ខេត្តស្វាយរៀង ៖ រយៈពេលប៉ុន្មានថ្ងៃនេះ មានភ្លៀងធ្លាក់បន្តបន្ទាប់គ្នា ស្ទើរតែគ្រប់ទីកន្លែងទៅហើយ ។ ក្នុងនោះ គេសង្កេតឃើញ រថយន្តដឹកកម្មករ-កម្មការិនីរោងចក្រ ដែលធ្វើដំណើរតាមដងផ្លូវជាតិលេខ១ ពីក្រុងបាវិត ទៅលំនៅឋាននានា ត្រូវពួកគាត់បានសើមទទឹកដោយសារទឹកភ្លៀង និងរងារញ័រញាក់ ។ អ្វីដែលចង់និយាយនោះ គឺរថយន្តដឹកកម្មករគឺគ្មានដាក់ដំបូល ដែលកម្មករគាត់នោះទេ ។
ស្ត្រីជាកម្មការិនីម្នាក់បានឱ្យដឹងថា នៅពេលមានភ្លៀងធ្លាក់មក គឺត្រូវទទឹកសើមជោកខ្លួន និងមានអ្នកកើតជំងឺគ្រុនក្តៅ ផ្តាសាយ និងជំងឺផ្សេងៗទៀតផង ។ ហើយនៅរដូវប្រាំងវិញ ដីហុយគូចប្រឡាក់ពីក្បាលដល់ចុងជើង ។ កន្លងមក គេឃើញតែសមត្ថកិច្ចចុះផ្សព្វផ្សាយអំពីច្បាប់ចរាចរណ៍ នៅតាមតំបន់សេដ្ឋកិច្ចមួយចំនួនដែរ ដើម្បីឱ្យអ្នកបើបបររថយន្តត្រូវគោរពច្បាប់ និងធ្វើដំបូលការពារភ្លៀងនិងកំដៅថ្ងៃ តែការណែនាំរបស់សមត្ថកិច្ វដូចជាគ្មានប្រសិទ្ធភាពទាល់តែសោះ ។
ពាក់ព័ន្ធករណីខាងលើនេះ លោកសំ សាវុធ ប្រធានមន្ទីរសាធារណៈការ និងដឹកជញ្ជួនខេត្តស្វាយរៀង បានប្រាប់កោះសន្តិភាពថាកន្លងមក ខាងមន្ទីរធ្លាប់ធ្វើការណែនាំផងដែរ ក៏ប៉ុន្តែបញ្ហានេះ គឺស្ថិតលើក្រុមអ្នកបើកបររថយន្ត ត្រូវគិតពីជីវិតខ្លួនឯង និងជីវិតអ្នកដទៃ ដែលកំពុងរួមដំណើរជាមួយ ។ លោកបន្តថា ម្យ៉ាងវិញទៀត រថយន្តនោះជាប្រភេទរថយន្តដឹកទំនិញ មិនមែនជារថយន្តសម្រាប់ដឹកអ្នកដំណើរ ឬប្រភេទទេសចរណ៍នោះទេ ។ ហើយលោកក៏គ្មានសិទ្ធិចុះទៅណែនាំដល់តំបន់សេដ្ឋកិច្ចនោះដែរ ។
ចែករំលែកព័តមាននេះ