ច្រាំងទន្លេមេគង្គក្រោម ពោះម៉ាយជិត៥ឆ្នាំហើយ…
ខេត្តកណ្តាល ៖ គ្រោះធម្មជាតិបាក់ច្រាំងទន្លេមេគង្គក្រោមនៅចំណុចភូមិបឹងលើ ឃុំខ្ពបអាទាវ ស្រុកលើកដែកខេត្តកណ្តាល បានបាក់ស្រុតជាបន្តបន្ទាប់រហូតដល់ដាច់ផ្លូវកៅស៊ូ
ខេត្តកណ្តាល ៖ គ្រោះធម្មជាតិបាក់ច្រាំងទន្លេមេគង្គក្រោមនៅចំណុចភូមិបឹងលើ ឃុំខ្ពបអាទាវ ស្រុកលើកដែកខេត្តកណ្តាល បានបាក់ស្រុតជាបន្តបន្ទាប់រហូតដល់ដាច់ផ្លូវកៅស៊ូ ពោះម៉ាយរយៈពេលជិត៥ឆ្នាំហើយ រហូតមកទល់ពេលនេះពលរដ្ឋកំពុងទន្ទឹងរង់ចាំមើលចំណាត់ការរបស់មន្ត្រីជំនាញ និងអាជ្ញាធរពុំទាន់ធ្វើអ្វីសោះ។ ពលរដ្ឋនិយាយថា គ្រោះធម្មជាតិបាក់ច្រាំងទន្លេបានបាក់ម្តងបន្តិចៗរហូតដល់ដាច់ផ្លូវកៅស៊ូ(ផ្លូវជាតិលេខ១៤) ចូលទៅកាន់ច្រកទ្វារអន្តរជាតិក្អមសំណមួយកន្លែងត្រង់ចំណុចភូមិឃុំខាងលើនេះគឺមានរយៈពេលជិត៥ឆ្នាំហើយ បណ្តាលឲ្យដីចម្ការ និងដីលំនៅឋានរបស់ពលរដ្ឋរាប់ហិកតាបានបាក់ធ្លាក់ចូលទៅក្នុងបាតទន្លេហើយផ្ទះប្រជាពលរដ្ឋជាច្រើនគ្រួសារត្រូវបង្ខំចិត្តរុះរើជាបន្តបន្ទាប់ផងដែរ។
ពលរដ្ឋបន្តទៀតថា ការបាក់ច្រាំងទន្លេដាច់ផ្លូវនេះគេសង្កេតឃើញមានវត្តមានមន្ត្រីជំនាញ និងអាជ្ញាធរចុះមកពិនិត្យមើលជាបន្តបន្ទាប់ ហើយបាននិយាយប្រាប់ពួកគាត់ថានឹងសិក្សាធ្វើផ្លូវវាង ស្រាប់តែឥឡូវស្ងាត់ឈឹងរហូត។ ការដាច់ផ្លូវនេះក៏បានធ្វើឲ្យពលរដ្ឋជាច្រើនជួបការលំបាកយ៉ាងខ្លាំងក្នុងការដឹកជញ្ជូនកសិផលយកទៅលក់នៅប្រទេសជិតខាង និងធ្វើឲ្យច្រកទ្វារអន្តរជាតិមួយនេះបាត់បង់នូវសេដ្ឋកិច្ចចំណូលថវិកាជាតិយ៉ាងធ្ងន់ធ្ងរ។
ប្រជាពលរដ្ឋក៏សូមសំណូមពរយ៉ាងទទូចដល់សម្តេចអគ្គមហាសេនាបតីតេជោ ហ៊ុន សែនមេត្តាជួយធ្វើច្រាំងទេ ដើម្បីកុំឲ្យបាក់ដល់ដីរបស់ពួកគាត់បន្តទៀត និងជួយធ្វើផ្លូវវាងឲ្យបានឆាប់ៗនេះផងព្រោះស្រុកលើកដែកគឺជាស្រុកមួយមានព្រំប្រទល់ជាប់នឹងប្រទេសវៀតណាម ហើយពលរដ្ឋភាគច្រើនប្រកបមុខរបរធ្វើស្រែចម្ការដល់ពេលបានផលត្រូវដឹកយកទៅលក់នៅប្រទេសជិតខាងគ្រាន់បានចំណេញប្រាក់ខ្លះសម្រាប់ផ្គត់ផ្គង់ជីវភាពគ្រួសារ កាលណាដាច់ផ្លូវដូចផ្តាច់ជីវិតរបស់ពួកគាត់អ៊ីចឹង៕
ចែករំលែកព័តមាននេះ