ខេត្តប៉ៃលិន ៖ បុរសចំណាស់ពិការមានជំងឺប្រចាំកាយម្នាក់រស់នៅកំព្រាឯកោម្នាក់ឯង បន្ទាប់ពីម្តាយជរាបានស្លាប់ចោលកាលពីជាង៣ខែកន្លងទៅដោយរស់នៅវេទនាកំសត់គួរឱ្យអាសូរហើយបានអ្នកជិតខាងឃើញក៏ផ្តល់អាហារស្ទើររាល់ថ្ងៃផងដែរ ។ បុរសពិការរស់នៅឯកោម្នាក់ឯងមានឈ្មោះ ឆាយ ឆៃ អាយុ៦០ឆ្នាំ មានជំងឺប្រចាំកាយ មានស្រុកកំណើតរស់នៅភូមិគោកក្រសាំង ឃុំតាឡំ ស្រុកមង្គលបូរី ខេត្តបន្ទាយមានជ័យ មានម្តាយឈ្មោះ យ៉ៃ អាំ អាយុ៨០ឆ្នាំ(ស្លាប់) ដោយចូលទៅរស់នៅក្នុងខេត្តប៉ៃលិនអស់រយៈពេលជាង១០ឆ្នាំមកហើយនៅក្នុងភូមិអូរតាពុកក្រោម សង្កាត់ទួលល្វា ក្រុងប៉ៃលិន ។
ប្រភពព័ត៌មានពីបុរសខាងលើបានឱ្យដឹងថា គាត់អត់មានបងប្អូននោះទេហើយបានសុំដីគេសង់ផ្ទះស្នាក់នៅពីរនាក់ម្តាយក្បែរផ្ទះអ្នកជិតខាងលុះដល់ម្តាយស្លាប់កាលពីជាង៣ខែកន្លងទៅដោយសារវ័យចំណាស់ទើបធ្វើឱ្យគាត់មានការលំបាកយ៉ាងខ្លាំង ។ គាត់បន្តទៀតថា កាលរស់នៅជាមួយម្តាយគាត់មិនអាចធ្វើការងារអ្វីកើតនោះទេព្រោះពិការដៃជើង ខណៈមានជំងឺដំបៅស៊ីរូងដៃ និងជើងមើលមិនជាទាល់តែសោះ ។ គាត់បញ្ជាក់ទៀតថា បច្ចុប្បន្ននេះបានអ្នកជិតខាងគេហុចបាយម្ហូបឱ្យរាល់ថ្ងៃទម្រាំនឹងដល់ថ្ងៃស្លាប់ចាកចោលលោកនេះ ហើយគាត់មិនប្រាថ្នាអ្វីច្រើននោះទេ គឺគ្រាន់តែចង់បានម្ហូបអាហារទទួលទានគ្រប់គ្រាន់ប៉ុណ្ណោះនោះស្លាប់ទៅពិតជាបិទភ្នែកជិតហើយ ។ ម្យ៉ាងវិញទៀតជំងឺរបស់គាត់ពីមួយថ្ងៃទៅមួយថ្ងៃកាន់តែរាលដាលមើលមិនជានោះឡើយ ហើយពេលគេឃើញមានបញ្ហាបែបនេះជួនកាលក៏ខ្ពើមរអើមផងដែរ ។
ចំណែកអ្នកជិតខាងម្នាក់បានឱ្យដឹងថា គាត់ពិតជាមានការអាណិតអាសូរដល់បុរស ចំណាស់ពិការខាងលើខ្លាំងណាស់ហើយជារៀងរាល់ព្រឹកល្ងាចតែងតែឱ្យកូនដួសបាយម្ហូបយកទៅជូនគាត់ពិសារដោយយកតែបុណ្យប៉ុណ្ណោះ ។ ប្រភពបន្តទៀតថា កាលពីម្តាយ គាត់នៅរស់ខាងកាកបាទក្រហមខេត្តប៉ៃលិនធ្លាប់ជួយទំនុកបម្រុងដែរក្នុង១ខែទទួលបាន ថវិកាចំនួន១០ម៉ឺនរៀល តែក្រោយមកក៏ស្ងាត់ទៅវិញដោយមានដំណឹងថា អាចនឹងជួយដល់បុរសពិការនោះបន្តទៀត ។ លើសពីនេះបើសិនជាមានសប្បុរសជននៅក្នុងប្រទេស ឬ នៅក្រៅប្រទេសណាមានបំណងជួយទំនុកបម្រុងការរស់នៅរបស់បុរសខាងលើនេះក៏កាន់ តែវិសេសទៅទៀតផងដែរ ៕
ចែករំលែកព័តមាននេះ