រាជធានីភ្នំពេញ ៖ បុរសអ្នករត់ម៉ូតូឌុប ហើយក៏ជាឪពុកម្នាក់ដែរ បានកាន់កាតគ្រីម៉ូតូ និងអត្តសញ្ញាណប័ណ្ណ រួមទាំងឯកសារមួយចំនួនទៀត រត់ទៅប្តឹងនគរបាលប៉ុស្តិ៍ទន្លេបាសាក់ ឱ្យជួយអន្តរាគមន៍ ក្រោយពីកូនប្រុសគាត់បានយកម៉ូតូម៉ាកហុងដាC125 មួយ
រាជធានីភ្នំពេញ ៖ បុរសអ្នករត់ម៉ូតូឌុប ហើយក៏ជាឪពុកម្នាក់ដែរ បានកាន់កាតគ្រីម៉ូតូ និងអត្តសញ្ញាណប័ណ្ណ រួមទាំងឯកសារមួយចំនួនទៀត រត់ទៅប្តឹងនគរបាលប៉ុស្តិ៍ទន្លេបាសាក់ ឱ្យជួយអន្តរាគមន៍ ក្រោយពីកូនប្រុសគាត់បានយកម៉ូតូម៉ាកហុងដាC125 មួយគ្រឿងយកទៅផ្ញើរកន្លែងម៉ូតូមួយកន្លែង ដែលមានទីតាំងក្បែរកាស៊ីណូណាហ្គាវើល ហើយត្រូវបាត់សំបុត្រ ស្រាប់តែត្រូវគេទារលុយចំនួន១០ដុល្លារ ដោយសារអត់លុយឱ្យគេក៏ត្រូវគេទាររកកាតគ្រីបន្ថែមទៀត ។ ហេតុការនេះ បានកើតឡើងកាលពីវេលាម៉ោង១ និង ៣០នាទីរសៀលថ្ងៃទី៣០ ឧសភា ក្នុងសង្កាត់ទន្លេបាសាក់់ ខណ្ឌចំការមន។
បុរសខាងលើឈ្មោះជុំ កន អាយុ៥២ឆ្នាំ បានរៀបរាប់ថា គាត់រាល់ថ្ងៃមានមុខរបររត់ម៉ូតូឌុប មានស្រុកកំណើតនៅភូមិប្ញស្សីដុំ ឃុំប្រភ្នំ ស្រុកអង្គរជ័យ ខេត្តកំពត ។ នៅមុនពេលកើតហេតុ វេលាម៉ោងជាង៨ព្រឹកថ្ងៃទី៣០ ឧសភា កូនប្រុសគាត់ម្នាក់ឈ្មោះកៅ រិទ្ធ អាយុ ៣១ឆ្នាំ ជាជាងដែក ស្នាក់នៅផ្ទះជួលម្តុំផ្សារឃ្លាំងរំសេវ ក្នុងសង្កាត់ទឹកល្អក់ទី៣ ខណ្ឌទួលគោក បានទៅផ្ញើម៉ូតូម៉ាកហុងដា C125
ពណ៌ខ្មៅ ពាក់ស្លាកលេខតាកែវ១J-៩៩១៩ មួយគ្រឿង នៅកន្លែងខាងលើ ដោយកឹបសំបុត្រត្រឹមត្រូវ និងបង់ប្រាក់ជាមុនក្នុងតម្លៃចំនួន៣,០០០រៀល ហើយឡើងទៅធ្វើការជាជាងដែកនៅលើកាស៊ីណូណាហ្គាវើលបាត់ទៅ ។
លុះដល់ម៉ោង១១ព្រឹកថ្ងៃដដែល ពេលដែលកូនប្រុសគាត់ចប់ការងាររួចហើយនោះ ក៏បានដើរមកយកម៉ូតូ និងលូករកសំបុត្រក្នុងហោប៉ៅមិនឃើញ ដោយមិនដឹងជាបាត់នៅទីណា ហើយក៏ទៅប្រាប់ស្ត្រីម្នាក់ ដែលជាម្ចាស់ទីតាំងខាងលើ ។ ពេលដែលកូនប្រុសគាត់ទៅប្រាប់ស្ត្រីម្នាក់នោះរួចហើយ ត្រូវគេប្រាប់ថា «ឱ្យទៅយកកាតគ្រី និងបង់លុយចំនួន១០ដុល្លារ ទើបឱ្យយកម៉ូតូទៅវិញបាន»។
ពេលនោះ កូនប្រុសគាត់បានប្រាប់វិញថា «គ្មានលុយទេ មានតែ៥ពាន់រៀល ទុកសំរាប់ហូបបាយប៉ុណ្ណោះ»។ ដោយពួកគាត់បានអង្វរ និងរូបគាត់ជាឪពុកសុខចិត្តអង្វរនិងធានា ដោយបានហ្វូតូកូពីទាំងកាតគ្រី និងអត្តសញ្ញាណប័ណ្ណសំគាល់ខ្លួនឱ្យផងដែរ តែស្ត្រីម្នាក់នោះនៅតែមិនព្រម និងថែមទាំងទាមទារយកកាតគ្រីស៊ីនយកទៅរក្សាទុកចំនួន៣ថ្ងៃផងដែរ តែរូបគាត់មិនព្រម ទើបរត់មកប្តឹងកម្លាំងនគរបាលប៉ុស្តិ៍ទន្លេបាសាក់ ឱ្យជួយធ្វើអន្តរាគមន៍យកម៉ូតូមកវិញ។
ក្រោយពីទទួលបាននូវការរៀបរាប់ប្រាប់នូវរឿងយ៉ាងអយុត្តិធម៌ពីសំណាក់បុរសអ្នករត់ម៉ូតូឌុបខាងលើ កម្លាំងនគរបាលនគរបាលប៉ុស្តិ៍ទន្លេបាសាក់ម្នាក់ ក៏បានចុះទៅកន្លែងផ្ញើម៉ូតូខាងលើ និងជួយនិយាយសម្របសម្រួលជាមួយនិងស្ត្រីម្ចាស់ទីតាំង អស់រយៈពេលយ៉ាងយូរ ទើបគេព្រមប្រគល់ម៉ូតូឱ្យវិញ ដោយបង់ប្រាក់បន្ថែមចំនួន១ម៉ឺនរៀលទៀតផង ។
ចែករំលែកព័តមាននេះ