រាជធានីភ្នំពេញ ៖ កាលពីថ្ងៃទី៥ មិថុនា ២០១៧ មានស្ត្រីជាកម្មការិនីរោងចក្រកាត់ដេរម្នាក់ ដែលលង់ស្នេហ៍បុរសជាកម្មករសំណង់បង់ទាំងខ្លួនលង់ទាំងប្រាណរហូតមានផ្ទៃពោះ
រាជធានីភ្នំពេញ ៖ កាលពីថ្ងៃទី៥ មិថុនា ២០១៧ មានស្ត្រីជាកម្មការិនីរោងចក្រកាត់ដេរម្នាក់ ដែលលង់ស្នេហ៍បុរសជាកម្មករសំណង់បង់ទាំងខ្លួនលង់ទាំងប្រាណរហូតមានផ្ទៃពោះ លុះនាងពពោះបាន៣ខែស្រាប់តែប្តីហេងស៊យរត់ចោលបាត់។ ស្ថិតក្នុងជីវភាពលំបាកបែបណាក៏ដោយ ដល់ពេលនាងឈឺពោះឆ្លងទន្លេ នៅក្នុងបន្ទប់ជួលតែម្នាក់ឯងបានទារិកាម្នាក់ ដែលគ្មានប្តីនៅក្បែរ។ ប៉ុន្តែត្រូវបានអ្នកជិតខាងជួយហៅរថយន្តសង្គ្រោះបន្ទាន់របស់អង្គភាព៧១១ កងពលលេខ៧០ជួយ ដឹកទៅកាន់មន្ទីរពេទ្យបង្អែកពោធិចិនតុង។ ស្ត្រីអភ័ព្វម្នាក់នេះឈ្មោះ អ៊ុន ចិន្តា អាយុ២៨ឆ្នាំ មានស្រុកកំណើតនៅភូមិឈើទាល ឃុំត្នោតជុំ ស្រុកក្រគរ ខេត្តពោធិសាត់ បានមកធ្វើជាកម្មករកាត់ដេររោងចក្រ និងស្នាក់នៅបន្ទប់ជួលនៅភូមិទួលពង្រ សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ។
ក្រោយពីមានការជ្រោមជ្រែងពីអ្នកជិតខាង និងអង្គភាពយោធា៧១១ កងពលលេខ៧០ ព្រមទាំងមន្ទីរពេទ្យបង្អែកពោធិចិនតុង ទាំងម្តាយទាំងកូនកម្សត់នោះបានសេចក្តីសុខជាធម្មតាទេ។ ក៏ប៉ុន្តែទារិកានោះកើតមកមានទម្ងន់ត្រឹម១គីឡូ៧ខាំ មិនអាចគ្រប់លក្ខណៈដែលត្រូវឲ្យម្តាយបីបាច់ថែរក្សាបាន ដូច្នោះហើយវេជ្ជបណ្ឌិតមន្ទីរពេទ្យបង្អែកពោធិចិនតុង តម្រូវបញ្ជូនកូននោះទៅសង្គ្រោះនៅមន្ទីរពេទ្យកុមារជាតិ ដែលទីនោះមានឧបករណ៍សម្រាប់គាំពារទារិកាបាន បើមិនដូច្នេះទេទារិកានឹងអាចគ្រោះថ្នាក់។ អ្វីដែលសំខាន់ទៀតនោះត្រង់ថា (ទុក្ខជាន់លើទុក្ខ) នៅក្នុងមន្ទីរពេទ្យកុមារជាតិ ស្ត្រីជាកម្មការិនី នៅតែពីរនាក់ម្តាយ និងកូន ពោលគឺគ្មានសាច់ញាតិកំដរ និងមើលថែនាងទេ។
កាន់តែលំបាកទៀតនោះ នាងខ្វះខាតថវិកាសម្រាប់តម្រូវការសព្វគ្រប់ លើកលែងតែបាយទឹកមន្ទីរពេទ្យផ្តល់ឲ្យនាងបានហូបគ្រប់គ្រាន់។ កោះសន្តិភាពក៏បានអំពាវនាវរកសប្បុរសជនឲ្យជួយនាងតាមសប្បុរសធម៌ដែរ បានជានៅព្រឹកថ្ងៃទី៧ មិថុនា មានខាងអង្គការក្រៅរដ្ឋាភិបាលមួយ ទៅសួរសុខទុក្ខ និងបានផ្តល់លុយកាក់តិចតួចឲ្យនាងដែរ ក្រៅពីនោះមានលោកតាលក់ទាខ្វៃ នៅសង្កាត់ច្បារអំពៅបានជួយតាមរយៈភ្នាក់ងារកោះសន្តិភាពទឹកប្រាក់ចំនួន១០ម៉ឺនរៀល។ តាមពិតទៅមានសប្បុរសជនជាច្រើននាក់ដែរ បានទាក់ទងកោះសន្តិភាព ដើម្បីទៅជួបសួរសុខទុក្ខស្ត្រី និងកូនអភ័ព្វនោះ ប៉ុន្តែមិនទាន់បានឃើញទៅដល់នៅឡើយទេ អាចថាពិបាកក្នុងការទំនាក់ទំនង។
ចាប់ពីពេលនេះទៅបងប្អូនសប្បុរសជនលែងពិបាកហើយ បើមានបំណងចង់ជួយនាងដែលកំពុងជួបទុក្ខលំបាកនោះ សូមទាក់ទងលេខផ្ទាល់ខ្លួននាង ០៨៧ ៤៥ ៩៨ ១៤ ឬ ០១២ ៨៤ ៦០ ១៤៕
ចែករំលែកព័តមាននេះ