បើកម៉ូតូឆ្លងថ្នល់មិនប្រយ័ត្ន ត្រូវរថយន្តបុកពេញទំហឹងរបួសធ្ងន់
ខេត្តកណ្តាល ៖ បុរសម្នាក់បានរងរបួសធ្ងន់ខណៈជិះម៉ូតូឆ្លងថ្នល់ខ្វះការប្រុងប្រយ័ត្នត្រូវរថយន្តបុកកាលពីវេលាម៉ោង៥និង៣០នាទីល្ងាច ថ្ងៃទី៣០ ខែឧសភា ឆ្នាំ២០១៧នេះ
ខេត្តកណ្តាល ៖ បុរសម្នាក់បានរងរបួសធ្ងន់ខណៈជិះម៉ូតូឆ្លងថ្នល់ខ្វះការប្រុងប្រយ័ត្នត្រូវរថយន្តបុកកាលពីវេលាម៉ោង៥និង៣០នាទីល្ងាច ថ្ងៃទី៣០ ខែឧសភា ឆ្នាំ២០១៧នេះ នៅលើកំណាត់ផ្លូវជាតិលេខ១ ស្ថិតក្នុងភូមិទួលក្របៅ ឃុំគគីរ ស្រុកកៀនស្វាយ ខេត្តកណ្ដាល។ អ្នករងរបួសធ្ងន់ឈ្មោះ ជា ង៉ុយ ភេទប្រុសអាយុ៣២ឆ្នាំ ជនជាតិខ្មែរ មុខរបរកម្មករសំណង់ មានទីលំនៅភូមិជយ័ឧត្ដម ឃុំសំរោងធំ ស្រុកកៀនស្វាយ បើកបរម៉ូតូម៉ាកស៊ុយហ្សុយគីស្មាស់ ពណ៌ខ្មៅ ពាក់ស្លាកលេខ ភ្នំពេញ 1T-7702 ត្រូវក្រុមគ្រួសារដឹកយកសង្គ្រោះនៅមន្ទីរពេទ្យរាជធានីភ្នំពេញ។
ចំណែករថយន្តម៉ាក តូយ៉ូតាព្រូស ពណ៌ស្ករ ពាក់ស្លាកលេខ ភ្នំពេញ 2R-8641បើកបរដោយឈ្មោះ FUCHAOHUI ភេទប្រុស អាយុ៤៤ឆ្នាំ ជាជនជាតិចិនស្នាក់នៅភូមិកំពង់ព្រាង ឃុំសិត្បូ ស្រុកស្អាង ខេត្តកណ្ដាល។ យោងតាមរបាយការណ៍របស់សមត្ថកិច្ចឲ្យដឹងថាមុនពេលកើតហេតុគេឃើញភាគីម៉ូតូបើកបរឆ្លងថ្នល់ក្នុងទិសដៅភ្នំពេញ-អ្នកលឿង ស្រាប់តែបើកឆ្លងមិនទាន់ផុតផងក៏ត្រូវរថយន្តបើកបរក្នុងទិសដៅអ្នកលឿង-ភ្នំពេញបញ្ច្រាសគ្នាបុកពេញទំហឹងតែម្តង។ក្រោយពេលកើតហេតុនគរបាលជំនាញបានចុះធ្វើការវាស់វែង និងធ្វើកំណត់ហេតុ ដើម្បីចាត់ការតាមនីតិវិធី៕
ចែករំលែកព័តមាននេះ