រាជធានីភ្នំពេញ ៖ ក្រសួងពាណិជ្ជកម្ម និងអង្គការពាក់ព័ន្ធបានចាប់ផ្តើមជជែក និងផ្សព្វផ្សាយពីយុទ្ធសាស្ត្រជំរុញការនាំចេញម្រេច ខណៈបច្ចុប្បន្ន នៅជួបបញ្ហាប្រឈមច្រើនត្រូវដោះស្រាយ ។
ក្នុងសិក្ខាសាលាស្តីពីការផ្សព្វផ្សាយយុទ្ធសាស្ត្រជំរុញការនាំចេញម្រេចកម្ពុជា នៅទីស្តីការក្រសួង កាលពីថ្ងៃទី៣០ ឧសភា លោក វ៉ា រុតសាន ទីប្រឹក្សាក្រសួងពាណិជ្ជកម្ម ឲ្យដឹងថា ដើម្បីឱ្យការនាំចេញម្រេចទទួលបានជោគជ័យ ត្រូវពឹងផ្អែកទៅលើគោលការណ៍ធំៗពីរ គឺធ្វើយ៉ាងម៉េច ឱ្យថ្លៃដើមនៃការផលិតមានតម្លៃទាប និងផ្ដល់ទំនុកចិត្តលើគុណភាពម្រេចរបស់កម្ពុជា ។
លោកបន្តថា ៖ « ក្រៅពីធ្វើឱ្យថ្លៃដើមផលិតចំណាយទាបហើយ ផ្នែករដ្ឋនិងឯកជនត្រូវបង្កើនផលិតភាពដាំដុះ ។ ទន្ទឹមនឹងនេះ យើងមើលពូជ និងបច្ចេកទេសដាំដុះ ហើយរដ្ឋត្រូវធ្វើកិច្ចសម្រួលពាណិជ្ជកម្មឱ្យល្អបំផុតរាល់លិខិតស្នាមនាំចេញ ។ ជាមួយគ្នានេះ កុំឲ្យមានជាតិគីមីនៅក្នុងផលិតផលម្រេច ហើយយើងត្រូវធ្វើយ៉ាងណា ឱ្យកិច្ចការនេះបានល្អ គឺថាម្រេចរបស់យើងអត់គីមី ស្របតាមស្តង់ដាកសិកម្ម ដោយពលរដ្ឋត្រូវបង្កើតជាសហគមន៍ងាយស្រួលបណ្តុះបណ្តាលពីបច្ចេកទេសដាំដុះ » ។
លោកជំទាវ សូ ស្រីម៉ិច អនុរដ្ឋលេខាធិការក្រសួងពាណិជ្ជកម្ម លើកឡើងថា តាមលទ្ធផលស្រាវជ្រាវឃើញថា ផលិតកម្មម្រេចនៅកម្ពុជាបានវិវត្ដជាលំដាប់ ។ កាលពីឆ្នាំ១៩៦០ ម្រេចត្រូវបានដាំដុះតែនៅក្នុងខេត្តកោះកុង និងកំពតប៉ុណ្ណោះ ប៉ុន្តែមកដល់ឆ្នាំ១៩៦៣ ម្រេចមានដាំដុះក្នុងខេត្តមួយចំនួនទៀត ដូចជាកំពង់ចាម ដែលផ្តល់ទិន្នផលសរុបប្រមាណពីចំនួន១.៥០០ទៅ២.៥០០តោនក្នុងមួយឆ្នាំ ។
លោកជំទាវបញ្ជាក់ថា ៖ « នៅឆ្នាំ២០១៦កន្លងទៅនេះ ដំណាំម្រេចត្រូវបានឃើញរីកដុះដាលរហូតដល់ខេត្តចំនួន១៩ ចាប់ពីតំបន់និរតី រហូតដល់ពាយ័ព្យ និងភូមិភាគឦសាននៃប្រទេសកម្ពុជា ដែលមានផ្ទៃដីដាំដុះសរុបប្រមាណជាង៦.១២៤ហិកតា និងផ្តល់ទិន្នផល១១.៨១៩តោន » ។
