ពេលវេលានៃការទន្ទឹងរង់ចាំរបស់អ្នកគាំទ្រកម្ពុជា ពិតជាមិនខកបំណងមែន ក្នុងការសម្តែង ក៏ដូចជាការបង្ហាញវត្តមានជាលើកដំបូងរបស់កំពូលតារាចម្រៀងស្រី K-Pop នៅលើទឹកដីប្រទេសកម្ពុជា របស់ Jessi គ្រាន់តែឃើញនាងបង្ហាញខ្លួននៅលើឆាកភ្លាម មហាជន ក៏ដូចជា
រាជធានីភ្នំពេញ ៖ ពេលវេលានៃការទន្ទឹងរង់ចាំរបស់អ្នកគាំទ្រកម្ពុជា ពិតជាមិនខកបំណងមែន ក្នុងការសម្តែង ក៏ដូចជាការបង្ហាញវត្តមានជាលើកដំបូងរបស់កំពូលតារាចម្រៀងស្រី K-Pop នៅលើទឹកដីប្រទេសកម្ពុជា របស់ Jessi គ្រាន់តែឃើញនាងបង្ហាញខ្លួននៅលើឆាកភ្លាម មហាជន ក៏ដូចជាហ្វេនៗដែលមានវត្តមាននៅក្នុង Concert ទាំងមូលហាក់មានការហ៊ោកញ្ជ្រៀវយ៉ាងខ្លាំងនៅក្នុងកម្មវិធី Year of The Tiger ដែលរៀបចំប្រគំតន្ត្រីសម័យ និងមានការចូលរួមពីសំណាកសិល្បករក្នុងប្រទេសកម្ពុជា និងកំពូលតារាចម្រៀង K-Pop របស់ប្រទេសកូរ៉េខាងត្បូង Jessi នៅយប់ថ្ងៃទី៣ ខែធ្នូ ឆ្នាំ២០២២កន្លងទៅនេះ ដែលប្រព្រឹត្តិនៅឯបរិវេណកោះពេជ្រ ក្នុងកម្មវិធី Year of The Tiger ហើយតារាស្រីរូបនេះ រួសរាយរាក់ទាក់ ចេះលេងសើចជាមួយហ្វេនៗ រហូតធ្វើអោយអ្នកគាំទ្រដែលនៅប្រទេសកម្ពុជាទាំងមូល ស្រលាញ់ចូលចិត្តតារាកូរ៉េ សញ្ជាតិអាមេរិក រូបនេះកាន់តែខ្លាំងឡើងៗ។
ហើយថែមទាំងមានការរាំលេងសប្បាយរីករាយមិនធម្មតានោះទេ ក្រោយពេលបានជួបអាយដលរបស់ពួកគេជាច្រើនដួង ជាពិសេសតារាចម្រៀង P-pop ដ៏ល្បីល្បាញ Jessi នេះតែម្ដង ពិតជាកក្រើកខ្លាំងណាស់នៅក្រោមដំណក់ទឹកភ្លៀង ហើយក៏អាចនិយាយបានថា វាជាលើក១ហើយ ដែលតារាស្រីប្រចាំនៅប្រទេសកូរ៉េខាងត្បូងរូបនេះ បង្ហាញវត្តមាននៅលើទឹកដីប្រទេសកម្ពុជា។
នៅពេលកំពុងតែសម្ដែងការច្រៀងនៅបទ «Cold Blooded» Jessi បាននិយាយនៅលើឆាកថា «នៅក្នុងអត្ថន័យបទនេះ គាត់ចង់អោយនារីៗទាំងអស់មានភាពក្លាហានក្នុងការបញ្ចេញមតិ ក្រោកឈរសំរាប់ខ្លួនឯង (Speak For Yourself) មិនអោយនរណាម្នាក់គាបសង្កត់យើងបាន។ ហេតុនេះហើយបានជាគាត់បង្កើតបទ Cold Blooded នេះឡើងមក»។
តារាស្រីរូបនេះក៏បាននិយាយប្រាប់អ្នកគាំទ្រទៀតថា «នាងជាតារាចម្រៀងម្នាក់ ដែលចូលចិត្តនិយាយ Curse Words (ពាក្យមិនសមរម្យ) ចូលចិត្តស្លៀកពាក់ Sexy ប៉ុន្តែដោយសារមកកម្ពុជា ក្រុមការងារបានហាមគាត់មិនអោយនិយាយ Curse Word និងពាក់រាងជិតៗ ប៉ុន្តែលើកក្រោយគាត់នឹងធ្វើ Concert Tour របស់គាត់នៅកម្ពុជា ចឹងមានលក្ខណៈផ្ទាល់ខ្លួន គាត់អាចនិយាយពាក្យ Curse តាមចិត្តគាត់ចង់ JESSI ស្រឡាញ់កម្ពុជាខ្លាំង»។ នាងសន្យាថា «នឹងវិលត្រឡប់មកកម្ពុជាម្តងទៀតជាមួយ Solo Concert របស់នាងផ្ទាល់តែម្តង» ហើយ Jessi ក៏បាននិយាយបន្តថា «គាត់ចូលចិត្តអាកាសធាតុនៅកម្ពុជាណាស់ ទោះបីជាក្តៅបន្តិចក៏ពិតមែន ប៉ុន្តែគាត់ចូលចិត្ត»។
