួយការរបស់លោក ដើម្បីបានសិក្សាស្វែងយល់ពីជំនាញនេះ ។ លោកបន្ថែមថា ការមកបណ្តុះបណ្តាលជាអ្នកផលិតកម្មវិធីនេះ គឺមិនមែនលោកចង់ឲ្យកូនលោក អ៊ិត សេដ្ឋា បោះបង់ចោលការងារសិក្សាឡើយ ពោលគឺលោកចង់ឲ្យកូនរបស់លោកអ៊ិត សេដ្ឋា យកពេលទំនេរពីការសិក្សា ហើយមកជួយកិច្ចការងារជាមួយលោកប៉ុណ្ណោះ ។
ការធ្វើបែបនេះ គឺជាផលចំណេញមួយសម្រាប់កូនលោកអ៊ិត សេដ្ឋា ដោយក្នុងនោះ គេអាចទទួលបានប្រាក់ចំណូលផង និងក្រេបចំណេះដឹងពីរបៀបរបបការងារជាអ្នកដឹកនាំកម្មវិធីសម្តែងផង ។ ដោយឡែក ពាក់ព័ន្ធទៅនឹងកម្មវិធី «មន្តស្នេហ៍សំនៀង» ដែលមានការផ្សាយផ្ទាល់នៅរៀងរាល់ថ្ងៃសៅរ៍នេះ ត្រូវបានលោកតាវ៉ិចទ័រ អះអាងថា កម្មវិធីគឺនៅតែដំណើរការជាធម្មតា ដោយលោកបានស្នើឲ្យលោកអ៊ឹង រដ្ឋា ហៅទុយ មកជំនួសតំណែងលោកអ៊ិត សេដ្ឋា ជាបណ្តោះអាសន្នសិន មុនពេលដែលលោកអាចជ្រើសរើសពិធីករណាមួយដែលស័ក្តសម ។
ចែករំលែកព័តមាននេះ