ក្រុងប៉ោយប៉ែត ៖ មេឃភ្លៀងធ្លាក់ផ្ទួនៗជាប់គ្នាប្រមាណបីថ្ងៃមកហើយផ្លូវជាច្រើនខ្សែរួមទាំងផ្ទះសំបែង ចំណតរថយន្ត នៅជុំវិញផ្សារអគ្គថ្មី ស្ថិតក្នុងភូមិក្បាលស្ពាន២ និងភូមិបាលិលេយ្យ សង្កាត់-ក្រុងប៉ោយប៉ែត បានជនលិច ជាបន្តបន្ទាប់ដោយកន្លែងខ្លះត្រូវបានគេដាក់បារ៉ាស់ហាមឃាត់មិនអនុញ្ញាតឲ្យរថយន្តបើកឆ្លងកាត់ឡើយ ។
តាមប្រភពពីប្រជាពលរដ្ឋរស់នៅតំបន់ជាយដែនកម្ពុជា-ថៃក្រុងប៉ោយប៉ែតបានឲ្យដឹងថា មេឃភ្លៀងបានធ្លាក់មកជាប់គ្នាប្រមាណបីថ្ងៃមកហើយធ្វើឲ្យផ្លូវជាច្រើនខ្សែនៅក្នុងទីប្រជុំជនក្រុងប៉ោយប៉ែតរួមទាំងទីវត្តអារាម សាលារៀន និងផ្ទះប្រជាពលរដ្ឋ មួយចំនួនកំពុងតែរងនូវការលិចលុងដោយជំនន់ទឹកភ្លៀងនេះតែម្តង ។ ផ្លូវដែលលិចលុងខ្លាំងជាងគេមានផ្លូវកែងស្តង់ជ្រូក ផ្លូវទល់មុខសុធារ៉ា ដូរលុយ ។ ចំណែកផ្ទះប្រជាពលរដ្ឋនៅជុំវិញសងខាងផ្លូវទាំងនោះក៏កំពុងតែរងនូវការគំរាមកំហែងបំផ្លាញទ្រព្យសម្បត្តិ ពីទឹកជំនន់ទឹកភ្លៀងនេះដែរ ។ មិនតែប៉ុណ្ណោះ នៅមានទីវត្តអារាម មានដូចជាវត្តថ្មី និងសាលារៀនបឋមសិក្សាព្រហ្មនិមិត្ត ចំណតរថយន្តតូច ធំ របស់ក្រុងប៉ោយប៉ែតទាំងអស់ត្រូវបានជន់លិចទាំងស្រុងតែម្តង ។
ប្រជាពលរដ្ឋបានលើកឡើងទៀតថា នៅតំបន់ប៉ោយប៉ែតនេះខណៈមានភ្លៀងធ្លាក់មកម្តងៗមិនត្រឹមតែលិចផ្លូវប៉ុណ្ណោះទេ ចំណែកផ្លូវលំមួយចំនួនធ្វើឲ្យប្រជាពលរដ្ឋមានការពិបាកធ្វើដំណើរយ៉ាងខ្លាំងដោយតំបន់នេះដីមានសភាពរអិលដូចខ្លាញ់ និងផ្លូវខ្លះទៀតមានភួកជ្រាំមិនអាចឲ្យប្រជាពលរដ្ឋធ្វើដំណើរឆ្លងកាត់បានឡើយ ។
ប្រជាពលរដ្ឋបានអំពាវនាវដល់អាជ្ញាធរមានសមត្ថកិច្ចនៅក្នុងមូលដ្ឋានគួរមានវិធានការធ្វើយ៉ាងណាជួយរកដំណោះស្រាយនូវបញ្ហាទាំងអស់នេះឲ្យបានទាន់ពេលវេលាផងចៀសវាងកុំឲ្យជំនន់ទឹកភ្លៀងលិចផ្ទះសំបែងរបស់ពួកគាត់តទៅទៀត និងរួមទាំងផ្លូវលំផងដែរគួរចាត់វិធានការជួយសម្រួលចាក់ក្រួសក្រហមដើម្បីឲ្យពួកគាត់ងាយស្រួលក្នុងការធ្វើដំណើរដើម្បីប្រកបរបរចិញ្ចឹមជីវិតក្នុងក្រុមគ្រួសារនារដូវវស្សាខាងមុខនេះឲ្យបានល្អប្រសើផងទាន ! ៕
ចែករំលែកព័តមាននេះ