ខេត្តប៉ៃលិន ៖ រហូតមកដល់ថ្ងៃទី០៧ ខែមិថុនា ឆ្នាំ២០១៧ នេះ ប្រជាពលរដ្ឋជាច្រើនគ្រួសាររស់នៅតាមបណ្តោយដងស្ទឹងបយ៉ាខា ស្ថិតនៅភូមិបហ៊ុយជើង បហ៊ុយត្បូង ភូមិបតាំងស៊ូ ភូមិបយ៉ាខា អូរច្រាលិច សង្កាត់បយ៉ខា សង្កាត់បយ៉ខា និងភូមិផ្សេងៗមួយចំនួនទៀត កំពុងតែជួបប្រទះបញ្ហាប្រឈមនឹងការខ្វះខាតទឹកប្រើប្រាស់ ខណៈអ្នកខ្លះបានទឹកភ្លៀងសម្រាប់ប្រើ និងខ្លះទៀតទិញទឹកឈ្មួញផងដែរ ។
ប្រភពពីប្រជាពលរដ្ឋឱ្យដឹងថា អស់រយៈពេលជាយូរថ្ងៃខែមកហើយដែលទឹកស្ទឹងបយ៉ាខាទទួលរងការល្អក់កករ ដោយសារតែអាជ្ញាធររៀបចំឈូសឆាយធ្វើផ្លូវក្រវ៉ាត់ព្រំដែន លុះភ្លៀងធ្លាក់ជោកជាំក៏ហូរកម្ទេចដីចូលទៅក្នុងស្ទឹង បណ្តាលឱ្យល្អក់កករខាប់ពេញស្ទឹង សូម្បីតែដងយកទៅបោកខោអាវ ឬងូតក៏អត់កើតនោះដែរ ។ អស់រយៈពេលជាង២ខែហើយដែលទឹកស្ទឹងប្រែក្លាយទៅជាបែបនេះ ជាពិសេសឱ្យតែភ្លៀងធ្លាក់ គឺហូរកម្ទេចដីយ៉ាងខាប់ពេញ តែម្តង ។ ពេលទឹកស្ទឹងប្រើបមិនកើត ពួកគាត់ត្រូវចំណាយលុយដើម្បីទិញទឹកពីឈ្មួញ ដោយ១រថយន្តគេលក់ចាប់ពី២ម៉ឺនទៅ៣ម៉ឺនរៀល ហើយជួនកាលមានភ្លៀងធ្លាក់មកនាំគ្នាត្រងទឹកទុកប្រើបានរួចមួយគ្រាផងដែរ ។ លើសពីនេះទឹកស្ទឹងបយ៉ាខាជាប្រភពទឹកដ៏សំខាន់សម្រាប់ពលរដ្ឋ ដូចជាត្រូវដងទៅស្រោចដំណាំ ងូត ដាំបាយ ហើយអ្នកខ្លះទៀតយកទៅចំរុះផឹកជួបជុំគ្រួសារ លុះក្លាយទៅជាបែបនេះម្នាក់ៗមានការលំបាកក្នុងការរស់នៅយ៉ាងខ្លាំង ។
ពាក់ព័ន្ធទៅនឹងបញ្ហានេះលោក ឡុង បៀ មេភូមិបតាំងស៊ូឱ្យដឹងថា ទឹកស្ទឹងបយ៉ាខា បានប្រែក្លាយទៅជាល្អក់កករឡើងវិញ កាលពីជាង២ខែមកហើយ ដោយធ្វើឱ្យប៉ះពាល់ដល់ពលរដ្ឋរស់នៅតាមដងស្ទឹងនេះពី៨០ទៅ៩០ភាគរយឯណោះ ។ ដោយម្នាក់ៗអាងតែមានទឹកស្ទឹងសម្រាប់ផ្គត់ផ្គង់ជីវភាពព ទើបភាគច្រើនមិនបានតភ្ជាប់ប្រព័ន្ធទឹកស្អាតនោះឡើយ ព្រោះត្រូវចំណាយថវិកាបង់សេវាតភ្ជាប់ និងបង់ថ្លៃប្រើប្រាស់ប្រចាំថ្ងៃទៀត ។ តែក្រោយមកខណៈអាជ្ញាធរធ្វើផ្លូវក្រវ៉ាត់ព្រំដែនរវាងកម្ពុជា-ថៃ ទើបពេលធ្លាក់ភ្លៀងបណ្តាលឱ្យកម្ទេចដីហូរចូលទៅក្នុងស្ទឹងប្រែក្លាយទៅជាល្អក់កករបែបនេះ លោកក៏មិនដឹងធ្វើយ៉ាងណា ដើម្បីដោះស្រាយដែរ មានតែរង់ចាំរហូតដល់ការធ្វើផ្លូវរួចរាល់នោះប្រហែលជាទឹកស្ទឹងថ្លាឡើងវិញ ។
ចែករំលែកព័តមាននេះ