យ៉ាងណាមិញ មិនត្រឹមតែមានការចូលរួមសម្តែងយ៉ាងអស្ចារ្យពីកំពូលតារាចម្រៀង Jessi នោះទេ ក្នុងនោះក៏មានកំពូលតារាចម្រៀងប្រុសស្រីកម្ពុជាជាច្រើនដួងទៀតចូលរួមផងដែរ មានដូចជា ការសម្តែងពីក្រុមដ៏ល្បីក្មេងខ្មែរ Vitou, Vuthea និង RuthKo មកពីក្រុម Hip-Hop Klapyahandz តារាស្រីកញ្ញា Tey$ ដែលជាតារាចម្រៀងរ៉េបស្រីដំបូងបង្អស់របស់ព្រះរាជាណាចក្រកម្ពុជា តារាចម្រៀងលោក G-Devith ដែលជាតារាចម្រៀងរ៉េបដែលមានភាពល្បីល្បាញយ៉ាងខ្លាំងដែលគ្រប់គ្នាកំពុងទន្ទឹងរង់ចាំ និងជាចុងក្រោយតារាកូរ៉េ JESSI តែម្ដង ដែលជាកំពូលតារា K-POP ដែលត្រូវបានរំពឹងទុកថានឹងអង្រួនឆាកដ៏អស្ចារ្យ និងបេះដួងទស្សនិកជនទាំងអស់នាំគ្នាហ៊ោកញ្ជ្រៀវ បែកបំពង់ក.ចោលតែម្ដង។
គួរបញ្ជាក់ផងដែរថា Jessica Ho កើតថ្ងៃទី១៧ ខែធ្នូ ឆ្នាំ១៩៨៨ ដែលត្រូវបានគេស្គាល់ច្បាស់ដោយឈ្មោះរបស់នាងថា Jessi គឺជាអ្នករ៉េប តារាចម្រៀង និងជាអ្នកកម្សាន្តជនជាតិអាមេរិក ដែលមានមូលដ្ឋាននៅប្រទេសកូរ៉េខាងត្បូង។ នាងកើតនៅទីក្រុងញូវយ៉ក ធំធាត់នៅរដ្ឋ New Jersey ហើយបានផ្លាស់ទៅកូរ៉េខាងត្បូងនៅអាយុ១៥ឆ្នាំ។ Jessi ដើមឡើយ បានបង្ហាញខ្លួនក្នុងប្រទេសកូរ៉េខាងត្បូងក្នុងឆ្នាំ២០០៥ ហើយជាបណ្ដោះអាសន្ននៃក្រុមហ៊ីបហប Uptown ក្នុងឆ្នាំ២០០៦។ បន្ទាប់ពីបាត់មុខមួយរយៈមក នាងត្រឡប់មកតន្ត្រីវិញជាផ្នែកមួយនៃក្រុមហ៊ីបហប Lucky J និងជាអ្នកលេងភ្លេងនៅក្រោម YMC Entertainment រហូតដល់ការរំសាយក្រុមនៅឆ្នាំ២០១៦។
បន្ទាប់ពីបញ្ចប់កិច្ចសន្យាជាមួយ YMC ក្រោយមក នាងបានផ្លាស់ទៅផលិតកម្ម Psy របស់ផលិតកម្ម P Nation ក្នុងឆ្នាំ២០១៩ ជាក្រុមដំបូង។ សិល្បកររូបនេះបានចុះហត្ថលេខានៅក្រោមស្លាកសញ្ញា ដែលនាងបានបន្តអាជីពទោលរបស់នាង រហូតដល់ការចាកចេញរបស់នាងពីស្លាកនៅឆ្នាំ២០២២។ បទចម្រៀងទោល និងការសហការជាច្រើនរបស់នាងបានទទួលជោគជ័យក្នុងផ្នែកពាណិជ្ជកម្ម ដោយមានបទចម្រៀងកំពូលទាំង១០ ចំនួន៥ នៅក្នុងតារាង Gaon Digital Chart រួមទាំងទោលដែលមានចំណាត់ថ្នាក់ខ្ពស់បំផុតរបស់នាងផងដែរ។ បទចម្រៀង “Nunu Nana” និងបទចម្រៀង “Don’t Touch Me” ដែលជាផ្នែកនៃ Refund Sisters ។
Jessi គឺជាវត្តមានដ៏លេចធ្លោក្នុងកម្មវិធីចម្រុះរបស់កូរ៉េ។ នាងទទួលបានភាពល្បីល្បាញជាផ្នែកនៃរដូវកាលទី១ នៃកម្មវិធីប្រកួតប្រជែងហ៊ីបហប Mnet កម្មវិធី Unpretty Rapstar ជាកន្លែងដែលនាងជាប់ចំណាត់ថ្នាក់លេខ២ ។ នាងក៏បានបម្រើការជាចៅក្រមក្នុងកម្មវិធីប្រកួតប្រជែង High School Rapper និង Cap-teen ក៏ដូចជាពិធីករក្នុងកម្មវិធីជជែកតាម YouTube ផ្ទាល់របស់នាងជាមួយ SBS, Jessi’s Showterview ។ នាងក៏គួរឱ្យកត់សម្គាល់ផងដែរ សម្រាប់ការបង្ហាញខ្លួនជាទៀងទាត់នៅក្នុងកម្មវិធីជាមួយតារាកំប្លែង Yoo Jae-suk ដូចជាការបង្ហាញខ្លួនជាភ្ញៀវនៅក្នុង Running Man និង Hangout ជាមួយ Yoo ក៏ដូចជាការជាប់ជាប្រចាំនៅក្នុង Sixth Sense ៕
ចែករំលែកព័តមាននេះ