រាជធានីភ្នំពេញ៖ អតីតកីឡាករប្រដាល់ក្បាច់គុណខ្មែរបុរាណ ឈ្មោះ ឯម ចាន់រស្មី ដែលឥឡូវគឺជាគ្រូបង្វឹកនៅ《 ក្លឹប ប្រដាល់និរោធន៏មានជ័យ 》ត្រូវបានគូទំនាស់របស់ខ្លួនម្នាក់ ដែលជាកម្មករសំណង់វាយសំពង នឹងដែកថ្នាំងអំពៅ បណ្ដាលឲ្យរងរបួសបែកក្បាល ហូរឈាមកគួរឲ្យញាក់សាច់ និងត្រូវគ្រូពេទ្យដេរអស់ជាង៣០ថ្នេរ នៅក្នុង ជម្លោះពេលផឹកស៊ីនៅក្នុងបន្ទប់ជាប់គ្នា ។ បន្ទាប់មកជនរងគ្រោះខាងលើបានធ្វើដំណើរទៅកាន់ ប៉ុស្ដិ៍នគរបាល ចោមចៅដាក់ពាក្យបណ្ដឹង សុំឲ្យនគរបាលជួយអន្តរាគមន៏រកយុត្តិធម៌ដល់រូបគាត់ផង ចំណែកឯកម្មករសំណង់ដៃដល់ ក្រោយពេលវាយអតីតកីឡាប្រដាល់ខាងលើ បណ្ដាលឲ្យរងរបួសរួចហើយ មិនបានរត់គេចខ្លួនទៅណាឡើយ ប៉ុន្តែនៅមិនទាន់ត្រូវបានចាប់ខ្លួននៅឡើយ ។
ហេតុការណ៏នោះបានបង្កឲ្យមានការភ្ញាក់ផ្អើលឡើង កាលពីវេលាម៉ោង០៥ព្រឹក ថ្ងៃទី២៦ ខែឧសភា ឆ្នាំ២០១៧ ស្ថិតនៅចំណុចផ្ទះជួល ក្បែរសួនឧស្សាហកម្មកាណាឌីយ៉ា ក្នុងភូមិត្រព្រាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។ នគរបាលបានឲ្យដឹងថា លោក ឯម ចាន់រស្មី អាយុ៣៥ឆ្នាំ ជាអតីតកីឡាករប្រដាល់ក្បាច់គុណខ្មែរបុរាណ ហើយឥឡូវបានក្លាយទៅជាគ្រូបង្វឹកនៅ《 ក្លឹបប្រដាល់និរោធន៏មានជ័យ 》បច្ចុប្បន្នស្នាក់នៅបន្ទប់ជួលក្បែរសួនឧស្សាហ៏កម្មកាណាឌីយ៉ា ស្ថិតនៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។ ដោយឡែកជនដៃដល់ឈ្មោះ កំសត់ អាយុប្រហែលជាង៣០ឆ្នាំ មុខរបរជាកម្មករសំណង់ស្នាក់នៅបន្ទប់ក្បែរគ្នា ។ ប្រភពដដែលបានបន្តថា កាលពីវេលាល្ងាច ថ្ងៃទី២៥ ខែឧសភា មុនពេលកើតហេតុលោក ឯម ចាន់រស្មី បានផឹកស៊ីនៅក្នុងបន្ទប់ជួលខាងលើ ចំណែកឯជនដៃដល់បានផឹកស៊ីនៅក្នុងបន្ទប់មួយក្បែរនោះដែរ ហើយខណៈនោះមុនដំបូងមិនទាន់ស្រវឹងមិនអីទេ ភាគីទាំងសងខាងមានសភាពស្ងប់ស្ងាត់ទេ លុះដល់ពេលស្រវឹងស្រាប់តែមាត់ឮខ្លាំងៗរៀងៗខ្លួន ។ បន្ទាប់មកបានទាក់ពាក្យសម្ដីគ្នាមួយប្រាវ នឹងបម្រុងផ្ទុះការវាយតប់គ្នា ប៉ុន្តែពេលនោះត្រូវបានអ្នកជិតខាងជួយឃាត់ទាន់ ពួកគេក៏បានស្ងប់ស្ងាត់ទៅវិញ ហើយរហូតដល់យប់ ទើបចូលដេករៀងៗខ្លួន ប៉ុន្តែគំនុំនៅក្នុចិត្តមិនបានរលត់ឡើយ ។
ប្រភពដដែលបានបន្តទៀតថា លុះដល់វេលាម៉ោង០៥ព្រឹក ថ្ងៃទី២៦ ខែឧសភា ឆ្នាំ២០១៧ ក្រោយពីក្រោកពីដំណេក ពេលជួបមុខគ្នាបានឌឺដងដាក់គ្នាជាលើកទី២ទៀត ហើយបានឈានដល់ការវាយតប់គ្នាកើតឡើង ដោយនៅក្នុងខណៈនោះ អតីតកីឡាប្រដាល់រងគ្រោះទាញបានកាំបិត១ ចំណែកឯជនដៃដល់ដែលជាកម្មករ សំណង់ទាញបានដែកថ្នាំងអំពៅ២កំណាត់កាន់នៅក្នុងដៃទាំងសង្ខាងតែម្ដង ។ ពេលនោះពួកគេបានប្រយុទ្ធគ្នាយ៉ាងស្វិតស្វាញ ហើយបុរសជាកម្មករសំណងខាងលើ បានវាយសំពងក្បាលអតីតកីឡាករប្រដាល់រូបនោះ រងរបួសបែកក្បាលហូរឈាម នឹងត្រូវបានគ្រូពេទ្យដេរជាង៣០ថ្នេរ ។ បន្ទាប់មកអ្នកជិតខាងបាន ជួយឃាត់ទើបមានការស្ងប់ស្ងាត់ ហើយជនរងគ្រោះបានទៅដាក់ពាក្យប្ដឹង នៅប៉ុស្ដិ៍នគរបាលចោមចៅ ដើម្បីឲ្យនគរបាលជួយអន្តរាគមន៏ និងរកយុត្តិធម៌សម្រាប់ខ្លួន ចំណែកឯកម្មករសំណង់ដៃដល់ មិនបានរត់គេចខ្លួនទៅណាឡើយ ប៉ុន្តែក៏មិនទាន់ត្រូវបានសមត្ថកិច្ចឃាត់ខ្លួននៅឡើយ ៕
ចែករំលែកព័តមាននេះ