ចាត់ទុកថាជាធម្មជាតិអច្ឆរិយមួយ គឺផ្កា«Titan Arum» ឬ«ផ្កាខ្មោច»រីកស្រស់ប្រណិតព្រមគ្នាចំនួន២ក្នុងសួនព្រៃព្រឹក្សានៅស៊ីកាហ្គោ សហរដ្ឋអាមេរិក ។ ផ្កាខ្មោចទាក់ទាញអ្នកទេសចរច្រើនទៅទស្សនាទោះបីជាវាមានក្លិនស្អុយបំផុតនៅលើពិភពលោកក៏ដោយ ។
កាលពីពេល ថ្មីៗកន្លងមកអ្នកទេសចរជាច្រើនពាន់នាក់បានទៅទស្សនាផ្កាខ្មោច មានកម្ពស់ប្រហែល២ម៉ែត្រ ។
ផ្កា«Titan Arum» គេច្រើនប្រទះឃើញនៅក្នុងដែនធម្មជាតិនៃកោះស៊ូម៉ាត្រា ប្រទេសឥណ្ឌូណេស៊ី ។ ទោះបីជាយ៉ាងណាក្តីវាអាចនឹងហិនហោចដោយការកាប់បំផ្លាញព្រៃឈើ ដូច្នេះហើយទើបសួនព្រៃព្រឹក្សានៅលើពិភពលោកយកចិត្តទុកដាក់ថែរក្សាពូជវាទុក ។
ផ្កាខ្មោចចេញផ្កាតែម្តងប៉ុណ្ណោះក្នុងរយៈពេល១០ឆ្នាំ និងមានពេលរីកត្រចង់ព្រមគ្នាតែ១ថ្ងៃ ។ លោកGreg Muellerប្រធានក្រុមអ្នកវិទ្យា សាស្ត្រប្រចាំឧទ្យានព្រៃព្រឹក្សាសុីកាហ្គោ និយាយថា«ការឃើញផ្កាខ្មោចរីកព្រមគ្នាចំនួន២នេះគឺជាឱកាសដ៏កម្របំផុតនៅលើពិភពលោក» ។
ឧទ្យានព្រៃព្រឹក្សាស៊ីកាហ្គោដបើកឱ្យទស្សនាផ្កាខ្មោចរហូតដល់ថ្ងៃទី៨ មិថុនា ២០១៧ ដោយរំពឹងថាមានអ្នកទេសចរ និងអ្នកស្រឡាញ់ផ្កាធ្វើដំណើរទៅទស្សនាជាច្រើនពាន់នាក់ ទោះបីជាវាចាប់ផ្តើម ស្វិតស្រពោនក៏ដោយ ៕
ចែករំលែកព័តមាននេះ