រាជធានីភ្នំពេញ ៖ ស្គាល់ជាង២ឆ្នាំអត់ដឹងថាស្រីតែងខ្លួនជាមនុស្សប្រុស លុះដល់ឃើញចាប់ឱបថើបកូនក្រមុំរបស់ខ្លួនក្នុងបន្ទប់ជួល មានការខឹងសម្បា ក៏ចាប់យកទៅឲ្យនគរបាលប៉ុស្តិ៍ចោមចៅសាកសួរ ទើបដឹងថាជាស្រី ។ ហេតុការណ៍នេះបង្កការភ្ញាក់ផ្អើលកាលពីម៉ោង២០ និង៣០នាទីយប់ ថ្ងៃទី២៧ ខែឧសភា ឆ្នាំ២០១៧ នៅចំណុចផ្ទះជួល ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
ជនសង្ស័យមានឈ្មោះ ស៊ុន សុភី ហៅណាង ភេទស្រី តែងខ្លួនជាប្រុស អាយុ២៩ឆ្នាំ មុខរបរជាកម្មការិនីរោងចក្រ ស្នាក់នៅបន្ទប់ជួលលេខ៣៦ ជាន់ទី២ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។ ចំណែកនារីរងគ្រោះមានឈ្មោះ ហេង ស្រីល័ក្ខ អាយុ២២ឆ្នាំ មុខរបរជាកម្មការិនីរោងចក្រ ស្នាក់នៅបន្ទប់ជួល ជាន់ទី៣ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។ ប្រភពពីឪពុកនារីរងគ្រោះឈ្មោះ រិន ចិត្ត អាយុ៥០ឆ្នាំ បានឲ្យដឹងថា គាត់បានស្គាល់ជនសង្ស័យជាង២ឆ្នាំហើយ ដោយស្រឡាញ់ដូចកូនក្មួយចឹង និងបានមកលេងចេញចូលបន្ទប់ជួលគាត់ជាញ៉ឹកញាប់(ជួលបន្ទប់ក្នុងដីឡូតែមួយខុសតែជាន់ប៉ុណ្ណោះ) មកដល់ថ្ងៃកើតហេតុខាងលើ ខណៈដែលគាត់អង្គុយហូបបាយនៅយ៉មុខផ្ទះជាមួយប្រពន្ធស្រាប់តែកូនស្រែកឲ្យជួយ ពេលនោះប្រពន្ធគាត់ចូលទៅស្រាប់តែឃើញជនសង្ស័យចាប់ឱបថើបកូនក្រមុំគាត់ ពេលនោះប្រពន្ធគាត់ចាប់ទាញចេញឲ្យលែងកូនគាត់ ហើយក៏យកមកប្រគល់ឲ្យនគរបាលចោមចៅតែម្តង ។ ក្រោយពេលសាកសួរនៅប៉ុស្តិ៍រដ្ឋបាលចោមចៅទើបដឹងថា ជនសង្ស័យខាងលើជាស្រីតែងខ្លួនធ្វើប្រុស ហើយមកលួចស្រឡាញ់កូនស្រីគាត់មិនដឹងតាំងពីពេលណា ។
តាមការបញ្ជាក់ពីនារីរងគ្រោះ បានប្រាប់ថា តាំងពីដើមមកគាត់មិនដឹងថាជនសង្ស័យជានារីទេ ដោយដឹងពីការពិត និងមានការសម្របស្រួលពីសមត្ថកិច្ចផង ករណីខាងលើនេះ មិនចាប់ទោសអូសដំណើរទេ គ្រាន់តែសមត្ថកិច្ចអប់រំ និងឲ្យជនសង្ស័យធ្វើកិច្ចសន្យាឈប់ប្រព្រឹត្តទង្វើបែបនេះទៀត ។
ចែករំលែកព័តមាននេះ