កីឡដ្ឋានថ្មីមួយនៅកាតា នឹងត្រូវរុះរើទាំងស្រុង ក្រោយចប់ជំនួបរវាងប្រេស៊ីល នឹងកូរ៉េខាងត្បូង
កាតា ៖ កីឡដ្ឋាន 974 ឬ Stadium 974 ដែលត្រូវបានសាងសង់ឡើងជាមួយទូកុងតឺន័រចំនួន ៩៧៤ទូ
កាតា ៖ កីឡដ្ឋាន 974 ឬ Stadium 974 ដែលត្រូវបានសាងសង់ឡើងជាមួយទូកុងតឺន័រចំនួន ៩៧៤ទូ
កាតា ៖ កីឡដ្ឋាន 974 ឬ Stadium 974 ដែលត្រូវបានសាងសង់ឡើងជាមួយទូកុងតឺន័រចំនួន ៩៧៤ទូ ដើម្បីបម្រើដល់ការប្រកួត World Cup 2022 នៅប្រទេសកាតា នឹងត្រូវរុះរើចេញតែម្តង បន្ទាប់ពីបញ្ចប់ការប្រកួតចុងក្រោយ នៅក្នុងកីឡដ្ឋាននេះ ដែលក្រុមសាំបា ប្រេស៊ីល បានយកឈ្នះក្រុមខ្លាកំណាចអាស៊ី កូរ៉េខាងត្បូង ដោយលទ្ធផល ៤-១ ក្នុងការប្រកួតវគ្គ១៦ក្រុម កាលពីថ្ងៃទី០៥ ខែធ្នូ កន្លងទៅ។
ប្រទេសកាតា បានត្រៀមខ្លួនយ៉ាងពេញទំហឹង ដើម្បីធ្វើជាម្ចាស់ផ្ទះព្រឹត្តិការណ៍ FIFA World Cup នៅឆ្នាំនេះ ដោយបានសាងសង់កីឡដ្ឋានថ្មីចំនួន ៧ នៅទូទាំងប្រទេស ក្នុងចំណោមកីឡដ្ឋានសរុប៨ ដែលទទួលរៀបចំការប្រកួតព្រឹត្តិការណ៍បាល់ទាត់ដ៏ធំបំផុតរបស់ពិភពលោកមួយនេះ។
ក្នុងចំណោមនោះ គឺមានតែកីឡដ្ឋាន 974 ដែលមានមូលដ្ឋានក្នុងទីក្រុងដូហា តែមួយគត់ ដែលសាងសង់ឡើងដោយប្រើទូកុងតឺន័រ ប៉ុន្តែទោះយ៉ាងណាក៏ដោយ កីឡដ្ឋាននេះ នឹងត្រូវរលាយបាត់រូបរាងទាំងស្រុងតែម្តង តាមរយៈការរុះរើសចេញ ក្រោយចប់ការប្រកួតរវាងប្រេស៊ីល នឹងកូរ៉េខាងត្បូង។
នៅក្នុងការប្រកួត World Cup 2022 កីឡដ្ឋាន 974 ដែលមានសមត្ថភាពអាចផ្ទុកអ្នកទស្សនាបានចំនួន ៤៤,០៨៩នាក់ ដែលមិនត្រូវប្រកាសអំពីតម្លៃនៃការសាងសង់ បានទទួលរៀបចំការប្រកួតសរុបចំនួន ៧ប្រកួត ចាប់តាំងពីវគ្គជម្រុះក្នុងពូល រហូតដល់វគ្គ១៦ក្រុមចុងក្រោយ។
យោងតាមការបញ្ជាក់ពីអ្នករៀបចំព្រឹត្តិការណ៍បានឱ្យដឹងថា កីឡដ្ឋាន 974 ត្រូវបានសាងសង់ឡើងជាផ្នែកៗ ដោយប្រើវត្ថុធាតុដើមកែច្នៃ រួមទាំងដែកថែប ជាពិសេសទូកុងតឺន័រចំនួន ៩៧៤ទូ ដូចនឹងឈ្មោះ ដែលត្រូវបានប្រើសម្រាប់កីឡដ្ឋាននេះ។
