ខេត្តមណ្ឌលគិរី ៖ មណ្ឌលគិរីជាខេត្តមួយដែលអំណោយផលពីធម្មជាតិ ។ ក្រៅពីមានតំបន់ទេសចរណ៍ធម្មជាតិសម្បូរបែបហើយ ខេត្តមួយនេះក៏មានធនធានរ៉ែមានតម្លៃជាច្រើនទៀតសម្រាប់ផ្ដល់អត្ថប្រយោជន៍ដល់ប្រទេសកម្ពុជាទាំងមូល
ខេត្តមណ្ឌលគិរី ៖ មណ្ឌលគិរីជាខេត្តមួយដែលអំណោយផលពីធម្មជាតិ ។ ក្រៅពីមានតំបន់ទេសចរណ៍ធម្មជាតិសម្បូរបែបហើយ ខេត្តមួយនេះក៏មានធនធានរ៉ែមានតម្លៃជាច្រើនទៀតសម្រាប់ផ្ដល់អត្ថប្រយោជន៍ដល់ប្រទេសកម្ពុជាទាំងមូល ។
បើតាមថ្នាក់ដឹកនាំខេត្តបានបញ្ជាក់ថា នៅចុងឆ្នាំ២០១៧ឬដើមឆ្នាំ២០១៨ខាងមុខ ធនធានរ៉ែទាំងនេះនឹងផ្ដល់អត្ថប្រយោជន៍ជាច្រើនដល់ប្រទេសជាតិ ពិសេសប្រជាពលរដ្ឋក្នុងខេត្តទាំងមូល ។
លោក ស្វាយ សំអ៊ាង អភិបាលខេត្តមណ្ឌលគិរី បានមានប្រសាសន៍ថា នៅពេលនេះក្រុមហ៊ុនដែលទទួលបានអាជ្ញាប័ណ្ណរុករករ៉ែនៅក្នុងខេត្តបាននិងកំពុងសាងសង់កន្លែងទាញយកផលរ៉ែ និងបានជួយកសាងហេដ្ឋារចនាសម្ព័ន្ធមួយចំនួននៅក្នុងខេត្ត ។
លោកថ្លែងថា៖« ពេលនេះមានក្រុមហ៊ុនរុករករ៉ែមាសចំនួន៣ដែលទទួលបានអាជ្ញាប័ណ្ណ ធ្វើសិក្សាស្រាវជ្រាវក្នុងខេត្ត ដើម្បីធ្វើអាជីវកម្មទាញយកផលរ៉ែមាសពីខេត្តយើង » ។
លោកបន្តថា នៅពេលក្រុមហ៊ុនទាំងនោះ អាចទាញយកធនធានរ៉ែបាន កម្ពុជានឹងទទួលបានចំណូលបន្ថែមទៀតសម្រាប់ជាតិទាំងមូល ហើយនៅពេលដែលជាតិយើងមានចំណូលបន្ថែម មានន័យថាខេត្តក៏ទទួលបានផលពីអាជីវកម្មរ៉ែនេះដែរ ។ ជាក់ស្ដែងពេលនេះក្រុមហ៊ុនរុករករ៉ែទាំងនេះ កំពុងមានគម្រោងស្ថាបនាហេដ្ឋារចនាសម្ព័ន្ធផ្លូវកៅស៊ូដែលមានគុណភាពខ្ពស់ ដើម្បីជំរុញកំណើនការធ្វើពាណិជ្ជកម្មក្នុងស្រុក ក៏ដូចជាក្រៅប្រទេសផងដែរ ។
លោកបន្ថែមថា នៅពេលអាជីវកម្មរ៉ែចាប់ដំណើរការ វានឹងផ្ដល់ការងារជូនប្រជាពលរដ្ឋក្នុងខេត្ត និងក្នុងប្រទេសទាំងមូល ដូចជាកម្មករជំនាញអណ្ដូងរ៉ែ និងកម្មករបម្រើការក្នុងផ្នែកផ្សេងៗជាដើម។ ម្យ៉ាងទៀត ក្រុមហ៊ុនដែលទទួលអាជ្ញាប័ណ្ណ ក៏បានចូលរួមអភិវឌ្ឍន៍ខេត្តជាបន្តបន្ទាប់ដែរ ដូចជាមន្ទីរពេទ្យ សាលារៀន អណ្ដូងទឹក និងផ្លូវជាដើម ។
លោកអភិបាលខេត្តបានបន្ថែមទៀត បើតាមអ្វីដែលលោកជ្រាប ការចាប់ផ្ដើមអាជីវកម្មទាញយកធនធានរ៉ែមាសពីខេត្តមណ្ឌលគិរីអាច នឹងចាប់ផ្ដើមនៅចុងឆ្នាំ២០១៧ឬដើមឆ្នាំ ២០១៨ខាងមុខ ហើយការបែងចែកចំណូលជាតិប៉ុន្មាននោះ លោកមិនជ្រាបច្បាស់ទេ គ្រាន់តែដឹងថា រ៉ែមាសនៅខេត្តនេះមានច្រើនតោនណាស់ អាចនិយាយថា វាមានរាប់ម៉ឺនតោនឯណោះ ។
លោកថា ៖ « ក្រៅពីរ៉ែមាស នៅក្នុងខេត្តមណ្ឌលគិរី ក៏មានប្រភេទរ៉ែបុកស៊ីតផងដែរ និងត្រូវការវិនិយោគច្រើនលើការរុករក និងធ្វើអាជីវកម្មលើប្រភេទរ៉ែនេះ ។ នៅក្នុងខេត្តមណ្ឌលគិរីប្រភេទរ៉ែបុកស៊ីតនេះក៏មានច្រើនដែរ រាប់រយរាប់ពាន់តោន ដែលនឹងផ្ដល់ចំណូលដល់កម្ពុជាយើងច្រើនទៀតផង » ។
គួរបញ្ជាក់ថា ក្រៅពីខេត្តមណ្ឌលគិរីដែលមានរ៉ែមាស និងរ៉ែមានតម្លៃជាច្រើនហើយនោះ នៅបណ្ដាខេត្តផ្សេងៗទៀតក្នុងប្រទេសកម្ពុជាក៏មានធនធានរ៉ែជាច្រើនប្រភេទដែលកម្ពុជាអាចទាញយកដើម្បីចំណូលជាតិបានផងដែរ ដូចជាខេត្តបាត់ដំបង ខេត្តប៉ៃលិន និងខេត្តព្រះសីហនុ ជាដើម ៕
ចែករំលែកព័តមាននេះ