ខេត្តព្រះសីហនុ ៖ នៅព្រឹកថ្ងៃទី៤ ខែមិថុនា ឆ្នាំ២០១៧ លោក យន្ត មីន អភិបាលខេត្តព្រះសីហនុនិងភរិយា និងលោកឧត្តសេនីយ៍ទោ ជួន ណារិន្ទ ស្នងការនគរបាលខេត្តបានអញ្ជើញចូករួមបំពេញកាតព្វកិច្ចក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ ឆ្នាំ២០១៧ នៅវិទ្យាល័យក្រុងព្រះសីហនុ ស្ថិតក្នុងសង្កាត់លេខ៣ ក្រុង-ខេត្តព្រះសីហនុ ។
លោកឧត្តមសេនីយ៍ទោ ជួន ណារិន្ទ មានប្រសាសន៍ថា នៅព្រឹកថ្ងៃទី៤ ខែមិថុនា ឆ្នាំ២០១៧ សម្រាប់ដំណើរការងារបោះឆ្នោតជ្រើសរើសក្រុមប្រឹក្សាឃុំ-សង្កាត់នៅខេត្តព្រះសីហនុទាំង២៨០ការិយាល័យបានបើកទ្វារចាប់ពីម៉ោង៧ព្រឹក និងបានដំណើរការល្អក៏ប៉ុន្តែមានការិយាល័យខ្លះមានការយឺតយ៉ាវតិចតួចឈានដល់ម៉ោង៧និង១៥នាទី ហើយមកដល់ពេលម៉ោងប្រមាណ១១ថ្ងៃត្រង់ដំណើរការសន្តិសុខសណ្តាប់ធ្នាប់ល្អហើយប្រជាពលរដ្ឋបានអញ្ជើញមកបោះឆ្នោតយ៉ាងគក្រឹកគគ្រេងនៅតាមការិយាល័យបោះឆ្នោតទាំង២៨០នៅខេត្តព្រះសីហនុ ដោយមិនមានបញ្ហាអសន្តិសុខអ្វីកើតឡើងឡើយ ។ ជាមួយគ្នាខាងលើនេះផងដែរលោក យន្ត មីន អភិបាលខេត្តព្រះសីហនុបានអំពាវនាវសូមឱ្យបងប្អូនប្រជាពលរដ្ឋអញ្ជើញចូលរួមបោះឆ្នោតឱ្យបានច្រើនគ្រប់ៗគ្នាក្នុងការបញ្ចេញនូវសិទ្ធិរបស់យើងក្នុងនាមជាប្រជាពលរដ្ឋម្នាក់ដែលចង់បានថ្នាក់ដឹកនាំនៅតាមមូលដ្ឋានដែលស្គាល់ច្បាស់ពីការលំបាក ពីសុខនិងទុក្ខ របស់ប្រជាពលរដ្ឋនៅតាមមូលដ្ឋាននីមួយៗ បានល្អ និងមានភាពទទួលខុសត្រូវខ្ពស់ ។
លោក ហួត ផុន បានឱ្យដឹងថា ក្នុងការបោះឆ្នោតជ្រើសរើសក្រុមប្រឹក្សានៅខេត្តព្រះសីហនុមានភ្នាក់ងារសង្កេតការរបស់គណបក្សនយោបាយចំនួន១.៥១៦នាក់ ស្រី៣៤៦នាក់ បានចុះឈ្មោះជាអ្នកសង្កេតការណ៍បោះឆ្នោត និងរាប់សន្លឹកឆ្នោតនៅខេត្តព្រះសីហនុ ៕
ចែករំលែកព័តមាននេះ