រាជធានីភ្នំពេញ ៖ ថ្នាក់ដឹកនាំគ្រឹះស្ថានមីក្រូហិរញ្ញវត្ថុនានាបានលើកឡើងថា ការយកអត្តសញ្ញាណប័ណ្ណ និងសៀវភៅគ្រួសារធ្វើជាវត្ថុបញ្ចាំ នៅតែកើតមានសម្រាប់គ្រឹះស្ថានមីក្រូហិរញ្ញវត្ថុតូចៗ ប៉ុន្តែវាមិនប៉ះពាល់ដល់
រាជធានីភ្នំពេញ ៖ ថ្នាក់ដឹកនាំគ្រឹះស្ថានមីក្រូហិរញ្ញវត្ថុនានាបានលើកឡើងថា ការយកអត្តសញ្ញាណប័ណ្ណ និងសៀវភៅគ្រួសារធ្វើជាវត្ថុបញ្ចាំ នៅតែកើតមានសម្រាប់គ្រឹះស្ថានមីក្រូហិរញ្ញវត្ថុតូចៗ ប៉ុន្តែវាមិនប៉ះពាល់ដល់គុណភាពឥណទានទេ ។ ទោះបីយ៉ាងណា វាប៉ះពាល់ដល់ជីវភាពប្រចាំថ្ងៃរបស់ពលរដ្ឋ ។
លោក ជា ផល្លារិន អគ្គនាយកគ្រឹះស្ថានមីក្រូហិរញ្ញវត្ថុអម្រិត បានថ្លែងតាមទូរស័ព្ទនាល្ងាចថ្ងៃទី២៥ ឧសភា ថា ពិតជាមានគ្រឹះស្ថានមីក្រូហិរញ្ញវត្ថុមួយចំនួនអនុវត្តបែបនេះ ដែលធ្វើឲ្យប៉ះពាល់ដល់ការប្រើប្រាស់ប្រចាំថ្ងៃរបស់គាត់ ព្រោះពេលពួកគាត់គ្មានអត្តសញ្ញាណប័ណ្ណ ឬសៀវភៅគ្រួសារ ពួកគាត់អាចប្រឈមនឹងការលំបាកអនុវត្តប្រចាំថ្ងៃ ដូចជា ការបោះឆ្នោត ឬការចុះឈ្មោះបោះឆ្នោតជាដើម ។
លោកបន្តថា ៖ « ការយកអត្តសញ្ញាណប័ណ្ណ និងសៀវភៅគ្រួសារធ្វើជាវត្ថុបញ្ចាំដើម្បីទទួលបានឥណទាន មិនប៉ះពាល់ដល់គុណភាពឥណទាននោះទេ ប៉ុន្តែវានឹងប៉ះពាល់ដល់ជីវភាពប្រចាំថ្ងៃ ដែលត្រូវការឯកសារទាំងនោះនៅពេលមានធុរអ្វីមួយ » ។
កាលពីដើមសប្តាហ៍នេះ ធនាគារជាតិនៃកម្ពុជា បានចេញលិខិតជម្រាបដល់គ្រឹះស្ថានមីក្រូហិរញ្ញវត្ថុដែលបានអនុវត្តបែបនេះឲ្យបញ្ចប់ផងដែរ និងព្រមានដកអាជ្ញាប័ណ្ណមីក្រូហិរញ្ញវត្ថុ ឬប្រតិបត្តិករឥណទានជនបទណា ដែលនៅតែបន្តយកអត្តសញ្ញាណប័ណ្ណ ឬសៀវភៅគ្រួសារ និងសៀវភៅស្នាក់នៅរបស់ប្រជាពលរដ្ឋ ធ្វើជាវត្ថុបញ្ចាំ ។
លោក សាយ សូនី នាយកប្រតិបត្តិទីផ្សារនៃគ្រឹះស្ថានមីក្រូហិរញ្ញវត្ថុប្រាសាក់ បាននិយាយដែរថា ការប្រកាសរបស់ធនាគារជាតិនៃកម្ពុជា គឺជារឿងត្រឹមត្រូវ ព្រោះកន្លងមក មានអង្គការក្រៅរដ្ឋាភិបាល និងប្រតិបត្តិករឥណទានជនបទមួយចំនួនបានអនុវត្តបែបនេះ ប៉ុន្តែកន្លងមក ធនាគារជាតិនៃកម្ពុជាក៏បានតាមដានការងារនេះ ហើយការអនុវត្តបែបនេះក៏បានបញ្ចប់ផងដែរ ។
