តម្លៃប្រេងឆៅបានធ្លាក់ចុះច្រើនជាង១%ទៅទៀតក្នុងថ្ងៃសុក្រ ដែលជាការធ្លាក់ចុះជាប់ៗគ្នាអស់ពីរសប្តាហ៍មកហើយ ព្រោះតែមានការព្រួយបារម្ភថា ការសម្រេចចិត្តរបស់លោកប្រធានាធិបតី ដូណាល់ ត្រាំ ដកប្រទេសចេញពីកិច្ចព្រមព្រៀងបរិយាកាសអន្តរជាតិ នឹងជំរុញឲ្យផលិតកម្មក្នុងស្រុក បង្កឲ្យការផ្គត់ផ្គង់លើសលប់នៅតែកើតមាន ។
អ្នកវិភាគទីផ្សារព្រួយបារម្ភពីការកើនឡើងនៃផលិតកម្មប្រេងឆៅក្នុងសហរដ្ឋអាមេរិក ដែលប៉ះពាល់ដល់ការខិតខំប្រឹងប្រែងរបស់ OPEC ក្នុងការកាត់បន្ថយការផ្គត់ផ្គង់ប្រេងដ៏ច្រើនលើសលប់លើទីផ្សារ ។
យោងតាមទិន្នន័យរបស់ក្រុមហ៊ុន Baker Hughes ឲ្យដឹងថា ក្រុមហ៊ុនផលិតប្រេងសហរដ្ឋអាមេរិកបានបន្ថែមតំបន់ប្រេងចំនួន១១ ទៀតក្នុងសប្តាហ៍នេះ ។
ការដកខ្លួនចេញពីកិច្ចព្រមព្រៀងទីក្រុងប៉ារីស ជាកិច្ចព្រមព្រៀងអន្តរជាតិក្នុងឆ្នាំ២០១៥ ដើម្បីដោះស្រាយបញ្ហាបម្រែបម្រួលបរិយាកាស បានបង្កឲ្យមានការរិះគន់ពីសម្ព័ន្ធមិត្តរបស់សហរដ្ឋអាមេរិក និងមនុស្សជាច្រើនក្នុងវិស័យថាមពល ហើយក៏បង្កក្តីបារម្ភថា ផលិតកម្មប្រេងរបស់អាមេរិកអាចនឹងកើនឡើងបន្ថែមទៀត ។
លោក Stewart Glickman អ្នកវិភាគផ្នែកថាមពលក្នុង CFRA និយាយថា ៖ « លោកត្រាំ ដូចជាកំពុងតែលុបបំបាត់រាល់ឧបសគ្គ ដែលអាចហាមឃាត់ដល់ការលូតលាស់នៃប្រេងឆៅ ឬឧស្ម័នធម្មជាតិ » ។
កាលពីសប្តាហ៍មុន ផលិតកម្មប្រេងឆៅរបស់សហរដ្ឋអាមេរិកបានកើនឡើងជិត៥០ម៉ឺនធុងក្នុងមួយថ្ងៃបើធៀបនឹងឆ្នាំមុន និងកើនដល់៩,៣៤លានធុងក្នុងមួយថ្ងៃ ជាកម្រិតខ្ពស់ជាងគេតាំងពីខែសីហា ឆ្នាំ២០១៥មក ។
ផលិតកម្មនៅសហរដ្ឋអាមេរិកត្រូវបានគិតថា នឹងបន្តកើនឡើង ខណៈរដ្ឋបាលព័ត៌មានថាមពលរបស់សហរដ្ឋអាមេរិកព្យាករថា ផលិតកម្មប្រចាំឆ្នាំរបស់ប្រទេសនេះ អាចនឹងស្មើប្រមាណ១០លានធុងក្នុងមួយថ្ងៃនាឆ្នាំក្រោយ ៕
ចែករំលែកព័តមាននេះ