រាជធានីភ្នំពេញ ៖ បន្ទាប់ពីបើកយុទ្ធនាការហ្វឹកហាត់រយៈពេល១សប្តាហ៍ក្រោមការដឹកនាំរបស់គ្រូបង្វឹកសញ្ជាតិប្រេស៊ីលលោក Leonardo Vitorino ក្រុមបាល់ទាត់ជម្រើសជាតិកម្ពុជាដែលមានរហស្សនាមថាក្រុមគោព្រៃកម្ពុជានឹងបើកទ្វារទទួលស្វាគមន៍ក្រុមបាល់ទាត់ជម្រើសជាតិឥណ្ឌូណេស៊ីក្រោមការដឹកនាំរបស់គ្រូបង្វឹកសញ្ជាតិអេស្ប៉ាញលោក Luis Milla Aspas ក្នុងជំនួបមិត្តភាពអន្តរជាតិកម្ដៅសាច់ដុំនាវេលាម៉ោង៦និង៣០នាទីល្ងាចថ្ងៃទី៨ មិថុនានេះ នៅពហុកីឡដ្ឋានជាតិអូឡាំពិកដោយមានការផ្សាយផ្ទាល់តាមកញ្ចក់ទូរទស្សន៍បាយ័នព័ត៌មាន(BTV News)ផងដែរ ។
តាមប្រភពព័ត៌មានពីបញ្ជរលក់សំបុត្រនៅមុខពហុកីឡដ្ឋានជាតិកាលពីព្រឹកថ្ងៃទី៧មិថុនាឱ្យដឹងថា សំបុត្រចូលទស្សនាការប្រកួតរវាងក្រុមជម្រើសជាតិទាំងពីរមកដល់ពេលនេះនៅសល់ប្រមាណ៨រយសន្លឹកប៉ុណ្ណោះសម្រាប់កន្លែងគ្មានដំបូលដែលមានតម្លៃ៥ពាន់រៀល ចំណែកកន្លែងមានដំបូលតម្លៃ១ម៉ឺនរៀលលក់អស់តាំងពីម្សិលម្ង៉ៃ ។ ដូច្នេះសូមរួសរាន់មកទិញសំបុត្រចូលទស្សនាផ្ទាល់ទាំងអស់គ្នា កុំឱ្យព្រឹត្តិការណ៍ដ៏កក្រើកមួយនេះរំលងផុតពីខ្សែចក្ខុលោកអ្នកឱ្យសោះព្រោះការទស្សនាតាមកញ្ចក់ទូរទស្សន៍មិនសប្បាយដូចទស្សនាផ្ទាល់ឡើយ ។
លោក Leonardo Vitorino គ្រូបង្វឹកក្រុមជម្រើសជាតិកម្ពុជាបានលើកឡើងក្នុងសន្និសីទសារព័ត៌មានកាលពីព្រឹកថ្ងៃទី៧ មិថុនា ថា ជំនួបមិត្តភាពនេះមិនមែនជារឿងងាយស្រួលឡើយសម្រាប់ក្រុមកម្ពុជា ព្រោះក្រុមឥណ្ឌូណេស៊ីមានកីឡាករល្អៗជាច្រើន ។ ក្រុមទាំងពីរធ្លាប់ជួបគ្នាចំនួន៥លើករួចមកហើយប៉ុន្តែក្រុមកម្ពុជាមិនដែលឈ្នះទាល់តែសោះសូម្បីឱកាសស៊ុតបាល់បញ្ចូលទី១គ្រាប់ក៏គ្មានផង ក្នុងពេលក្រុមឥណ្ឌូណេស៊ីស៊ុតបាល់បញ្ចូលទីក្រុមកម្ពុជាបានរហូតដល់ទៅ២០គ្រាប់ឯណោះ ។ លោកបន្ថែមថា សម្រាប់ការប្រកួតល្ងាចនេះរឿងចាញ់ឈ្នះមិនសំខាន់ទេ អ្វីដែលសំខាន់គឺលោកចង់ផ្លាស់ប្ដូរទម្រង់លេងឱ្យបានល្អជាងមុន ។ ហេតុនេះហើយទើបលោកសម្រេចចិត្តដាក់កីឡាករក្មេងៗចូលលេងឱ្យបានច្រើន ព្រោះទិសដៅសំខាន់គឺការត្រៀមខ្លួនចូលរួមប្រកួតកីឡាស៊ីហ្គេម នៅខែសីហា និងការប្រកួតវគ្គជម្រុះACQ(Asian Cup Qualification)ជាមួយក្រុមអាហ្វហ្គានីស្ថាននៅថ្ងៃទី១៣ ខែមិថុនា ។ ទោះបីយ៉ាងណា ក្រុមរបស់លោកនឹងខិតខំឱ្យអស់ពីសមត្ថភាពដើម្បីបំពេញចិត្តអ្នកគាំទ្រ ។
បើក្រឡេកមើលក្រុមបាល់ទាត់ជម្រើសជាតិឥណ្ឌូណេស៊ី ដែលបានមកដល់ទឹកដីកម្ពុជាកាលពីម៉ោង៨យប់ថ្ងៃទី៥ មិថុនា វិញភាគច្រើនពួកគេសុទ្ធសឹងតែជាយុវជនអាយុក្រោម២២ឆ្នាំ ដោយមានកីឡាករមកពីឈុតធំតែ៥នាក់ប៉ុណ្ណោះដែលធ្លាប់ជួយក្រុមជម្រើសជាតិពួកគេឡើងដល់វគ្គផ្ដាច់ព្រ័ត្រពានរង្វាន់ជើងឯកប្រចាំតំបន់អាស៊ីអាគ្នេយ៍ AFF Suzuki Cup 2016 កាលពីឆ្នាំទៅ ។
លោក Luis Milla Aspas គ្រូបង្វឹកក្រុមជម្រើសជាតិឥណ្ឌូណេស៊ី បានថ្លែងថា ក្រុមរបស់លោកក៏ត្រូវបានចាត់ទុកជាក្រុមក្មេងខ្ចីដែរដោយសារតែលោកដាក់កីឡាករដែលមានបទពិសោធន៍ចូលលេងតែ៥នាក់ប៉ុណ្ណោះ ក្រៅពីនោះសុទ្ធតែជាកីឡាករវ័យក្មេងព្រោះលោកក៏មានគំនិតដូចគ្រូបង្វឹកក្រុមកម្ពុជាដែរដែលផ្ដោតលើការប្រកួតកីឡាស៊ីហ្គេមនៅខែសីហា ខាងមុខជាសំខាន់ ។ លោកគិតថា ក្រុមជម្រើសជាតិកម្ពុជាសព្វថ្ងៃមានការផ្លាស់ប្ដូរច្រើន និងមានទម្រង់លេងល្អជាងមុន ។
ដូច្នេះលោកសង្ឃឹមថា ការប្រកួតល្ងាចនេះក្រុមរបស់លោកនឹងទទួលបានបទពិសោធន៍ច្រើនបន្ថែមទៀតពីក្រុមកម្ពុជាមិនខាន ។
ក្រុមអ្នកគាំទ្រកម្ពុជាកំពុងទន្ទឹងរង់ចាំមើលយ៉ាងអន្ទះសាដោយសារតែពួកគេចង់ដឹងថាក្រោមការដឹកនាំរបស់គ្រូបង្វឹកថ្មីតើក្រុមគោព្រៃកម្ពុជាអាចបំបែកកំណត់ត្រាយកឈ្នះក្រុមភ្ញៀវឥណ្ឌូណេស៊ីដែលជាក្រុមខ្លាំងមួយក្នុងតំបន់អាស៊ីអាគ្នេយ៍បានឬអត់ ? ព្រោះបើយោងតាមប្រវត្តិជួបគ្នាចំនួន៥លើកចុងក្រោយរវាងក្រុមទាំងពីរឃើញថា ក្រុមគោព្រៃកម្ពុជាមិនដែលឈ្នះទាល់តែសោះសូម្បីឱកាសស្មើក៏គ្មានដែរ ។
ចែករំលែកព័តមាននេះ