ទីក្រុងហាណូយ ៖ ភ្នាក់ងារសារព័ត៌មានក្នុងទីក្រុងហាណូយរាយការណ៍ថា សហគ្រាសដែកថែបតៃវ៉ាន់មួយបានចាក់ចោលកាកសំណល់មានជាតិពុល ដែលធ្វើឲ្យត្រីរាប់តោនងាប់ក្នុងប្រទេសវៀតណាមកាលពីឆ្នាំមុន បានចាប់ផ្តើមដំណើរការរោងចក្ររបស់ខ្លួនក្នុងថ្ងៃចន្ទកន្លងមក ។
ហេតុការណ៍នេះស្ថិតក្នុងចំណោមមហន្តរាយបរិស្ថានធ្ងន់ធ្ងរជាងគេក្នុងប្រទេសវៀតណាម ដែលបានបំផ្លាញជីវភាពរស់នៅតាមបណ្តាយឆ្នេរកណ្តាល និងបង្កឲ្យមានការធ្វើកូដកម្មបន្តដល់បច្ចុប្បន្នផងដែរ ។
រោងចក្រដែកថែប Formosa តម្លៃ១១ប៊ីលានដុល្លារនេះមានទីតាំងនៅកណ្តាលខេត្ត Ha Tinh ស្ថិតក្រោមការសាងសង់ ខណៈក្រុមហុ៊នត្រូវបានចោទប្រកាន់ថា ចាក់កាកសំណល់ខុសច្បាប់ចូលទៅក្នុងសមុទ្រ ដោយបង្កឲ្យត្រី និងសត្វសមុទ្រមានតម្លៃជាច្រើនងាប់ ហើយអណ្តែតមកលើឆ្នេរ ។
យោងតាមមន្ត្រីបរិស្ថានម្នាក់ឲ្យដឹងថា រោងចក្រនេះបានចាប់ផ្តើមដំណើរការសាកល្បងនៅថ្ងៃចន្ទ ហើយនឹងស្ថិតក្រោមការតាមដានយ៉ាងជិតដិតផងដែរ ។
លោក Hoang Duong Tung អនុប្រធានរដ្ឋបាលបរិស្ថានវៀតណាម និយាយថា ៖ «ប្រសិនបើមានហេតុការណ៍ណាមួយកើតឡើង ពួកយើងនឹងបញ្ឈប់ដំណើរការភ្លាម » ។
លោកបន្ថែមថា លទ្ធផលនៃការសាកល្បងនឹងត្រូវបានចេញក្នុងរយៈពេល២៤ម៉ោង ប៉ុន្តែលោកមិនបាននិយាយឲ្យច្បាស់ថា ពួកគេកំពុងតែតាមដានអ្វីឡើយ ។
រោងចក្រ Formosa ស្ថិតក្រោមការស៊ើបអង្កេតជាច្រើន ហើយរោងចក្រនេះបានធ្វើកំណែទម្រង់៥២ក្នុងចំណោម៥៣ចំណុច ដែលពួកគេល្មើសមុនពេលទទួលបានការអនុញ្ញាតឲ្យដំណើរការ ។
យោងតាមភ្នាក់ងារសារព័ត៌មានឲ្យដឹងទៀតថា មានការល្មើសដទៃទាក់ទិននឹងប្រព័ន្ធចំហុយកាកធ្យូងថ្ម ។ មន្ត្រីនិយាយថា Formosa នឹងផ្លាស់ប្តូរប្រព័ន្ធនេះក្នុងឆ្នាំ២០១៩ ។
ក្រុមហ៊ុនដែកថែបតៃវ៉ាន់ ត្រូវបានបញ្ជាឲ្យបង់ប្រាក់៥០០លានដុល្លារដល់រដ្ឋាភិបាលវៀតណាម បន្ទាប់ពីត្រីងាប់ជាច្រើនក្បាលនៅខែមេសា ឆ្នាំ២០១៦ ។
អ្នកនេសាទបានបន្តធ្វើកូដកម្មនៅវៀតណាមកណ្តាល និងទាមទារសំណងកាន់តែច្រើនសម្រាប់ហេតុការណ៍នេះ ខណៈអ្នកនេសាទមួយចំនួនទៀតនិយាយថា ពួកគេមិនទាន់ទទួលបានប្រាក់សំណងទេ ៕
ចែករំលែកព័តមាននេះ