តម្លៃប្រេងបានធ្លាក់ចុះនៅថ្ងៃចន្ទ ដោយសារសកម្មភាពខួងប្រេងរបស់សហរដ្ឋអាមេរិកកើនឡើង ដែលផ្ទុយនឹងកិច្ចព្រមព្រៀងដឹកនាំដោយ OPEC ជំរុញឲ្យរឹតបន្តឹងការផ្គត់ផ្គង់ ។
ការជួញដូរត្រូវបានផ្អាកដោយសារតែថ្ងៃឈប់សម្រាកនៅប្រទេសចិន សហរដ្ឋអាមេរិក និងអង់គ្លេស ប៉ុន្តែតើការព្រួយបារម្ភរបស់ OPEC អាចទប់ស្កាត់ការផ្គត់ផ្គង់លើសតម្រូវការឬទេ ។
តម្លៃគោលប្រេងឆៅ Brent ធ្លាក់ចុះ១៩សេន ស្មើ៥១,៩៦ដុល្លារក្នុង១ធុង ។ ការធ្លាក់ចុះនេះបានបញ្ចប់នៅសប្តាហ៍មុន ជិត៣%។ ចំណែកតម្លៃគោលប្រេងឆៅអាមេរិក West Texas Intermediate (WTI) ក៏បានធ្លាក់ចុះ១៩សេន ស្មើ៤៩,៦១ដុល្លារក្នុង១ធុងផងដែរ ។
ប្រទេសនាំចេញប្រេង និងប្រទេសមិនមែនជាសមាជិក OPEC បានសន្យាកាលពីសប្តាហ៍មុនថា នឹងបន្តកិច្ចព្រមព្រៀងកាត់បន្ថយផលិតកម្មចំនួន១,៨លានបារ៉ែលក្នុង១ថ្ងៃ រហូតដល់ខែមីនា ឆ្នាំ២០១៨ ។ កិច្ចព្រមព្រៀងដំបូងគិតចាប់តាំងពីខែមករា នឹងផុតកំណត់នៅខែមិថុនា ឆ្នាំនេះ ។
លោក Carsten Fritsch អ្នកវិភាគរបស់ក្រុមហ៊ុន Commerzbank និយាយថា កាលពីថ្ងៃចន្ទ តម្លៃបានប្រែប្រួលតិចតួច ។ លោកថា ៖ « ពួកគេរំពឹងទុករហូតដល់ទៅ៩ខែ វាជាការខកចិត្តមួយ» ។
លោកបន្តថា ការអនុលោមតាមកិច្ចព្រមព្រៀងកាត់បន្ថយទិន្នផលនេះទំនងជាមិនយូរទៀតទេ និងបារម្ភថា តើការសន្យានេះនឹងកាត់បន្ថយស្តុកប្រេងនៅសល់ជិតកម្រិតខ្ពស់បំផុតឬយ៉ាងណា ។
ទោះបីមានការកាត់បន្ថយជាបន្តបន្ទាប់ ប៉ុន្តែតម្លៃប្រេងមិនបានកើនឡើងលើសពី៥០ដុល្លារក្នុង១ធុងទេ ។
ភាពជោគជ័យរបស់ OPEC ពឹងផ្អែកលើទិន្នផលរបស់សហរដ្ឋអាមេរិក ខណៈប្រទេសនេះមិនបានចូលរួមកាត់បន្ថយផលិតកម្ម។ ផលិតកម្មអាមេរិកបានកើនឡើង១០% ចាប់ពីពាក់កណ្តាលឆ្នាំ២០១៦ ស្មើជាង៩,៣លានបារ៉ែលក្នុង១ថ្ងៃ ជិតស្មើប្រទេសផលិតប្រេងកំពូល គឺរុស្ស៊ី និងអារ៉ាប៊ីសាអូឌីត ។
ក្រុមហ៊ុនអាមេរិកបានខួងប្រេងអស់រយៈពេល១៩សប្តាហ៍ជាប់គ្នា ។ កន្លែងខួងប្រេងសរុបមាន៧២២ ជាចំនួនខ្ពស់បំផុតគិតចាប់ពីខែមេសា ឆ្នាំ២០១៥មក ។ នេះបើតាមក្រុមហ៊ុនផ្តល់សេវាថាមពល Baker Hughes Inc ។
ទោះជាកន្លែងខួងប្រេងមិនកើនឡើង ប៉ុន្តែក្រុមហ៊ុន Goldman Sachs ឱ្យដឹងថា ទិន្នផលរបស់អាមេរិកនឹងកើនឡើង៧៨ម៉ឺន៥ពាន់បារ៉ែលក្នុង១ថ្ងៃ រវាងត្រីមាសទី៤ឆ្នាំ២០១៦ និងត្រីមាសទី៤ឆ្នាំ២០១៧ នៅទូទាំងតំបន់ប្រេងថ្មសែល Permian, Eagle Ford, Bakken និង Niobrara ។
ក្រុមអ្នកវិភាគនិយាយថា ការកាត់បន្ថយស្តុកសកលដែលមានចំនួនច្រើនលើសលប់ នឹងក្លាយជាគន្លឹះដើម្បីបន្ថយការផ្គត់ផ្គង់លើសតម្រូវការ ៕
ចែករំលែកព័តមាននេះ