រាជធានីភ្នំពេញ ៖ ស្ត្រីម្នាក់ដែលរស់នៅមិនចុះសំរុងនឹងគ្នា ព្រមទាំងនៅបែកគ្នាជាមួយប្តី ត្រូវបានជាប់ចោទថា លួចនាំប្រុសសហាយចូលដល់បន្ទប់រស់នៅរបស់ខ្លួន ស្រាប់តែប្តីមកទាន់ ខ្ទប់ទ្វារជាប់ចងខ្សែពីក្រៅ ហើយបានប្តឹងប៉ូលិសឱ្យជួយអន្តរាគមន៍ និងបង្កឱ្យភ្ញាក់ផ្អើលកាលពីវេលាម៉ោង៤ទៀបភ្លឺ ថ្ងៃទី៤ មិថុនា ស្ថិតនៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ។
ស្ត្រីជាប់ចោទឈ្មោះ ហោ គន់ធឿន អាយុ៣០ឆ្នាំ ជាកម្មការិនីរោងចក្រកាត់ដេរ ស្នាក់នៅបន្ទប់ជួលភូមិព្រៃទាសង្កាត់ចោមចៅ ខណ្ឌពោធិ៍សែនជ័យ មានស្រុកកំណើតភូមិព្រៃឥដ្ឋ ឃុំពោធិ៍អង្ក្រង ស្រុកបសេដ្ឋខេត្តកំពង់ស្ពឺ។ ចំណែកបុរសជាប្តីមានឈ្មោះ អែត ដូយ អាយុ៤០ឆ្នាំ មុខរបរកសិករ ជាមនុស្សពិការជើងឆ្វេង ស្នាក់នៅភូមិប្រហារ ឃុំតាលោ ស្រុកបាកាន ខេត្តពោធិសាត់ មានស្រុកកំណើតនៅភូមិកោះម៉ាកប្រាំង ឃុំបឹងសាលាខាងជើង ស្រុកកំពង់ត្រាច ខេត្តកំពត ។
ចំណែកបុរសជាសហាយមានឈ្មោះ ម៉ាច ប៊ុនធឿន អាយុ៣៤ឆ្នាំ ជាកម្មករសំណង់ ស្នាក់នៅមិនពិតប្រាកដ គឺធ្វើការកន្លែងណាស្នាក់នៅកន្លែងនោះ បច្ចប្បន្នស្នាក់នៅការដ្ឋានសំណង់ សង្កាត់ចោមចៅ ខណ្ឌពោធិសែនជ័យ មានស្រុកកំណើត ភូមិពាម ឃុំរកាកោងទី១ ស្រុកមុខកំពូល ខេត្តកណ្តាល ។តាមការរៀបរាប់ពីបុរសឈ្មោះ អែត ដូយ ជាប្តីបានឱ្យដឹងថា ពួកគាត់បានរៀបការ ក្រាបក្បាលសំពះផ្ទឹមមុខមេបាចាស់ទុំជាមួយប្រពន្ធរូបនេះអស់រយៈពេល៨ឆ្នាំកន្លងមកហើយ និងមានកូនចំនួន៣នាក់ ស្លាប់២នាក់ នៅរស់កូនប្រុសម្នាក់នៅឯស្រុក ។
បុរសជាប្តីបន្តទៀតថា រហូតមកដល់អំឡុងឆ្នាំ២០១៥ បានរស់នៅដាច់ដោយឡែកពីគ្នា ព្រោះប្រពន្ធសុំមកធ្វើការងាររោងចក្រនៅរាជធានីភ្នំពេញ ។ ចំណែកគាត់ជាប្តីនៅមើលថែកូន និងផ្ទះនៅឯស្រុកកំណើត ហើយការរស់នៅសម្ព័ន្ធមេត្រីស្នេហារវាងប្តីនិងប្រពន្ធ ឈានទៅរកភាពសោះអង្គើយនឹងគ្នា ទើបឆ្ពោះទៅរកការបែកបាក់ រកាំរកូស