រាជធានីភ្នំពេញ ៖ ទីផ្សារកសិផលកម្ពុជាគ្រប់ប្រភេទតែងតែជួបបញ្ហាប្រឈមនៅពេលដល់រដូវប្រមូលផលម្ដងៗ ឈ្មួញតែងបន្ថោកតម្លៃ ឬគ្មានទីផ្សារជាដើម ដែលបញ្ហានេះ ប្រជាកសិករទូទាំងប្រទេសច្រើនតែសួរទៅក្រសួងកសិកម្ម តែតាមពិត វាជាបន្ទុករបស់ក្រសួងពាណិជ្ជកម្ម ។ នេះបើតាមមន្ត្រីអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ ។
លោកបណ្ឌិត ហ៊ាន វណ្ណហន អគ្គនាយកដ្ឋានកសិកម្មនៃក្រសួងកសិកម្ម បានឱ្យដឹងតាមទូរស័ព្ទនៅថ្ងៃទី៦ មិថុនា ថា ក្រសួងកសិកម្មខិតខំផលិតឲ្យបានច្រើន និងមានគុណភាព ធ្វើយ៉ាងណា ឆ្លើយតបនឹងតម្រូវការទីផ្សារ ។ ចំណែកការរកទីផ្សារ និងតម្លៃឡើងចុះយ៉ាងណានោះ គឺក្រសួងពាណិជ្ជកម្មជាអ្នកទទួលខុសត្រូវ។
លោកបន្ដថា ៖ « ក្រសួងកសិកម្មខិតខំធ្វើយ៉ាងម៉េចជំរុញការផលិតឱ្យបានច្រើន ហើយស្របតាមលក្ខខណ្ឌតម្រូវនៅលើទីផ្សារ និងមានភារកិច្ចបើករបាំងអនាម័យ និងភូតគាមអនាម័យ។ រឿងតម្លៃឡើងចុះ ឬលក់នៅទីណា គួរតែសួរក្រសួងពាណិជ្ជកម្ម ។ ក្រសួងកសិកម្ម ខំប្រឹងផលិតឱ្យបានច្រើន និងមានគុណភាពអាចលក់បាន ដែលនេះជាការងាររបស់ក្រសួងកសិកម្ម » ។
ទាក់ទងនឹងការលើកឡើងនេះ កោះសន្តិភាពមិនអាចសុំការបំភ្លឺណាមួយបានទេពីមន្ត្រីអ្នកនាំពាក្យក្រសួងពាណិជ្ជកម្ម កាលពីរសៀលថ្ងៃទី៦ មិថុនា ដោយសារទូរស័ព្ទចូល តែអត់មានអ្នកលើក។
បើតាមលោកឧកញ៉ា សុង សារ៉ន អគ្គនាយកក្រុមហ៊ុនអេមរុ រាយស៍ ធ្លាប់មានប្រសាសន៍ថា ជាដំណោះស្រាយ កម្ពុជាត្រូវចេះរៀបចំ បែងចែកចំណែកទីផ្សារថា តើកម្ពុជាខ្លាំងខាងអី្វ ហើយពិភពលោកគេត្រូវការអី្វ និងខ្វះខាតអី្វខ្លះ ?
លោកឧកញ៉ាបន្តថា ៖ « យើងត្រូវសិក្សាពីទីផ្សារនាំចេញ និងធ្វើផែនការក្នុងស្រុក ហើយដឹងពីទីផ្សារ ។ យើងត្រូវរៀបចំគោលនយោបាយមួយដែលមានស្ថាប័នអនុវត្តជាប្រចាំថ្ងៃច្បាស់លាស់ មានការប្រជុំ ការដឹកនាំ ការអនុវត្តផែនការត្រឹមត្រូវ និងត្រូវមានកញ្ចប់ថវិកាដើម្បីឱ្យដំណើរការបាន ។ រាល់ថ្ងៃនេះ អត់មានស្ថាប័នបែបនេះ វាជាការបរាជ័យគួរឱ្យអាម៉ាស់មួយសម្រាប់វិស័យកសិកម្មយើង » ។
លោក សោម យ៉ិន ប្រធានសមាគមដំឡូងមីស្រុកម៉ាឡៃ ធ្លាប់លើកឡើងថា ដើម្បីជួយកសិករបាន ទាល់តែផ្នែកនីមួយៗរបស់ក្រសួង ធ្វើការស្រាវជ្រាវឱ្យលម្អិត ។ ខាងកសិកម្មត្រូវពិនិត្យមើលដី កែប្រែដីយ៉ាងម៉េច ប្រើជីយ៉ាងម៉េច ដីខ្សាច់ប្រើជីនិងពូជអ្វី ឯដីខ្មៅឬក្រហមត្រូវប្រើពូជអ្វី ។
លោកបន្តថា ៖ « យើងត្រូវរៀបចំគោលនយោបាយមួយ មានលុយសម្រាប់អាជីវករដែលប្រមូលទិញ ឱ្យខ្ចីគិតការប្រាក់ល្មម និងដាក់ឱ្យកសិករខ្ចីមានការប្រាក់ទាប ។ លើសពីនេះ ពេលកសិករលក់កសិផល គួររើសទីផ្សារសម្រាប់ពួកគាត់ » ៕
ចែករំលែកព័តមាននេះ