ខេត្តប៉ៃលិន ៖ ជនសង្ស័យដែលជំនាញដើរលួចទ្រព្យសម្បត្តិពេលថ្ងៃនិងយប់ ហើយយកទៅលក់នៅតាមស្តង់អេតចាយនានា លុះចូលទៅលួចអាគុយរបស់អ្នកភូមិម្នាក់ ស្រាប់តែត្រូវម្ចាស់គេតាមទាន់ និងដឹងពីកន្លែងយកទៅលក់ទៀត ក៏ប្តឹងនគរបាលឱ្យចាប់តែម្តង ដែលហេតុការណ៍នេះ កើតឡើងកាលពីព្រឹកថ្ងៃទី២៤ ឧសភា ស្ថិតនៅក្នុងភូមិបហ៊ុយ សង្កាត់បយ៉ាខា ក្រុងប៉ៃលិន ។
ប្រភពឱ្យដឹងថា ជនសង្ស័យខាងលើ ឈ្មោះសឿ សំណាង អាយុ១៧ឆ្នាំ រស់នៅភូមិបហ៊ុយត្បូង សង្កាត់បយ៉ាខា ក្រុងខេត្តប៉ៃលិន ដោយបានចូលទៅលួចអាគុយចំនួន៥គ្រាប់ យកទៅលក់នៅស្តង់អេតចាយមួយកន្លែងចំណុចក្បែរស្ពានមេម៉ាយ ភូមិតាង៉ែនលើ សង្កាត់ប៉ៃលិន ក្រុងប៉ៃលិន ។ រីឯម្ចាស់អាគុយឈ្មោះនៅ កុសល ភេទប្រុស អាយុ៣៦ឆ្នាំ រស់នៅភូមិបរតាំងស៊ូ ត្រូវជនសង្ស័យលួចអាគុយចំនួន៤គ្រាប់ និងឈ្មោះហៀង ធា ជានគរបាលព្រំដែន៨២១ ក៏ត្រូវជនសង្ស័យលួចអស់១គ្រាប់ផងដែរ ។
ប្រភពបន្តថា ជនសង្ស័យគឺជាមនុស្សជំនាញដើរលួចទ្រព្យសម្បត្តិប្រជាពលរដ្ឋនៅក្នុងភូមិ រួចយកទៅលក់ដើម្បីយកប្រាក់ទិញគ្រឿងញៀនប្រើប្រាស់ ។ បច្ចុប្បន្ន នគរបាលជំនាញកំពុងរៀបចំសំណុំរឿង ដើម្បីបញ្ជូនទៅអយ្យការអមសាលាដំបូងខេត្តចាត់តាមច្បាប់ ។
ចែករំលែកព័តមាននេះ