មិនចុះសម្រុងគ្នាទេ ហើយប្រពន្ធរកតែលេសសុំលែងលះ តែគាត់ជាប្តីមិនព្រម ក៏អូសបន្លាយពេលវេលា២ឆ្នាំកន្លងផុត ទីបំផុតគំនិតចង់លែងលះក៏បានបែកធ្លាយ។ ប្តីរៀបរាប់ទៀតថា បន្ទាប់ពីប្អូនថ្លៃប្រុសដែលមានបន្ទប់ជួលក្បែរប្រពន្ធគាត់បានប្រាប់ថា ប្រពន្ធគាត់មានប្រុសស្នេហ៍ថ្មី និងមកដេកជាមួយគ្នាដល់ក្នុងបន្ទប់ជួល ដោយសារការតូចចិត្តនិងប្រពន្ធផិតក្បត់ដូច្នេះ គាត់ក៏បានជួលរថយន្តតាក់ស៊ី ធ្វើដំណើរពីស្រុកតាមរកប្រពន្ធដល់ផ្ទះស្នាក់នៅ។
បុរសជាប្តីបន្តទៀតថា គ្រាន់តែមកដល់ផ្ទះជួលក្នុងភូមិព្រៃទា សង្កាត់ចោមចៅភ្លាម ក៏បានដឹងថា ប្រពន្ធនាំសហាយមកដេកដល់ក្នុងបន្ទប់មែន ព្រមទាំងឃើញជាក់នឹងភ្នែកថា ពួកគេពិតជាបានងប់ងុលនិងកិលេសតណ្ហា គាត់ក្តៅចិត្តបានចងសោទ្វារពីខាងក្រៅ ហើយទៅប្តឹងប៉ូលិសសុំឱ្យជួយអន្តរាគមន៍ ចាប់ឃាត់ប្រពន្ធនិងសហាយ នាំខ្លួនទៅសាកសួរនៅប៉ុស្តិ៍នគរបាលចោមចៅ ។
ចំណែកស្ត្រីជាភរិយាវិញបានឱ្យដឹងថា ខ្លួនរស់នៅមិនចុះសម្រុងគ្នាជាមួយប្តីអស់រយៈពេល២ឆ្នាំមកហើយ ការរស់នៅដាច់ដោយឡែកពីគ្នា ទោះជាហៅប្តីឱ្យចូលខ្លួននិយាយគ្នាដោះស្រាយរឿងលែងលះ នៅចំពោះមុខអាជ្ញាធរ ភូមិឃុំឯស្រុក ក៏ប្តីមិនសុខចិត្តផ្តិតលែងលះដែរ ។ ស្ត្រីដដែលបន្តទៀតថា ស្នេហាជាមួយប្រុសថ្មីផ្តើមចេញពីការលេងឆ្លងឆ្លើយ ឬ Chart ជាមួយបុរសឈ្មោះម៉ាច ប៊ុនធឿន ជាកម្មករសំណង់ ទីបំផុតក៏លង់ស្នេហ៍ រហូតប្រគល់បេះដូងឱ្យបុរសខាងលើ រួមមេត្រីអស់រយៈពេលជាង៤ខែកន្លងមកហើយ ខណៈដែលខឹងប្តីមិនផ្តិតមេដៃលែងលះ ទើបសម្រេចចិត្តបង្កើតស្នេហ៍ថ្មី ។
នៅយប់ថ្ងៃទី៣ មិថុនា ឆក់ឱកាស អ្នកស្នាក់នៅតាមបន្ទប់ជួលចាកចេញទៅស្រុក ចូលរួមបោះឆ្នោតអស់ ស្ងាត់តាមបន្ទប់ជួលនាងក៏ហៅប្រុសស្នេហ៍មកដេកកំដរ ស្រាប់តែនៅវេលាម៉ោងខាងលើប្តីមកទាន់ស្រែកផ្អើល ប្តឹងប៉ូលិសឃាត់នាំចូលប៉ុស្តិ៍ប៉ូលីស ។រីឯប្រុសសហាយវិញបានឱ្យដឹងថា គាត់ជាបុរសពោះម៉ាយ មានកូនប្រុស២នាក់ ប្រពន្ធលែងលះគ្នាអស់រយៈពេលជាង៤ឆ្នាំមកហើយ សព្វថ្ងៃដើរធ្វើការងារជាកម្មករសំណង់ ហើយខ្លួនបានលេងហ្វេសប៊ុក ស្គាល់សុំស្នេហ៍សុំស្រឡាញ់នាង ហើយក៏ដឹងដែរថា ស្រីស្នេហ៍ ខ្លួនមិនទាន់លែងលះប្តីដាច់ស្រេច តែឃើញអស់រយៈពេលច្រើនឆ្នាំហើយ នាងនៅតែម្នាក់ឯង ក៏ដាច់ចិត្តរើសយក ស្រវាឱបយកនាងធ្វើជាប្រពន្ធទាំងបំពានចិត្តប្រុសដូចគ្នាតែម្តង ។
នៅក្នុងប៉ុស្តិ៍នគរបាល ភាគីទាំង៣ លើកឡើងអំណះអំណាងហេតុផលរៀងខ្លួន ភាគីខាងប្រពន្ធប្រកាន់នូវជំហរមួយ មិនយកប្តីដែលមិនចេះផ្តល់សេចក្តីសុខឱ្យនាងផងឈប់យកហើយ ស៊ូស្រវាចាប់យកបុរសក្រោយនេះវិញ ទោះជាកម្មករសំណង់មែនពិត តែចេះថ្មមចិត្ត ផ្តល់ភាពស្រណុកកាយ សប្បាយអារម្មណ៍ជាងលោកប្តី ។ ចំណែកជំហរភាគីខាងប្តីវិញ ខ្លួនសុខចិត្តលែងលះ ព្រោះអ្វីដែលឃើញជាក់នឹងភ្នែក ប្រុសផ្សេងមកបៀតបៀនលើរាងកាយប្រពន្ធខ្លួនខ្ទេចខ្ទីអស់ហើយនោះ គឺសុំតែម្យ៉ាង យកលុយជាង៦ពាន់ដុល្លារ ដែលប្រពន្ធយកមក សុំទាមទារយកមកវិញ ទុកសម្រាប់ចិញ្ចឹមកូនទើបរួចខ្លួន ជាថ្នូរប្រគល់ប្រពន្ធទៅឱ្យអ្នកផ្សេង ។ ចំណែកប្រុសស្នេហ៍ បានស្តែងឱ្យឃើញថា អ្វីជាទង្វើរដែលខ្លួនបានប្រព្រឹត្ត ខ្លួនជាអ្នកទទួលខុសត្រូវ ហើយស្ត្រីខាងលើក៏ប្តូរផ្តាច់សុខចិត្តយកគ្នាជាប្តីប្រពន្ធដែរ ។
ចំណែកនគរបាលបានឱ្យដឹងថាករណីខាងលើ ថ្វីបើក្រោយផ្ទុះរឿងប្រពន្ធផិតលួចមានសហាយប្តឹងផ្តល់គ្នា ទោះជាភាគីខាងប្តីទាមទារយកលុយជាង៦ពាន់ដុល្លា ជាថ្នូរនឹងប្រគល់ប្រពន្ធទៅឱ្យអ្នកផ្សេង បញ្ចប់រឿងក៏ដោយនៅតែដោះស្រាយមិនចេញ ខណៈដែលភាគីខាងស្រីគ្មានលុយប្រគល់ឱ្យប្តីតាមការទាមទារទេ មានតែដោះគ្រឿងអល័ង្កាអស់ពីខ្លួន សរុបជាទឹកប្រាក់ជាង២០០ដុល្លារ នៅតែមិនគ្រប់ ទើបនិយាយមិនត្រូវគ្នា ។ ទីបំផុតនគរបាលកសាងសំណុំរឿង បញ្ជូនខ្លួនប្រពន្ធ និងសហាយទៅផ្នែកជំនាញអធិការដ្ឋានខណ្ឌពោធិសែនជ័យ ដើម្បីដោះស្រាយបន្ត ៕
ចែករំលែកព័តមាននេះ