ខេត្តកំពត ៖ ផ្លូវទៅកាន់រម្មណីដ្ឋានភ្នំឈ្ងោកមានស្ថានភាពអាក្រក់ ដែលជាផ្លូវក្រាលក្រួសក្រហមមួយខ្សែតភ្ជាប់ពីផ្លូវជាតិលេខ៣៣ មុខសាលាស្រុកទឹកឈូ មានប្រវែងជិត១០គឺឡូ ទៅកាន់រម្មណីដ្ឋានភ្នំឈ្ងោក ស្ថិតនៅភូមិបុសត្របែក ឃុំត្រពាំងព្រីង ស្រុកទឹកឈូ ៕
ផ្លូវនេះកំពុងមានស្ថានភាពដ៍អាក្រក់ ហើយអ្នកស្រុករស់នៅតាមដងផ្លូវកំពុងជួលរថយន្តដឹកដីយកមកចាក់នៅមុខផ្ទះរៀងៗខ្លួន ដោយសាតែមានភក់ ។ បងប្រុស សុខ សំណាង អាយុ៥១ឆ្នាំ រស់នៅភូមិឃុំខាងលើ បានប្រាប់ឲ្យដឹងថា ផ្លូវក្រាលក្រួសក្រហមចូលទៅកាន់រមណីដ្ឋានភ្នំឈ្ងោកនេះ បើខែប្រាំងហុយដីទាំងយប់ទាំងថ្ងៃ ។ បងប្រុស សុខ សំណាង និយាយប្រាប់បន្តថា តែចូលដល់រដូវវស្សា គឺមានភក់អាក្រក់បែបណឹង ។ បងប្រុស សុខ សំណាង និយាយថា ផ្លូនេះមិនមែនតែអ្នកស្រុកឆ្លងកាត់ពិបាកទេ សូម្បីតែជនបរទេសទៅមើលរូងនៅភ្ន៉ំឈ្ងោកក៏មានការពិបាកណាស់ដែរ ។ ស្ត្រីម្នាក់ទៀតឈ្មោះ ឌុច ឈាន អាយុ49ឆ្នាំ នៅភូមិបុសត្របែក ឃុំត្រពាំងព្រីង ស្រុកទឹកឈូ ខេត្តកំពត បានប្រាប់ឲ្យដឹងកាលពីថ្ងៃម្សិលមិញថា ផ្លូវក្រាលក្រួសនេះពេលមានមេឃភ្លៀងពិបាកណាស់ រអិលដួលទាំងអ្នកជិះកង់ និងម៉ូតូ ។ បងស្រី ឌុចឈាន និយាយថាព្រោះតែមានផ្លូវភក់អីចឹង គាត់បានទិញដីមួយឡាន៧ម៉ឺនរៀល យកមកចាក់នៅមុខផ្ទះកុំឲ្យបែកភក់ពេក ។
លោកមេឃុំត្រពាំងព្រីងឈ្មោះ សំ ប៊ិច បានប្រាប់ឲ្យដឹងថា ផ្លូវគ្រាលក្រួសចូលទៅកាន់រមណីដ្ឋាននេះ ជាផ្លូវរបស់មន្ទីអភិវឌ្យជនបទខេត្តកំពត ជាអ្នកមើលការខុសត្រូវ ។ ទោះជាយ៉ាងណា អ្នកស្រុករស់នៅអមសងខាងផ្លូវទៅកាន់រមណីដ្ឋានភ្នំឈ្ងោក បានទទូចឲ្យខាងមន្ទីពាក់ព័ន្ធជួយជួសជុលផ្លូវនេះឲ្យល្អប្រសើផង ។
ចែករំលែកព័តមាននេះ