រាជធានីភ្នំពេញ ៖ ក្រុមជនដៃស្អិតម្នាក់ក្នុងចំណោមបក្ខពួក២នាក់ ត្រូវបានកម្លាំងនគរបាលប៉ុស្តិ៍បឹងកេងកងទី១ ធ្វើការចាប់ឃាត់ខ្លួន ក្រោយពីពួកគេបានធ្វើសកម្មភាពឆក់យកទូរស័ព្ទដៃម៉ាក Iphone 6plus មួយគ្រឿងពីនារីវ័យក្មេងម្នាក់បានហើយនាំគ្នាព្យាយាមជិះម៉ូតូរត់អស់សាំង ត្រូវបានម្ចាស់តាមទាន់ចាប់ប្រគល់ឱ្យកម្លាំងមានសម្ថកិច្ច។ ហេតុការណ៍នេះបានកើតឡើងកាលពីវេលាម៉ោង ២រសៀល ថ្ងៃទី ០៧ ខែមិថុនា ឆ្នាំ២០១៧នេះ ស្ថិតនៅខាងមុខផ្ទះលេខ២៦ ផ្លូវលេខ២៨២ ភូមិ៣ ក្នុងសង្កាត់បឹងកេងកងទី១ ខណ្ឌចំការមន។
តាមប្រភពព័ត៌មានពីនគរបាលបានប្រាប់ឱ្យដឹងថា យុវជនជាជនសង្ស័យដែលបានឃាត់ខ្លួនមានឈ្មោះ ដួង សុខហួរ អាយុ១៦ឆ្នាំ មុខរបរបាញ់ថ្នាំតុ ទូ ស្នាក់នៅផ្ទះជួលគ្មានលេខ ផ្លូវលេខ ២៣០ ក្នុងសង្កាត់បឹងសាឡាង ខណ្ឌទួលគោក ដកហូតបានម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាកលេខសៀមរាប១B-៧០៩២ មួយគ្រឿងផងដែរ។ ចំណែកឯនារីរងគ្រោះមានឈ្មោះ ប៉ាង សុធារ៉ា អាយុ២២ឆ្នាំ ជាបបុគ្គលិករបស់ក្រុមហ៊ុនអចលនទ្រព្យមួយ មានទីលំនៅក្នុងសង្កាត់បឹងទំពុន ខណ្ឌមានជ័យ។ មុនពេលកើតហេតុ នារីរងគ្រោះបានជិះម៉ូតូមួយគ្រឿងជាមួយនឹងបុរសជាអ្នកធ្វើការជាមួយគ្នាម្នាក់ លុះមកដល់ចំណុចកើតហេតុខាងលើ បុរសម្នាក់ដែលឌុបនាងនោះបានដកយកទូរស័ព្ទម៉ាក Iphone 6plus មួយគ្រឿងយកមកនិយាយរួចក៏ហុចឲ្យនាងដែលអង្គុយនៅខាងក្រោយជួយកាន់ បានបន្តិចក៏ស្រាប់តែលេចមុខក្រុមជនសង្ស័យ២នាក់ជិះម៉ូតូមួយគ្រឿងមកក្បែរ និងឆក់យកទូរស័ព្ទពីដៃនាង និងនាំគ្នាជិះម៉ូតូរត់គេចតែម្តង។
ពេលនោះ ពួកនាងក៏បាននាំគ្នាជិះម៉ូតូដេញតាមពីក្រោយដោយស្រែកថា (ចោៗ…)រហូត ក៏ស្រាប់តែម៉ូតូរបស់ពួកគេអស់សាំងព្យាយាមអូសរត់ក៏ត្រូវពួកនាងស្រែកឲ្យគេជួយដេញចាប់បានម្នាក់ និងម៉ូតូមួយគ្រឿង និងប្រគល់ឲ្យកម្លាំងមានសម្ថកិច្ចមូលដ្ឋានតែម្តង ចំណែកបក្ខពួកម្នាក់ទៀតយកទូរស័ព្ទរត់គេចខ្លួនបាត់ស្រមោលតែម្តង។ ក្រោយពេលកើតហេតុ បុរស និងនារីរងគ្រោះក៏បាននាំគ្នាដាក់ពាក្យបណ្តឹងនៅនគរបាលប៉ុស្តិ៍បឹងកេងកងទី១ ដើម្បីឲ្យជួយស្រាវជ្រាវរកចាប់បក្ខពួកដែលនៅសេសសល់ និងរកទូរស័ព្ទមកវិញ ចំណែកយុវជនសង្ស័យម្នាក់ដែលបានឃាត់ខ្លួនត្រូវបានបញ្ជូនទៅកាន់អធិការដ្ឋាននគរបាលខណ្ឌចំការមន ដើម្បីចាត់ការទៅតាមផ្លូវច្បាប់ជាបន្តទៅទៀត៕
ចែករំលែកព័តមាននេះ