លោកបន្តថា ៖ « នៅពេលគ្រឹះស្ថានមីក្រូហិរញ្ញវត្ថុណាអនុវត្តបែបនេះ ប្រជាជនពួកគេមិនអាចបំពេញកាតព្វកិច្ចចូលរួមបោះឆ្នោតនាពេលខាងមុខ ឬត្រូវធ្វើការងារចាំបាច់ដទៃទៀត » ។
ប្រធានសមាគមមីក្រូហិរញ្ញវត្ថុកម្ពុជា លោកឧកញ៉ា ហួត អេងតុង ថ្លែងថា សម្រាប់ហត្ថាកសិករ មិនបានអនុវត្តបែបនេះទេ ប៉ុន្តែមានការអនុវត្តបែបនេះរបស់គ្រឹះស្ថានតូចៗមួយចំនួន តាមរយៈការយកប័ណ្ណគ្រួសារ ឬអត្តសញ្ញាណប័ណ្ណមកពិនិត្យ និងកូពី ដើម្បីដឹងពីកន្លែងរស់នៅពិតប្រាកដរបស់អតិថិជនដែលត្រូវទទួលឥណទាន ។ លោកបន្តថា លោកគ្មានសិទ្ធិត្រួតពិនិត្យគ្រឹះស្ថានណា ដែលបានអនុវត្តបែបនេះ ឬមិនអនុវត្តឡើយ ។
លោកបន្តថា ៖ « ខ្ញុំសូមអំពាវនាវឲ្យគ្រឹះស្ថានដែលរៀបរយ និងមិនរៀបរយ សូមបញ្ឈប់ការយកអត្តសញ្ញាណប័ណ្ណ ប័ណ្ណស្នាក់នៅ និងសៀវភៅគ្រួសាររបស់ប្រជាពលរដ្ឋ ។ ការអនុវត្តបែបនេះ នឹងប៉ះពាល់ដល់ការរស់នៅប្រចាំថ្ងៃរបស់ប្រជាពលរដ្ឋ » ។
គួររំលឹកថា កាលពីថ្ងៃទី២២ ឧសភា ធនាគារជាតិនៃកម្ពុជា បានក្រើនរំលឹកដល់ម្ចាស់គ្រឹះស្ថានធនាគារ និងហិរញ្ញវត្ថុ និងប្រតិបតិ្តករឥណទានជនបទ ចំពោះការហាមឃាត់ទទួលយកអត្តសញ្ញាណប័ណ្ណ ឬសៀវភៅគ្រួសារ ឬសៀវភៅស្នាក់នៅ សម្រាប់ការធានាលើការផ្ដល់ឥណទាន ។
ការក្រើនរំលឹកនេះ ដោយហេតុថា ធនាគារជាតិនៃកម្ពុជាបានសង្កេតឃើញគ្រឹះស្ថានធនាគារ និងហិរញ្ញវត្ថុ និងប្រតិបត្តិករឥណទានជនបទមួយចំនួននៅតែបន្ដយកអត្តសញ្ញាណប័ណ្ណ, សៀវភៅស្នាក់នៅ ឬសៀវភៅគ្រួសារ សម្រាប់តម្កល់ជាឯកសារដើម្បីទទួលបានឥណទាន បើទោះបីជាកន្លងមក ធនាគារជាតិនៃកម្ពុជាបានធ្វើសេចក្ដីជូនដំណឹងហើយក៏ដោយ ។
ការក្រើនរំលឹកនាពេលនេះ ប្រសិនបើគ្រឹះស្ថានធនាគារ និងហិរញ្ញវត្ថុ និងប្រតិបត្តិករឥណទានជនបទណានៅតែបន្ដសកម្មភាព និងមិនយកចិត្តទុកដាក់អនុវត្តតាមសេចក្ដីជូនដំណឹងនេះ គ្រឹះស្ថានធនាគារ និងហិរញ្ញវត្ថុ និងប្រតិបត្តិករឥណទានជនបទទាំងនោះ នឹងត្រូវទទួលទណ្ឌកម្មខាងវិន័យ និងឈានទៅការដកហូតអាជ្ញាប័ណ្ណ ឬលិខិតអនុញ្ញាតចុះបញ្ជី ហើយបញ្ឈប់សកម្មភាពអាជីវកម្មតែម្ដង ៕
ចែករំលែកព័តមាននេះ