ខេត្តមណ្ឌលគិរី ៖ បច្ចុប្បន្ន ប្រជាពលរដ្ឋនៅខេត្តមណ្ឌលគិរី កំពុងងាកមកដាំដំណាំចេក និងពង្រីកផ្ទៃដីដាំដុះច្រើនជាងឆ្នាំមុនៗ ដោយសារភូមិសាស្ត្រដីមានជីវជាតិ និងអាកាសធាតុអំណោយផលច្រើន ដែលអាចឲ្យដំណាំនេះលូតលាស់បានល្អជាងដំណាំផ្សេងៗ ។
ស្ត្រីជាកសិករនៅភូមិឡៅការ សង្កាត់សុខដុម ក្រុងសែនមនោរម្យ ឲ្យដឹងថា ខេត្តភាគឦសានមួយនេះអំណោយផលច្រើនលើដំណាំចេក ព្រោះងាយស្រួលដាំ មិនចាំបាច់ប្រើជីគីមីមកបំប៉នបន្ថែមឡើយ ហើយទទួលបានទិន្នផលខ្ពស់ និងផ្លែធំៗជាងនៅខេត្តផ្សេង ។ អ្នកស្រី ផុន ណារី បន្ដថា ៖ « កាលពីមុន ខ្ញុំធ្លាប់មានចម្ការចេកនៅខេត្តកំពង់ចាម តែការដាំនៅទីនោះចំណាយទុនច្រើន ហើយទទួលបានផលតិច ខុសពីនៅខេត្តមណ្ឌលគិរី ខ្ញុំដាំដោយធម្មជាតិ មិនប្រើជីគីមី ហើយទទួលបានទិន្នផលខ្ពស់ទៀត ដោយផ្លែវាធំៗ និងមានស្និតច្រើនក្នុង១ស្ទងៗ » ។ ចំណែកលោក តូច សំបូ ឈ្មួញកណ្ដាលមកពីខេត្តស្វាយរៀង ដែលមកទិញចេកទៅលក់បន្ដឲ្យដឹងថា ចេកនៅខេត្តមួយនេះមានតម្លៃថោកជាងនៅខេត្តដទៃ ហើយផ្លែធំៗ និងល្អជាង ងាយស្រួលខ្ញុំលក់ចេញវិញ ។
មន្ត្រីមន្ទីរកសិកម្មខេត្តមណ្ឌលគិរីបង្ហើបថា រហូតមកដល់ពេលនេះ មិនទាន់បានបូកសរុបផ្ទៃដីដែលកសិករដាំដុះដំណាំចេកនៅឡើយទេ ប៉ុន្ដែអះអាងថា សព្វថ្ងៃ ប្រជាពលរដ្ឋកំពុងពេញនិយមដាំចេកច្រើនជាងឆ្នាំកន្លងមក ៕
ចែករំលែកព័តមាននេះ