អ្នករៀបចំបានបន្តទៀតថា កីឡដ្ឋាន 974 នឹងត្រូវរុះរើទាំងស្រុងតែម្តង ហើយថែមទាំងបញ្ជូនបំណែករបស់វាទៅកាន់ប្រទេសផ្សេងៗ ដែលត្រូវការជាចាំបាច់ ខណៈកន្លងមក អ្នកជំនាញជាច្រើនមកពីក្រៅប្រទេស និងក្នុងប្រទេសបានសរសើរយ៉ាងខ្លាំង អំពីការរចនាហេដ្ឋារចនាសម្ព័ន្ធនៃកីឡដ្ឋានមួយនេះ។
គួរបញ្ជាក់ជូនថា World Cup 2022 បានក្លាយជាព្រឹត្តិការណ៍ ដែលម្ចាស់ផ្ទះចំណាយថវិការៀបចំច្រើនបំផុតមិនធ្លាប់ពីមុនក្នុងប្រវត្តិសាស្ត្រ សម្រាប់ព្រឹត្តិការណ៍បាល់ទាត់ ដែលបង្កើតឡើងដំបូងបំផុតនៅឆ្នាំ ១៩៣០ មួយនេះ។ ដោយកាតា បានចំណាយថវិកាដ៏មហាសាលសរុប ២២០ពាន់លានដុល្លារអាមេរិក។
យោងតាមប្រភពពីគេហទំព័រ Arabian Business បានបង្ហាញអំពីទឹកប្រាក់ ២២០ពាន់លានដុល្លារ ដែលកាតា ត្រូវប្រើប្រាស់លើការរៀបចំព្រឹត្តិការណ៍ World Cup 2022 ដែលរួមមានដូចជា៖ ការសាងសង់កីឡដ្ឋានថ្មីចំនួន ៧ ក្នុងចំណោមកីឡដ្ឋានចំនួន ៨ ទទួលរៀបចំការប្រកួត ដែលសុទ្ធតែបំពាក់ដោយម៉ាស៊ីនត្រជាក់ទាំងអស់ ដោយត្រូវចំណាយប្រមាណ ១០ពាន់លានដុល្លារ។ ខណៈដែល ២១០ពាន់លានដុល្លារផ្សេងទៀតរួមមាន ប្រើប្រាស់លើការអភិវឌ្ឍគ្រឿងបរិក្ខារថ្មីទំនើបៗ ផ្តល់ជូនអ្នកគាំទ្រ ក៏ដូចជាកីឡាករផ្ទាល់។
ការធ្វើឱ្យកាន់តែល្អប្រសើរឡើងនូវហេដ្ឋារចនាសម្ព័ន្ធផ្សេងៗជាច្រើន ជាពិសេសផ្នែកសេវាដឹកជញ្ជូន រួមនិងការអភិវឌ្ឍទីក្រុងថ្មី ដែលមានឈ្មោះ «Lusail City»។ ដើម្បីឆ្លើយតបតាមផែនការរបស់រដ្ឋាភិបាលកាតា ដែលប្រើប្រាស់ព្រឹត្តិការណ៍បាល់ទាត់ពិភពលោក លើការវិនិយោគដ៏ធំរយៈពេលវែង សម្រាប់អនាគត។
ខាងក្រោមនេះ ជាការចំណាយរបស់ប្រទេសជាម្ចាស់ផ្ទះ លើការរៀបចំព្រឹត្តិការណ៍ World Cup គិតចាប់តាំងពីឆ្នាំ ១៩៩៤ មក៖
-សហរដ្ឋអាមេរិក ឆ្នាំ១៩៩៤ ៖ ៥០០លានដុល្លារ
-បារាំង ឆ្នាំ១៩៩៨ ៖ ២,៣ពាន់លានដុល្លារ
-កូរ៉េខាងត្បូង ជប៉ុន ឆ្នាំ២០០២ ៖ ៧ពាន់លានដុល្លារ
-អាល្លឺម៉ង់ ឆ្នាំ២០០៦ ៖ ៤,៣ពាន់លានដុល្លារ
-អាហ្វ្រិកខាងត្បូង ឆ្នាំ២០១០ ៖ ៣,៦ពាន់លានដុល្លារ
-ប្រេស៊ីល ឆ្នាំ២០១៤ ៖ ១៥ពាន់លានដុល្លារ
-រុស្ស៊ី ឆ្នាំ២០១៨ ៖ ១១,៦ពាន់លានដុល្លារ
-កាតា ឆ្នាំ២០២២ ៖ ២២០ពាន់លានដុល្លារ៕ (ដកស្រង់ចេញពី Arabian Business, Economic Times និង AFP)
ចែករំលែកព័តមាននេះ