រាជធានីភ្នំពេញ ៖ បុរសម្នាក់ត្រូវគេដឹងថា ជិះម៉ូតូត្រឡប់មកផ្ទះនៅឃុំព្រែកតាមាក់ ប៉ុន្តែដោយសារតែស្រវឹងខ្លាំងពេក បានជិះហួសមកដល់ភ្នំពេញហើយចតម៉ូតូទុកចោលតាមចិញ្ចើមផ្លូវដើរទៅដេកនៅក្រោមដើមឈើ ស្រាប់តែបានបង្កការភ្ញាក់ផ្អើល កាលពីវេលាម៉ោង០២ និង២០នាទីរំលងអធ្រាត្រឈានចូលថ្ងៃទី២៩ ឧសភា ២០១៧ តាមបណ្តោយផ្លូវព្រះសីហនុ ចំណុចមុខរោងកុនគីរីរមចាស់ ក្នុងសង្កាត់វាលវង់ ខណ្ឌដូនពេញ ។
ប្រភពឱ្យដឹងថា មុនពេលកើតហេតុ គេឃើញបុរសខាងលើ ស្ថិតក្នុងស្ថានភាពស្រវឹងស្រាឡើងជោកជាំ ជិះម៉ូតូម៉ាកSLពណ៌ទឹកប្រាក់ ពាក់ស្លាកលេខភ្នំពេញ1T7392 ធ្វើដំណើរតាមបណ្តោយផ្លូវព្រះសីហនុ ក្នុងទិសដៅពីកើតទៅលិច ខណៈពេលមកដល់ចំណុចកើតហេតុ ក៏ឈប់ម៉ូតូនៅតាមចិញ្ចើមផ្លូវ ហើយដើរទៅដេកនៅក្រោមដើមឈើ បង្កការភ្ញាក់ផ្អើលដល់សមត្ថកិច្ចចុះទៅកន្លែងកើតហេតុ បានជួយដាស់បុរសដែលស្រវឹងអោយគាត់ងើបត្រឡប់ទៅផ្ទះវិញ ពីព្រោះខ្លាចគាត់មានគ្រោះថ្នាក់ ឬត្រូវជនឆ្លៀតឱកាសលួចពេលគាត់កំពុងដេកបែបនេះ ។
ខណៈសមត្ថកិច្ចដាស់ឱ្យភ្ញាក់ ហើយបានសួរនាំគាត់ប្រាប់ថា គាត់ទើបតែមកពីខេត្តព្រៃវែង ក្រោយទៅលេងមិត្តភក្តិនៅទីនោះ ។ រួចហើយជិះម៉ូតូត្រឡប់មកផ្ទះវិញ នៅព្រែកតាមាក់ ស្រុកខ្សាច់កណ្តាល ខេត្តកណ្តាល ប៉ុន្តែដោយសារស្រវឹងខ្លាំងពេក ជិះហួសផ្ទះមកដល់ភ្នំពេញទៅមុខលែងរួចតែម្តង ។
ចែករំលែកព័តមាននេះ