លោក គិត ភារ៉ា ប្រធាននាយកដ្ឋានគោលនយោបាយក្រសួងពាណិជ្ជកម្ម បង្ហាញថា ការដាំដុះម្រេចនៅជួបបញ្ហាប្រឈមច្រើនរួមមាន បច្ចេកទេសដាំដុះ ការថែទាំ និងការជ្រើសរើសពូជ ។ ចំណែកតម្លៃម្រេចប្រែប្រួល និងមិនទាន់មានលក្ខណៈប្រមូលផ្តុំជាបណ្តាញទំនាក់ទំនងពីតំបន់មួយទៅតំបន់មួយ ។ គ្មានក្បាលម៉ាស៊ីនដឹកនាំច្បាស់លាស់ និងមិនទាន់មានការទទួលស្គាល់ច្រើនលើឆាកអន្តរជាតិ ក្រៅពីកេរ្តិ៍ឈ្មោះល្អទទួលបានពី GI ប៉ុន្តែបរិមាណនាំចេញតិច និងកង្វះខាតព័ត៌មានពីបច្ចេកទេស ការប្រើប្រាស់ជីគីមី និងថ្នាំសម្លាប់សត្វល្អិត ហើយចុងក្រោយ គឺចរន្តវិវឌ្ឍន៍នៃទីផ្សារម្រេចពិភពលោក ។
ដើម្បីជំរុញយុទ្ធសាស្ត្រអភិវឌ្ឍន៍ផលិតផលម្រេចកម្ពុជា លោកប្រធាននាយកដ្ឋានគោលនយោបាយក្រសួងពាណិជ្ជកម្មរូបនេះបានផ្ដល់អនុសាសន៍ដូចជា ៖
១-ប្រទេសវៀតណាម និងថៃ គឺជាទិសដៅនាំចេញសមស្របបំផុតសម្រាប់យុទ្ធសាស្ត្ររយៈពេលខ្លី និងមធ្យម ចំពោះផលិតផលម្រេច និងកសិកម្មជាវត្ថុធាតុដើមដទៃទៀត ។
២-គួរបង្កើនទំនាក់ទំនង និងធ្វើសហប្រតិបត្តិការល្អលើវិស័យពាណិជ្ជកម្មឆ្លងកាត់ព្រំដែនរវាងប្រទេសទាំងពីរដូចជា ការបើកទីផ្សារព្រំដែនដើម្បីផ្លាស់ប្តូរទំនិញទៅវិញទៅមក ។
៣-គួររៀបចំក្បាលម៉ាស៊ីនដឹកនាំផ្នែកម្រេចដើម្បីជួយជំរុញ និងលើកកម្ពស់ឱ្យរីកចម្រើន ។
៤-គួរចាប់ផ្តើមពង្រឹងផលិតកម្មស្អាតលើផលិតផលម្រេចឲ្យបានទូលំទូលាយនៅទូទាំងប្រទេស ។
៥-គួរចាប់ផ្តើមរៀបចំយន្តការផ្សព្វផ្សាយម្រេចកម្ពុជា និងជំរុញឱ្យគ្រប់ក្រសួង ស្ថាប័នពាក់ព័ន្ធ ទាំងរាជរដ្ឋាភិបាល ឯកជន និងដៃគូអភិវឌ្ឍន៍ ប្រើប្រាស់ម្រេចជាវត្ថុអនុស្សាវរីយ៍សម្រាប់ជូនភ្ញៀវ និងពេលចេញទៅបំពេញបេសកកម្មនៅក្រៅប្រទេស ។
៦-អង្គភាពពាក់ព័ន្ធគួរជួយរៀបចំមណ្ឌលប្រមូលទិញនៅតាមខេត្តគោលដៅផលិតផលម្រេចសំខាន់ៗ ។
៧-រាជរដ្ឋាភិបាលគួរជំរុញប្រជាពលរដ្ឋកម្ពុជាចាប់ផ្តើមប្រើប្រាស់ និងអភិវឌ្ឍន៍ការនាំចេញនៅនឹងកន្លែង តាមរយៈការរៀបចំទិវា ឬវេទិកាម្រេចជាដើម ៕
ចែករំលែកព័តមាននេះ