ខេត្តត្បូងឃ្មុំ ៖ ដោយសារតែមានទឹកចិត្តសប្បុរសធម៌របស់អាណិកជនខ្មែរនៅសហរដ្ឋអាមេរិក រួមនឹងសាច់ញាតិក្រុមគ្រួសារជាច្រើននាក់នៅរាជធានីភ្នំពេញ បានបរិច្ចាគធានធនផ្ទាល់ខ្លួនជាច្រើនបានទិញសម្ភារជាច្រើន ក្នុងនោះមានសៀវភៅសរសេរ ប៊ិច ជ័រលុប បន្ទាត់ ទឹកបរិសុទ្ធ បាយប្រអប់ ថវិកាជាច្រើនចែកជូនដល់សិស្សានុសិស្ស សាលាបឋមសិក្សា ហ៊ុន សែន កោងកាង ចំនួន៦២៦នាក់ នៅភូមិកោងកាងទី១ ឃុំកោងកាង ស្រុកពញាក្រែក។ ដែលបានធ្វើឡើងនៅព្រឹកថ្ងៃទី១ មិថុនា ២០១៧ ចំថ្ងៃទិវាកុមារអន្តរជាតិគ្រានោះ សិស្សគ្រប់ៗគ្នាមានទឹកមុខសប្បាយរីករាយផងដែរ ។
លោក Kenny chang អាណិកជនខ្មែរនៅសហរដ្ឋអាមេរិកបានលើកឡើងថា រូបលោកពិតមានជាក្តីសប្បាយរីករាយដែលបានមកចូលរួមក្នុងកម្មវិធីចែកអំណោយមនុស្សធម៌ ដែលប្អូនតូចៗនៅទីនេះក្នុងពេលអនាគតនឹងក្លាយទៅជាទំពាំងស្នងឫស្សីរបស់ប្រទេសកម្ពុជា ។ ក្នុងនាមរូបលោកជាសិស្សម្នាក់បានយល់ថា ចំណេះវិជ្ជាពិតជាមានសារសំខាន់ណាស់ ព្រោះប្រៀបបាននឹងកូនសោសម្រាប់បើកទ្វារទៅរកភាពជោគជ័យ។ ហើយបើយើងចង់បានអ្វីមួយនោះនឹងរកឃើញនូវមធ្យោបាយជាច្រើនដែលអាចសម្រេចនូវគោលដៅរបស់យើងម្នាក់ៗផងដែរ ។
លោក មុត ស៊ីថេង នាយកសាលាបឋមសិក្សា ហ៊ុន សែន កោងកាង បានឲ្យដឹងដែរថា រូបលោកមានអារម្មណ៍សប្បាយរីករាយដោយអាណិកជនខ្មែរនៅសហរដ្ឋអាមេរិកបានយកអំណោយមកចែកជូនដល់សិស្សានុសិស្សនៅសាលារៀនរបស់លោក ដែលនេះជាលើកទី១ហើយ។ ប្រសិនបើមានអ្នកផ្សេងមានចិត្តដូចពួកគាត់ពិតជាល្អ ដែលបានមើលឃើញពីការលំបាករបស់សិស្ស ទាំងខ្មែរ និងអ៊ិស្លាមនៅព្រឹកថ្ងៃទី១ មិថុនា ២០១៧ ចាប់ពីថ្នាក់មត្តេយ្យដល់ថ្នាក់ទី៦ ដែលកន្លងមកការចែកបែបនេះមិនដែលមាននោះទេ ក្នុងនោះមានចែកបាយ សៀវភៅសរសេរ និងរបស់របរជាច្រើនទៀត ក្រៅពីនេះក៏បានផ្តល់នូវកំព្យូរទ័រយួរដៃ១គ្រឿងដល់រូបលោកផងដែរ ។ ក្នុងពេលដែលបានអំណោយមនុស្សធម៌នេះធ្វើឲ្យកូនសិស្សម្នាក់ៗសប្បាយរីករាយគ្រប់ៗគ្នា ហើយរូបលោកមានជំនឿថា នៅថ្ងៃក្រោយក្រុមគ្រួសារអាណិកជនខ្មែរនៅសហរដ្ឋអាមេរិក និងបន្តយកអំណោយមកចែកជូនបន្តទៀត ៕
ចែករំលែកព័តមាននេះ