ខេត្តមណ្ឌលគិរី ៖ រថយន្តទេសចរណ៏ធុន២៥កៅអីមួយគ្រឿងត្រូវបានមន្ត្រីជំនាញខណ្ឌរដ្ឋបាលព្រៃឈើឃាត់បាននៅចំណុចភូមិពូលូង សង្កាត់រមនា ក្រុងសែនមនោរម្យ ក្រោយទទួលបានព័ត៌មានពីកម្លាំងសម្ងាត់ថា រថយន្តនេះមានផ្ទុកឈើខុសច្បាប់ ។ ប្រតិបត្តិការបង្ក្រាបការដឹកជញ្ជូនឈើខុសច្បាប់នេះបានធ្វើឡើងនៅវេលាម៉ោង៨និង៣០នាទីយប់ ថ្ងៃទី២៧ ខែឧសភា ឆ្នាំ២០១៧ ។
ប្រភពបានឲ្យដឹងថា ក្រោយបានដំណឹងពីភ្នាក់ងាររួចមន្ត្រីខណ្ឌរដ្ឋបាលព្រៃឈើមណ្ឌលគិរី ចំនួន៥នាក់បានចេញសកម្មភាពបង្ក្រាបភ្លាមៗដោយឃាត់រថយន្តដឹកឈើខាងលើនៅតាមបណ្តោយផ្លូវជាតិលេខ៧៦ ត្រង់ចំណុចភូមិពូលូង ។ ក្រោយឃាត់បានរថយន្តដឹកបទល្មើស អស់រយៈពេលប្រមាណជាង១ម៉ោង ពោលគឺចាប់បាននៅម៉ោង៧និង៣០នាទីយប់រហូតដល់ម៉ោង៨ម្ចាស់រថយន្តនៅតែមិនព្រមប្រគល់ទៅឲ្យជំនាញ ។ ប្រភពបន្តថា លុះរំលងបានប្រមាណជិតមួយម៉ោងស្រាប់តែមានរថយន្តមួយគ្រឿងម៉ាកឡង់គ្រីស្ស័រ ពណ៌សំបកឪឡឹក ពាក់ស្លាកលេខ ន.ប ដែលគេស្គាល់ថា ម្ចាស់រថយន្តនេះជាអភិបាលរងខេត្តមណ្ឌលគិរីបានទៅឈប់បិទពីមុខរថយន្តរបស់ជំនាញមេព្រៃ និងបានបញ្ជាឲ្យរថយន្តដឹកឈើនោះបើកបន្តទៅមុខដោយសុវត្ថិភាពទៅ ។
ប្រភពបានរាយការណ៏ថា រថយន្តទេសចរណ៏ពាក់ស្លាកលេខ ភ្នំពេញ 3D-5840 ពណ៌លឿង លួចបង្កប់ឈើខុសច្បាប់ខាងលើជារបស់ ចែរឿន ដែលជាឈ្មួញម្នាក់បានរកស៊ីដឹកឈើ និងធ្វើសិប្បកម្មទ្វារបង្អូចជាយូរឆ្នាំមកហើយ ។ ប្រភពថា ការរកស៊ីរបស់ ចែរឿន ពុំដែលមានការរំខានពីសមត្ថកិច្ចម្តងណាឡើយព្រោះតែគាត់បានទំនាក់ទំនងជាមួយសមត្ថកិច្ច និងជំនាញមុនរួចស្រាច់ទៅហើយ ។ សេចក្តីរាយការបានបញ្ជាក់ថា ឈើដែល ចែរឿន កំពុងរកស៊ីរាល់ថ្ងៃរាប់ឆ្នាំមកហើយនោះគឺសុទ្ធតែដឹកចេញពីតំបន់ការពារសត្វព្រៃស្រែពកក្រោយការមើលខុសត្រូវរបស់លោក ឌិន ប៊ុនធឿន នាយកដែនជម្រក និងក្រោមការគ្រប់គ្រងពីលោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរី ៕
ចែករំលែកព័តមាននេះ