រាជធានីភ្នំពេញ ៖ យុវជនបីនាក់ត្រូវបានកម្លាំងនគរបាលប៉ុស្តិ៍ភ្នំពេញថ្មីចាប់ឃាត់ខ្លួន ខណៈនាំគ្នាជិះម៉ូតូមកឈប់ និងអង្គុយនៅកន្លែងងងឹតដែលមើលទៅគួរសង្ស័យ ។ ឃាត់ខ្លួនយុវជនខាងលើកាលពីម៉ោង០៣និង០០នាទីទាបភ្លឺ ថ្ងៃទី២៨ ខែឧសភា ឆ្នាំ២០១៧ នៅផ្លូវលំចូលប៉ុស្តិ៍ភ្នំពេញថ្មី ភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ ។
ជនសង្ស័យទី១.ឈ្មោះ ឯម សំណាង អាយុ១៨ឆ្នាំ មុខរបរមិនពិតប្រាកដ ស្នាក់នៅភូមិសាមគ្គី៤ សង្កាត់ត្រពាំងក្រសាំង ខណ្ឌពោធិ៍សែនជ័យ ។ ទី២.ឈ្មោះ ពុធ សៀកឡាយ អាយុ១៧ឆ្នាំមុខរបរមិនពិតប្រាកដ ស្នាក់នៅភូមិសាមគ្គី៤ សង្កាត់ត្រពាំងក្រសាំង ខណ្ឌពោធិ៍សែនជ័យ ។ ទី៣.ឈ្មោះ សុន សារ៉ាត់ អាយុ១៧ឆ្នាំ មុខរបរមិនពិតប្រាកដ ស្នាក់នៅភូមិសាមគ្គី៤ សង្កាត់ត្រពាំងក្រសាំង ខណ្ឌពោធិ៍សែនជ័យ ។ សមត្ថកិច្ចបានប្រាប់ថា មុនឃាត់ក្រុមខាងលើ ខណៈកម្លាំងប៉ុស្តិ៍ភ្នំពេញថ្មី ធ្វើការល្បាតក្នុងមូលដ្ឋានមកដល់ចំណុចខាងលើបានឃើញយុវជនទាំងបីនាក់អង្គុយក្បែម៉ូតូ វីវ៉ា ពណ៌ខ្មៅមួយគ្រឿង នៅកន្លែងងងឹតដោយសង្ស័យក៏ឃាត់សាកសួរ ។ ប្រភពបានបន្តថា ក្រោយពីឃើញសមត្ថកិច្ចយុវជនទាំងបីនាក់ មានការភិតភ័យ និងបានសារភាពថាពួកគេទាំងបីនាក់មករកមិត្តភក្តិនៅក្បែរកន្លែងកើតហេតុប៉ុណ្ណោះ ដោយសង្ស័យសមត្ថកិច្ចបានយកមកធ្វើតេស្តទឹកនោមរកសារធាតុញៀន ឃើញថាយុវជនទាំងបីនាក់មានផ្ទុកនូវសារធាតុញៀនក៏ឃាត់ខ្លួនតែម្តង ។
នៅចំពោះមុខសមត្ថកិច្ច ជនសង្ស័យបានសារភាពថាពួកខ្លួនពិតជាចេះប្រើប្រាស់គ្រឿងញៀន ។ បច្ចុប្បន្នជនសង្ស័យខាងលើត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខ ។
ចែករំលែកព័តមាននេះ