រាជធានីភ្នំពេញ ៖ ក្នុងចំណោមកម្ចីឥណទានសម្រាប់ប្រើប្រាស់ ការស្នើសុំកម្ចីអចលនទ្រព្យមានសន្ទុះខ្លាំងជាងគេ ក្នុងនោះតំបន់ទំនាបកណ្ដាល និងខ្ពង់រាបមានកំណើនខ្ពស់ ។ នេះបើយោងតាមរបាយការណ៍ស្ដីពីសន្ទស្សន៍ឥណទានប្រើប្រាស់ផ្ទាល់ខ្លួនចុងក្រោយរបស់ការិយាល័យឥណទានកម្ពុជា ហៅកាត់ថា CBC ។
របាយការណ៍ដដែលបង្ហាញថា ក្នុងត្រីមាសទី១ឆ្នាំនេះ ចំនួននៃការស្នើសុំឥណទានបានបន្ដកើនឡើងរហូតដល់២៩%សមាមាត្រនឹងកំណើនទំហំឥណទានស្នើសុំប្រមាណ៣០% ។
កំណើននេះអាស្រ័យដោយកត្តាមួយចំនួនរួមមាន កម្ចីអចលនទ្រព្យកើនឡើង៤៧% និងហិរញ្ញវត្ថុផ្ទាល់ខ្លួនកើនឡើង២៨% ។ តំបន់ទំនាបកណ្ដាលកើនឡើងខ្លាំងទៅលើកម្ចីអចលនទ្រព្យ ដោយកើនឡើង៨៧% បើធៀបនឹងត្រីមាសទី៤ឆ្នាំមុន មានកំណើន១៩% ។ ដោយឡែក តំបន់ខ្ពង់រាបមានកំណើន៤៩% បើធៀបនឹងត្រីមាសទី៤ឆ្នាំមុន មានត្រឹមតែ៩%ប៉ុណ្ណោះ។
លោក អឿ សុធារ័ត្ន ប្រធាននាយកប្រតិបត្តិស្ដីទីរបស់ការិយាល័យឥណទានកម្ពុជា មានប្រសាសន៍ថា ៖ « ការស្នើសុំឥណទានបានត្រឡប់មកធម្មតាវិញ បើធៀបនឹងត្រីមាសទី១ឆ្នាំ២០១៦ បន្ទាប់ពីធ្លាក់ចុះក្នុងត្រីមាសទី៤ឆ្នាំមុន។ ក្នុងនោះចំនួនការស្នើសុំឥណទានកើនឡើង២៩% ហើយទំហំនៃការស្នើសុំឥណទានកើន៣០% ដែលគាំទ្រដោយកម្ចីអចលនទ្រព្យមានកំណើន៤៧%»។
ស្របជាមួយនេះដែរ ប្រធាននាយកប្រតិបត្តិធនាគារអេស៊ីលីដា បានឲ្យដឹងថា ការផ្ដល់ឥណទានក្នុងវិស័យលំនៅឋានក្នុងរយៈពេល៤ខែដើមឆ្នាំនេះ ធនាគារអេស៊ីលីដាបានបញ្ចេញប្រាក់៤០លានដុល្លារទៅដល់អតិថិជន ខណៈឆ្នាំ២០១៦ទាំងមូលមានចំនួន២១០លានដុល្លារអាមេរិក ។
លោក អិុន ចាន់នី ប្រធាននាយកប្រតិបត្តិធនាគារនេះ បានថ្លែងឲ្យដឹងតាមទូរស័ព្ទនាព្រឹកថ្ងៃទី២ មិថុនា ថា នៅដំណាច់ឆ្នាំមុន អេស៊ីលីដា បានផ្តល់ឥណទានទំហំទឹកប្រាក់២១០លានដុល្លារក្នុងវិស័យលំនៅឋាន ហើយក្នុងរយៈពេល៤ខែឆ្នាំនេះ ឥណទានអេស៊ីលីដាបានបញ្ចេញទឹកប្រាក់៤០លានដុល្លារអាមេរិក និងមានអតិថិជនក្នុងដៃសរុប៤៣,៣ម៉ឺននាក់ ដែលបាននិងកំពុងប្រើប្រាស់ឥណទានរបស់ធនាគារនេះ ។
យ៉ាងណាក៏ដោយ ការផ្ដល់ឥណទានក្នុងវិស័យនេះ ធនាគារត្រូវអនុវត្តទៅតាមលក្ខខណ្ឌផ្ដល់ឥណទានដើម្បីបង្ការហានិភ័យណាមួយដែលអាចកើតឡើង ។
លោកថា ៖ « ការផ្តល់ឥណទានរបស់យើងមិនមានការរឹតបន្តឹងនោះទេ ប៉ុន្តែយើងមិនផ្តល់ឥណទានសម្រាប់អ្នកទិញផ្ទះទុកលក់ឬជួលទេ ព្រោះប្រសិនជាពួកគេជួលមិនបាន ពួកគេប្រឈមនឹងបញ្ហាក្នុងការសងត្រឡប់ »។ លោកបន្តថា ៖ « ឥណទានរបស់អេស៊ីលីដា ផ្តោតតែលើអ្នកទិញលំនៅឋានយកមករស់នៅប៉ុណ្ណោះ» ។
លោក ច្រឹក សុខនីម អគ្គនាយកក្រុមហ៊ុនCentury21 Mekong បានមានប្រសាសន៍ថា ការប្រើប្រាស់ឥណទានក្នុងការទិញអចលនទ្រព្យ ពិសេសវិស័យលំនៅឋានបានកើនឡើងជាប្រចាំ ដោយសារលក្ខខណ្ឌនៃកម្ចីកាន់តែងាយស្រួល ហើយប្រជាជនកម្ពុជាមានភាពវ័យក្មេងច្រើន។ ហេតុនេះ នៅពេលពួកគេបង្កើតគ្រួសារ ឬបែកពីគ្រួសារ ក៏ត្រូវការលំនៅឋានថ្មីដែរ ហើយភាគច្រើនពុំមានលទ្ធភាពបង់លុយទិញផ្ទះទាំងស្រុងបានទេ ៕
ចែករំលែកព័តមាននេះ