អេ ភូថង ឆ្លើយតបការរិះគន់ជុំវិញរឿងឡើងរេញ
រាជធានីភ្នំពេញ ៖ អ្នកប្រដាល់ជើងចាស់រហស្សនាមអធិរាជកែងឆេះជង្គង់ហោះអេ ភូថង ដែលបច្ចុប្បន្នបានក្លាយជាគ្រូបង្ហាត់ប្រដាល់នៅក្នុងក្រុមជម្រើសជាតិទៅហើយនោះ នឹងឡើងប្រកួតជាមួយ
រាជធានីភ្នំពេញ ៖ អ្នកប្រដាល់ជើងចាស់រហស្សនាមអធិរាជកែងឆេះជង្គង់ហោះអេ ភូថង ដែលបច្ចុប្បន្នបានក្លាយជាគ្រូបង្ហាត់ប្រដាល់នៅក្នុងក្រុមជម្រើសជាតិទៅហើយនោះ នឹងឡើងប្រកួតជាមួយ
រាជធានីភ្នំពេញ ៖ អ្នកប្រដាល់ជើងចាស់រហស្សនាមអធិរាជកែងឆេះជង្គង់ហោះអេ ភូថង ដែលបច្ចុប្បន្នបានក្លាយជាគ្រូបង្ហាត់ប្រដាល់នៅក្នុងក្រុមជម្រើសជាតិទៅហើយនោះ នឹងឡើងប្រកួតជាមួយអ្នកប្រដាល់ជើងចាស់ថៃឈ្មោះកាណុង ស័ក្តិលេកនៅលើសង្វៀនទូរទស្សន៍ភីអិនអិនក្នុងកម្មវិធីប្រដាល់សមរភូមិអ្នកប្រយុទ្ធនាថ្ងៃអាទិត្យ ទី៤ មិថុនា ខាងមុខនេះ ដើម្បីយកប្រាក់ជួយដល់មន្ទីរពេទ្យគន្ធបុប្ផា ។
ជួបជាមួយកោះសន្តិភាពកាលពីថ្ងៃចន្ទដើមសប្ដាហ៍កន្លងទៅនេះ លោក អេ ភូថង បានប្រាប់ឱ្យដឹងថា ការប្រកួតរបស់លោកលើកនេះមិនមែនជាការសម្ដែងក្បាច់គុនដើម្បីបញ្ឆោតភ្នែកអ្នកទស្សនាទេគឺប្រកួតយកចាញ់-ឈ្នះមែនទែនតែម្ដងដោយសារតាំងពីដើមរៀងមកលោកមិនដែលលក់ឧត្តមគតិខ្លួនឯងទេ ដូច្នេះបើកាលណាបានឡើងសង្វៀនហើយត្រូវតែវ៉ៃ ។ ជាក់ស្ដែង តាំងពីមានការផ្គូផ្គងរហូតមកដល់ពេលនេះ លោកពិតជាប្រឹងប្រែងហ្វឹកហាត់ឡើងវិញសម្បើមណាស់មិនហ៊ានប្រហែសឡើយទាំងបច្ចេកទេសវាយនិងការប្រមូលកម្លាំងទោះបីការប្រកួតលើកនេះ
ធ្វើឡើងត្រឹមតែ៣ទឹកក្ដី ។ ជាមួយគ្នានេះលោកអេ ភូថង បានបង្ហើបឱ្យដឹងផងដែរថា កាណុង ស័ក្តិលេក ដែលត្រូវប្រកួតជាមួយលោកលើកនេះ គឺជាអតីតកីឡាករល្បីមួយរូបប្រចាំប្រទេសថៃដែលបច្ចុប្បន្នក៏ធ្វើជាគ្រូបង្ហាត់ដូចរូបលោកដែរ ។
ទាក់ទិននឹងការឡើងប្រកួតយកប្រាក់ជួយដល់មន្ទីរពេទ្យគន្ធបុប្ផារបស់លោកអេ ភូថង នេះ បន្ទាប់ពីមានការផ្សព្វផ្សាយនៅលើកញ្ចក់ទូរទស្សន៍ កាសែត គេហទំព័រ និងបណ្ដាញសង្គមហ្វេសប៊ុករួចមក គេសង្កេតឃើញមានការផ្ទុះចេញនូវពាក្យរិះគន់មួយចំនួនទៅលើកីឡាកររូបនេះដូចជាថា«ខ្លួនឯងមិនទាន់មានជីវភាពគ្រប់គ្រាន់ផង បែរជានិយាយថាប្រកួតយកប្រាក់ជួយដល់មន្ទីរពេទ្យគន្ធបុប្ផាទៅវិញ» «កុំប្រើវិធីស្មោកគ្រោកដើម្បីរកលុយអី»…។
