ខេត្ដបាត់ដំបង ៖ យុវជនម្នាក់ដែលទើបសែនប្រពន្ធបាន៣ទៅ៤ខែ ត្រូវបានបងស្រីបង្កើតសំរេចចិត្ដប្ដឹងសមត្ថកិច្ចនគរបាលឱ្យចាប់ខ្លួនពីបទ“ចោរកម្ម” ។ សមត្ថកិច្ចបាន និយាយថាជននេះត្រូវបងស្រីរបស់គេប្ដឹង ក្រោយពីបានលួចយកទូរស័ព្ទដៃមួយគ្រឿង និងវ៉ាលីសមួយរបស់ឪពុកមាដែលទើបមកពីបរទេស។ ហេតុការណ៍នេះបានកើតឡើង កាលពីវេលាម៉ោង១១និង៣០នាទីយប់ថ្ងៃទី១៥ កក្កដា នៅភូមិសំរោងតាកុក ឃុំសំរោង ក្នុងស្រុកឯកភ្នំ ។
មន្ដ្រីនគរបាលស្រុកឯកភ្នំបានប្រាប់ថា ជនសង្ស័យនេះឈ្មោះស លៀង អាយុ១៩ឆ្នាំ ទើបសែនប្រពន្ធបាន៣ទៅ៤ខែក្រោយពី ពង្រត់គ្នា ហើយត្រូវបងស្រីរបស់ខ្លួនឈ្មោះ ស លីណា អាយុ២៥ឆ្នាំ ប្ដឹងក្រោយពេល ជននេះលួចយកទូរស័ព្ទដៃ១គ្រឿង និងសំភារមួយចំនួនទៀតរបស់ឪពុកមា ។
មិនតែប៉ុណ្ណោះជននេះធ្លាប់ប្រព្រឹត្ដបទល្មើស ជាច្រើនកន្លងមកក្នុងគ្រួសារ ហើយអាណាព្យាបាលបានព្យាយាមអប់រំដែរតែគេមិន ស្ដាប់ទើបបងស្រីរបស់គេសំរេចប្ដឹងសមត្ថកិច្ចនគរបាលឱ្យចាប់ខ្លួនផ្ដន្ទាទោស ។ តាមចម្លើយសារភាពរបស់ជនសង្ស័យ ឈ្មោះស លៀង បាននិយាយថា ខ្លួនពិតជា បានលួចទូរស័ព្ទដៃ និងវ៉ាលីសរបស់ឪពុកមា ដែលទើបមកពីប្រទេសបារាំងមែន ។ បន្ទាប់ពីលួចបានខ្លួនយកទូរស័ព្ទទៅលក់បានប្រាក់ ២១ដុល្លារ ហើយយកទៅទិញថ្នាំយ៉ាម៉ាបាន៣គ្រាប់ ដោយមិនបានឱ្យប្រាក់ទៅប្រពន្ធចាយទេ ។
ជននេះបានបញ្ជាក់ដោយទទួលស្គាល់ថា បើគ្រាន់តែលួចទ្រព្យប៉ុណ្ណឹងមិន ទំនងបងស្រីខ្លួនប្ដឹងទេ ប៉ុន្ដែដោយសារ ឪពុកខឹងនឹងខ្លួនដែលមិនស្ដាប់តាមការណែនាំ របស់គាត់ដូចជាមិនឱ្យប្រព្រឹត្ដគ្រឿងញៀន មិនឱ្យទាក់ទងប្រពន្ធសព្វថ្ងៃនេះជាដើម តែខ្លួនមិនស្ដាប់ ហើយថែមទាំងបានពង្រត់ នាងយកធ្វើជាប្រពន្ធទៀត ដូច្នេះហើយធ្វើឱ្យឪពុក និងបងស្រីខឹងហើយប្ដឹងសមត្ថកិច្ចឱ្យ ចាប់ខ្លួនតែម្ដងទៅ។ទោះជាយ៉ាងណា តាមការបំភ្លឺរបស់សមត្ថកិច្ចថា ជននេះធ្លាប់បំផ្លិចបំផ្លាញទ្រព្យសម្បត្ដិ ក្នុងផ្ទះច្រើនណាស់ បើតាមការប្រាប់ឱ្យដឹង ពីក្រុមគ្រួសារ ដូច្នេះហើយទើបក្រុមគ្រួសារ ទ្រាំមិនបានសំរេចប្ដឹងបែបនេះ ។ ជនសង្ស័យត្រូវបានកសាងសំណុំរឿងបញ្ជូនទៅកាន់ស្នងការដ្ឋានខេត្ដរួចហើយដើម្បីចាត់ការតាមផ្លូវច្បាប់ ៕
ចែករំលែកព័តមាននេះ