ប្រទេសកូតឌីវ័រពេលនេះកំពុងស្ថិតក្នុងស្ថានការណ៍ឆ្ពោះទៅរកការកើតសង្គ្រាមស៊ីវិលក្រោយពីស្ត្រី៧នាក់ត្រូវបានបាញ់ស្លាប់ក្នុងអំឡុងនៃការធ្វើបាតុកម្ម ។ ជាមួយគ្នានេះ ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃទី៣ មីនា កន្លងមក បានសម្តែងការព្រួយបារម្ភយ៉ាងខ្លាំងចំពោះជម្លោះនៅប្រទេសកូតឌីវ័រដែលកំពុងកើនឡើងឆ្ពោះទៅរកការកើតសង្គ្រាមស៊ីវិល ហើយបានអំពាវនាវដល់កងរក្សាសន្តិភាពឱ្យធ្វើការងារកាន់តែច្រើនថែមទៀតដើម្បីការពារជនស៊ីវិល ។
ប្រមុខកងរក្សាសន្តិភាព អ.ស.ប បានឱ្យដឹងពីរបៀបដែលកងកម្លាំងមានភក្តីភាពចំពោះលោកឡូរ៉ង់ ហ្សេបាបូ ប្រធានាធិបតីកូតឌីវ័រ ដែលផុតអាណត្តិ ប៉ុន្តែនៅតែមិនព្រមចុះចេញពីតំណែង បាញ់ប្រហារដោយប្រើកាំភ្លើងយន្តធុនធ្ងន់លើបាតុករដែលភាគច្រើនជាស្ត្រីនៅក្នុងការធ្វើបាតុកម្មលើកចុងក្រោយ ញ៉ាំងឱ្យសហគមន៍អន្តរជាតិមានការភ្ញាក់ផ្អើលយ៉ាងខ្លាំង ។
បេសកជនជាន់ខ្ពស់អាហ្វ្រិកមួយរូបថ្លែងថា គេគួរតែផ្តល់ពេលច្រើនថែមទៀតដល់សហភាពអាហ្វ្រិក ដើម្បីស្វែងរកដំណោះស្រាយជម្លោះរវាងលោកហ្សេបាបូ និងលោកអាឡាសសាន អ៊ូអាតារ៉ា ដែលឈ្នះឆ្នោតប្រធានាធិបតី ហើយទទួលស្គាល់ដោយសហគមន៍អន្តរជាតិ ។
ក្រសួងការបរទេសសហរដ្ឋអាមេរិក និយាយថា ការបាញ់សម្លាប់ស្ត្រី៧នាក់នោះ បង្ហាញយ៉ាងច្បាស់ពីការគ្មានសីលធម៌របស់លោកហ្សេបាបូ ហើយក្រុមប្រឹក្សាសន្តិសុខ អ.ស.ប បានថ្កោលទោសយ៉ាងខ្លាំងចំពោះការគំរាមបង្កអំពើហិង្សាប្រឆាំងជនស៊ីវិលដោយកងកម្លាំងរបស់លោកហ្សេបាបូ ។
ក្រុមប្រឹក្សាសន្តិសុខ អ.ស.ប បានទទូចដល់បេសកកម្មរបស់ អ.ស.ប នៅប្រទេសកូតឌីវ័រ ឱ្យប្រើប្រាស់មធ្យោបាយចាំបាច់នានាអនុវត្តតាមអាណត្តិរបស់ខ្លួនដើម្បីការពារជនស៊ីវិល ។
បច្ចុប្បន្នស្ថានការណ៍នៅប្រទេសកូតឌីវ័រធ្លាក់ចូលក្នុងស្ថានភាពកាន់តែធ្ងន់ធ្ងរ ៕
ចែករំលែកព័តមាននេះ