រាជធានីភ្នំពេញ ៖ ដើម្បីលើកតម្កើង និងបំផុសឲ្យប្រជាពលរដ្ឋខ្មែរប្រើប្រាស់ផលិតផលក្នុងស្រុក ជំនួសឲ្យផលិតផលនាំចូលពីបរទេស រាជរដ្ឋាភិបាលតាមរយៈក្រសួងពាណិជ្ជកម្ម និងស្ថាប័នពាក់ព័ន្ធ បានខិតខំបង្កើត
រាជធានីភ្នំពេញ ៖ ដើម្បីលើកតម្កើង និងបំផុសឲ្យប្រជាពលរដ្ឋខ្មែរប្រើប្រាស់ផលិតផលក្នុងស្រុក ជំនួសឲ្យផលិតផលនាំចូលពីបរទេស រាជរដ្ឋាភិបាលតាមរយៈក្រសួងពាណិជ្ជកម្ម និងស្ថាប័នពាក់ព័ន្ធ បានខិតខំបង្កើតកម្មវិធី និងយុទ្ធនាការនានា ធ្វើយ៉ាងណាជំរុញផលិតផលជាតិចូលក្នុងទីផ្សារឲ្យបានទូលំទូលាយ និងឈានទៅនាំចេញដើម្បីជំរុញកំណើនសេដ្ឋកិច្ចជាតិ។ ក្នុងនោះកម្ពុជារំពឹងថា ផលិតផលខ្មែរនឹងបន្តបង្ហាញវត្តមានកាន់តែច្រើននៅលើទីផ្សារនានា ជាពិសេស ផ្សារទំនើបធំៗនៅក្នុងប្រទេស និងផ្សារអន្តរជាតិនៅបណ្ដាប្រទេសផ្សេងៗ ។
ថ្លែងក្នុងពិធីបិទពិព័រណ៍ផលិតផលខ្មែរឆ្នាំ២០១៧ ដែលបានរៀបចំនៅខេត្តបាត់ដំបង លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មមានប្រសាសន៍ថា ការរៀបចំយុទ្ធនាការទិញផលិតផលខ្មែរនាពេលនេះ គឺជាយុទ្ធសាស្ត្រជំរុញការនាំចេញនៅនឹងកន្លែងប្រកបដោយប្រសិទ្ធភាព ហើយក្រសួងពាណិជ្ជកម្មនឹងនៅតែបន្ត គាំទ្រការអភិវឌ្ឍវិស័យឯកជន តាមរយៈការចរចាបើកទីផ្សារថ្មីៗបន្ថែមទៀតជូនផលិតករ និងពាណិជ្ជករ ក្នុងការធ្វើពិពិធកម្មការនាំចេញផលិតផលឲ្យបានអតិបរមា ដើម្បីនាំមកនូវប្រាក់ចំណូលកាន់តែច្រើនសម្រាប់ប្រទេសជាតិ ។
លោករដ្ឋមន្ត្រីបានកោតសរសើរដល់កិច្ចខិតខំប្រឹងប្រែងរបស់មន្ត្រីគ្រប់ជាន់ថ្នាក់ ក៏ដូចជាអាជ្ញាធរខេត្តបាត់ដំបង ព្រមទាំងស្ថាប័នពាក់ព័ន្ធ ដែលបានសហការរៀបចំព្រឹត្តិការណ៍ដ៏មានសារសំខាន់នេះឡើង ក្នុងគោលបំណងបំផុសឲ្យប្រជាពលរដ្ឋកម្ពុជាងាកមកគាំទ្រ និងប្រើប្រាស់ផលិតផលក្នុងស្រុក ជំនួសផលិតផលនាំចូលពីបរទេស ។
យោងតាមសេចក្តីប្រកាសព័ត៌មានព្រឹត្តិការណ៍ពិព័រណ៍ផលិតផលខ្មែរ ក្នុងយុទ្ធនាការទិញផលិតផលខ្មែរនៅខេត្តបាត់ដំបងនេះ បានធ្វើឡើងរយៈពេល៤ថ្ងៃជាប់គ្នា គឺចាប់ពីថ្ងៃទី២៥ ដល់ថ្ងៃទី២៨ ខែឧសភា ដោយទទួលបានការចូលរួមពីសហគ្រាសធុនតូច-មធ្យមមកពីគ្រប់រាជធានី-ខេត្តចំនួន១២០ស្តង់ និងទាក់ទាញការចូលរួមយ៉ាងច្រើនកុះករពីប្រជាពលរដ្ឋ និងភ្ញៀវទេសចរនៅក្នុងខេត្តបាត់ដំបង ។
ក្រសួងពាណិជ្ជកម្ម នឹងរៀបចំព្រឹត្តិការណ៍ដូចគ្នានេះទៀត នៅលើទឹកដីខេត្តស្វាយរៀងនាខែមិថុនា នៅរាជធានីភ្នំពេញនាខែតុលា និងនៅខេត្តកែបនាខែធ្នូ ខាងមុខនេះ ។
លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យម បានថ្លែងថា លោកគាំទ្រពេញទំហឹងចំពោះការរៀបចំពិព័រណ៍ផលិតផល និងជំរុញការទិញផលិតផលខ្មែរ ។
ជាមួយគ្នានេះ លោកសួរថា តើពិព័រណ៍បែបនេះធ្វើមួយឆ្នាំប៉ុន្មានដង ហើយក្រសួងបែរជាបើកដៃឲ្យថៃដើរលក់ទំនិញតាមភូមិ ស្រុក ដែលជាការសម្លាប់អ្នកក្នុងស្រុកទៅវិញ ។
លោកបន្តថា ៖ « មិនមែនសមាហរណកម្មអាស៊ាន បើកឲ្យគេមកលក់ទំនិញដោយសេរី ហើយសម្លាប់អ្នកក្នុងស្រុកនោះទេ » ៕
ចែករំលែកព័តមាននេះ