ខេត្តកណ្ដាល ៖ យុវជនម្នាក់បើកម៉ូតូបោះពួយលឿនទៅបុកជាមួយរ៉ឺម៉កចតស្ងៀមនៅលើផ្លូវពីក្រោយបោកខ្ទប់ស្លាប់ភ្លាមៗកាលពីវេលាម៉ោង១០និង១០នាទីយប់ ថ្ងៃទី២៩ ខែឧសភា នៅចំណុចផ្លូវលេខ២១ ភូមិភូមិថ្មី១ សង្កាត់តាខ្មៅ ក្រុងតាខ្មៅ ខេត្តកណ្ដាល ។ មន្ត្រីនគរបាល ចរាចរណ៍ក្រុងតាខ្មៅបានឱ្យដឹងថា ជនរងគ្រោះដែលបានស្លាប់ឈ្មោះ អ៊ីវ សុខហេង ភេទ ប្រុស អាយុ១៧ឆ្នាំ បច្ចុប្បន្នរស់នៅភូមិថ្មី១ សង្កាត់តាខ្មៅ ក្រុងតាខ្មៅ ខេត្តកណ្ដាល ។
តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុខាងលើបានឃើញរ៉ឺម៉ក៣គ្រឿងបានឈប់តំរៀបគ្នានៅខាងលិចផ្លូវ២១ក្នុងទិសដៅពីជើងទៅត្បូងដើម្បីចូលចាក់សាំង ដោយរ៉ឺម៉កទី៣ឈប់ក្រោយគេបានលានកន្ទុយចេញមកក្រៅ ប្រហែល៥នាទីក្រោយមក ស្រាប់តែមានម៉ូតូ១គ្រឿងម៉ាក HONDA C125 ពណ៌ខ្មៅ ជិះតែម្នាក់ឯងដោយជនរងគ្រោះបើកបរក្នុងទិសដៅពីជើងទៅត្បូងក្នុងល្បឿនលឿនបានទៅបុកពីក្រោយកន្ទុយរ៉ឺម៉កទី៣ផ្នែកខាងឆ្វេងដែលកំពុងឈប់នោះបណ្តាលឲ្យបោកខ្ទប់ដួលជុងនឹងដែករ៉ឺម៉ក ជនរងគ្រោះស្លាប់មួយរំពេចនៅកន្លែងកើតហេតុ ។ ចំណែកម្ចាស់រ៉ឺម៉កឃើញហេតុការកើតឡើងដូចនេះបានប្រញាប់បើករ៉ឺម៉កយ៉ាងលឿនគេចបាត់ទៅ ។ បន្តិចក្រោយមកក៏ឃើញក្រុមគ្រួសាររបស់សពមកយកសពយកទៅបាត់តែម្តង ។ បន្ទាប់មកសមត្ថកិច្ចជំនាញបច្ចេកទេសក្រុងតាខ្មៅទទួលបានដំណឹងនេះដោយមានការសហការណ៍ជាមួយនឹងសមត្ថកិច្ចជំនាញបច្ចេកទេសខេត្តកណ្តាល បានចុះទៅពិនិត្យសាកសពដល់ផ្ទះរបស់ជនរងគ្រោះ ។
មន្ត្រីនគរបាលបានឱ្យដឹងបន្ថែមថា តាមការពិនិត្យទៅលើសាកសពនៅលើខ្លួនសពមានស្នាមរលាត់ជាច្រើនកន្លែងតែកន្លែងដែលសំខាន់គឺនៅត្រង់គល់.កផ្នែកខាងស្តាំដោយមានស្នាមធ្លុះជ្រៅដល់ឆ្អឹង២កន្លែងមានទំហំធំដែលបានត្រូវបានប៉ះទង្គិចទៅនឹងរបស់រឹង(មុខទាល) ។ អាចសន្និដ្ឋានបានថា សាកសពខាងលើគឺពិតជាបានស្លាប់ដោយសារគ្រោះថ្នាក់ចរាចរណ៍ប្រាកដមែន ។ សពត្រូវបានប្រគល់ជូនក្រុមគ្រួសារដើម្បីធ្វើបុណ្យតាមប្រពៃណី ៕
ចែករំលែកព័តមាននេះ