អស្ចារ្យ! បុកគេហើយចង់ទារសំណងពីគេទៀត
រាជធានីភ្នំពេញ៖ រថយន្ត២គ្រឿង ដែលមួយគ្រឿងម៉ាកហាយឡែនឌ័រនិងមួយគ្រឿងទៀតម៉ាកកាមរី បានបុកគ្នាពេញទំហឹងនៅផ្លូវបំបែកជាបួន បណ្តាលឲ្យខូចខាតទាំងសងខាង តែមិនមានរងរបួសដល់អ្នក
រាជធានីភ្នំពេញ៖ រថយន្ត២គ្រឿង ដែលមួយគ្រឿងម៉ាកហាយឡែនឌ័រនិងមួយគ្រឿងទៀតម៉ាកកាមរី បានបុកគ្នាពេញទំហឹងនៅផ្លូវបំបែកជាបួន បណ្តាលឲ្យខូចខាតទាំងសងខាង តែមិនមានរងរបួសដល់អ្នកជិះនៅក្នុងរថយន្តទេ កាលពីវេលាម៉ោង១១និង៣០នាទីយប់ថ្ងៃទី២៩ ខែឧសភា នៅទល់មុខហាងយីហោ«ម៉ូតូលក់សាច់អាំង» កែងផ្លូវលេខ១៦៣និងផ្លូវលេខ៤៦៨ សង្កាត់ទួលទំពូងទី១ ខណ្ឌចំការមន ។
រថយន្តហាយឡែនឌ័រ ពណ៌ទឹកប្រាក់ អត់មានផ្លាកលេខ ជិះជាលក្ខណៈគ្រួសារដែលមានប្តីប្រពន្ធនិងកូនស្រីតូចម្នាក់ ធ្វើដំណើរតាមផ្លូវលេខ៤៦៨ពីកើតទៅលិច ។ ចំណែករថយន្តកាមរី ពណ៌ខ្មៅ ពាក់ផ្លាកលេខ ភ្នំពេញ ២O-២៣៥៧ បើកបរដោយបុរសជនជាតិចិន និងរួមដំណើរដោយនារីខ្មែរម្នាក់ ធ្វើដំណើរតាមផ្លូវលេខ១៦៣ពីត្បូងទៅជើង លុះមកដល់ចំណុចខាងលើ ដែលជាផ្លូវបំបែកជា៤ក៏បានបុកគ្នាពេញទំហឹងតែម្តង ។ គ្រោះថ្នាក់នេះ បណ្តាលឲ្យរថយន្តហាយឡែនឌ័រក្រពឹតថ្ពាល់មុខចំហៀងខាងឆ្វេង និងបាក់កង់ចំហៀងខាងឆ្វេង ចំណែករថយន្តកាមរីក្រពឹតខាងមុខចំហៀងខាងស្ដាំបន្តិចបន្តួច ។
ក្រោយកើតហេតុ ភាគីខាងរថយន្តហាយឡែនឌ័រទាមទារសំណង ឯខាងរថយន្តកាមរីសុំស្មើគ្នា តែខាងរថយន្តហាយឡែនឌ័រអត់ព្រម លុះក្រោយមកមិត្តភក្តិខាងរថយន្តហាយឡែនឌ័រមកដល់ឃើញថារថយន្តមិត្តភក្ដិខុសក៏សុខចិត្តស្មើគ្នាវិញ ។ ប៉ុន្តែលុះឮថា អ្នកបើករថយន្តកាមរីជាជនជាតិចិន ស្រាប់តែទាមទារឲ្យខាងរថយន្តកាមរីសងវិញ ធ្វើឲ្យមានការជជែកគ្នារហូតទាល់តែសមត្ថកិច្ចជំនាញមកដល់ ។
ដោយសារជជែកមិនត្រូវគ្នា សមត្ថកិច្ចក៏ធ្វើការវាស់វែងរួចនាំយករថយន្តទាំង២គ្រឿងទៅរក្សាទុកនៅអធិការដ្ឋាននគរបាលខណ្ឌចំការមនដើម្បីធ្វើការដោះស្រាយតាមច្បាប់ ៕
ចែករំលែកព័តមាននេះ