ពាក់ព័ន្ធនឹងពាក្យរិៈគន់ទាំងអស់នេះ លោកអេ ភូថង ប្រាប់ថា លោកមិនខ្វល់ឡើយ ចង់អ្នកណាថាអីក៏ថាទៅ ព្រោះអ្វីដែលលោកសម្រេចចិត្តធ្វើក្នុងពេលនេះ គឺជាបំណងប្រាថ្នារបស់លោកតាំងពីយូរណាស់មកហើយ ។ ម្យ៉ាងវិញទៀត ការធ្វើបែបនេះគឺជាការរួមចំណែកមួយដើម្បីជួយដល់សង្គមនិងប្រទេសជាតិរបស់យើងទៅវិញទេ ។ លោកថា មានអ្នកខ្លះសួរលោកថា ហេតុអីក៏លោកមិនយកប្រាក់ដែលបានពីការប្រកួតនេះទៅជួយដល់កីឡាករប្រដាល់ដែលជួបការលំបាកបែរជាយកទៅជួយដល់មន្ទីរពេទ្យទៅវិញ ? លោកបានប្រាប់វិញថា កីឡាករប្រដាល់គេមានកម្លាំងគ្រប់គ្រាន់ដើម្បីរកប្រាក់ចិញ្ចឹមជីវិតខ្លួនឯងបានហើយទោះលំបាកបន្តិចក្ដី ចំណែកកុមារតូចៗត្រូវការយើងទាំងអស់គ្នាជួយដល់ពួកគេ ។ សូម្បីតែលោក ឡុង សាលវ័ន្ត ដែលជាប្រធានក្លិបសាលវ័ន្តកីឡា ក៏ដូចជាក្រុមគ្រួសារ និងមិត្តរួមអាជីពជាច្រើននាក់ទៀត ក៏បានគាំទ្រដល់ទង្វើរបស់លោកដែរ។
លោកសំណព្វ ប្រធានគ្រប់គ្រងកម្មវិធីកីឡាប្រចាំស្ថានីយទូរទស្សភីអិនអិន ពេលកោះសន្តិភាពសួរពីតម្លៃខ្លួនពិតប្រាកដរបស់លោក អេ ភូថង ដែលទទួលបានពីការប្រកួតលើកនេះលោកមិនប្រាប់ទេគ្រាន់តែបញ្ជាក់ថា លោកនឹងផ្ដល់ឱ្យសក្ដិសមទៅនឹងកេរ្តិ៍ឈ្មោះរបស់លោក អេ ភូថង ដែលជាកីឡាករល្បីប្រចាំប្រទេសកម្ពុជា ។ ក្រៅពីនេះ លោកថា បានរៀបចំយុទ្ធនាការផ្សព្វផ្សាយនៅតាមបណ្ដាភូមិជុំវិញស្ថានីយ និងក្នុងរាជធានីភ្នំពេញដើម្បីស្វែងរកការជួយឧបត្ថម្ភបន្ថែមពីសប្បុរសជនផងដែរ ដែលរហូតមកទល់ពេលនេះ មានសប្បុរសជនមួយចំនួនបានប្រកាសជួយជាបណ្ដើរៗហើយ ។
លោកក៏បានធ្វើលិខិតអញ្ជើញតំណាងក្រុមហ៊ុនមួយចំនួនដែលជាដៃគូឧបត្ថម្ភកម្មវិធីប្រកួតប្រចាំស្ថានីយទូរទស្សន៍ភីអិនអិនឱ្យពួកគាត់មកចូលរួមទស្សនា ហើយសង្ឃឹមថានឹងទទួលបានការជួយឧបត្ថម្ភបន្ថែមទៀតពីពួកគាត់មិនខាន ។ ដូច្នេះ ក្នុងនាមរូបលោកតំណាងឱ្យស្ថានីយទូរទស្សន៍ភីអិនអិន សូមអំពាវនាវដល់សាធារណជនឱ្យចូលរួមទស្សនា និងឧបត្ថម្ភដល់កម្មវិធីប្រកួតដែលមិនធ្លាប់មាននេះឱ្យបានច្រើនដើម្បីជួយដល់មន្ទីរពេទ្យគន្ធបុប្ផា ។
គួររំលឹកផងដែថា លោក អេ ភូថង បានចាប់យកអាជីពជាអ្នកប្រដាល់តាំងពីឆ្នាំ១៩៩០មកម៉្លេះ ។ លោកធ្លាប់ដណ្ដើមបានខ្សែក្រវាត់ជើងឯកចំនួន៤ក្នុងនោះខ្សែក្រវាត់ស្រាបៀរ ABCទម្ងន់៥៤គីឡូក្រាម១ ខ្សែក្រវាត់ប៉ុស្តិ៍លេខ៥ទម្ងន់៦០គីឡូក្រាម១ និងខ្សែក្រវាត់ពិភពលោកចំនួន២គឺទម្ងន់៧៣គីឡូក្រាម១និងទម្ងន់៨០គីឡូក្រាម១ ។ លោកបានរៀបការនៅឆ្នាំ១៩៩៧ជាមួយភរិយាឈ្មោះ សាំង សុម៉ាលី ដែលសព្វថ្ងៃធ្វើជាអាជ្ញាកណ្ដាលប្រចាំស្ថានីយទូរទស្សន៍បាយ័ន ។ ចាប់តាំងពីលោករៀបការមកទល់នឹងពេលនេះ លោកមានកូនចំនួន៤នាក់គឺប្រុស៣ស្រី១ ដោយកូនៗរបស់លោកទាំងអស់សុទ្ធតែជាអ្នកប្រដាល់ ៕
ចែករំលែកព័តមាននេះ