ខេត្តបាត់ដំបង ៖ សេចក្តីរាយការណ៍បឋមឱ្យដឹងថា កាលពីវេលាម៉ោង០២ និង៤០នាទីចូលថ្ងៃទី០៧ មិថុនា នេះ ស្ថិតត្រង់ចំណុចលើផ្លូវជាតិលេខ៥៧ ក្នុងភូមិកំប៉ូវ ឃុំភ្នំសំពៅ ស្រុកបាណន់ មានករណីគ្រោះថ្នាក់ចរាចរមួយយ៉ាងរន្ធត់ រវាងរថយន្តចំណុះ៥តោនបុកជាមួយម៉ូតូសណ្តោងរ៉ឺម៉ក ខណៈកំពុងធ្វើដំណើរបញ្ច្រាសទិសគ្នាពីកើត ទៅលិច ។
យោងតាមរបាយការណ៍ថា រថយន្តខាងលើម៉ាកហ៊ីយ៉ាន់ដាយ ពណ៌.ស 5តោន ពាក់ស្លាកលេខភ្នំពេញ 3A-1495 បានក្រឡាប់នៅកន្លែងកើតហេតុ ។ អ្នកបើកបររថយន្តមិនស្គាល់អត្តសញ្ញាណទេបានរត់បាត់ ដោយបើករេចង្កូតចូលទៅខាងស្ដាំបុកម៉ូតូសណ្តោង
រ៉ឺម៉កមួយគ្រឿង ម៉ាកហុងដាឌ្រីមC125 ពណ៌ខ្មៅ ពាក់ស្លាកលេខបាត់ដំបង1G-8503 បើកដោយឈ្មោះមិត្ត សាមឿន ភេទប្រុស អាយុ២៧ឆ្នាំ (ស្លាប់ទាំងមានពាក់មួកសុវត្ថិភាព) មានទីលំនៅភូមិក្រពើកើត ឃុំភ្នំសំពៅ ស្រុកបាណន់ និងអ្នកដំណើរម្នាក់ទៀត ត្រូវជាប្រពន្ធឈ្មោះហេង នាង អាយុ២៥ឆ្នាំ (របួសធ្ងន់) បញ្ចូនទៅមន្ទីរពេទ្យខេត្តបាត់ដំបង ។
ប្រភពបន្តថា បច្ចុប្បន្នទាំងរថយន្តនិងម៉ូតូ ត្រូវបានកម្លាំងជំនាញយករក្សាទុកនៅការរិយាល័យចរាចរផ្លូវគោកខេត្ត ដើម្បីរង់ចាំការដោះស្រាយតាមច្បាប់ ។
ចែករំលែកព័តមាននេះ