រាជធានីភ្នំពេញ ៖ នៅថ្ងៃទី៩ មីនា ខាងមុខ នៅសណ្ឋាគារសូហ្វីតែលភ្នំពេញ ផូកីត្រា នឹងប្រារព្ធពិធីបើកសន្និសីទមហាអនុតំបន់ទន្លេមេគង្គ (GMS) សម្រាប់ការអភិវឌ្ឍច្រករបៀងសេដ្ឋកិច្ចភាគខាងត្បូង (SEC) ក្រោមអធិបតីភាពលោកចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម និងរដ្ឋមន្ត្រី GMS ប្រចាំប្រទេសកម្ពុជា ។ សន្និសីទនេះរៀបចំឡើងក្នុងរយៈពេលពីរថ្ងៃ ។ លោក Thomas Crouch អគ្គនាយករងនៃនាយកដ្ឋានអាស៊ីអាគ្នេយ៍ របស់ធនាគារអភិវឌ្ឍន៍អាស៊ី (ADB) និងលោកស្រី Megan Anderson ប្រធានទីភ្នាក់ងារអូស្ត្រាលីដើម្បីការអភិវឌ្ឍអន្តរជាតិ (AusAID) ប្រចាំកម្ពុជា នឹងផ្តល់ទស្សនវិស័យរបស់ដៃគូអភិវឌ្ឍសំខាន់ៗទាំងពីរ (ADB និង AusAID) ដែលសកម្មក្នុងការអភិវឌ្ឍមហាអនុតំបន់ទន្លេមេគង្គ ។ លោក Oudet Souvannavong អគ្គលេខាធិការនៃវេទិកាពាណិជ្ជកម្ម GMS នឹងបង្ហាញពីទស្សនៈរបស់វិស័យឯកជនទៅលើច្រករបៀងសេដ្ឋកិច្ចភាគខាងត្បូងផងដែរ ។
សន្និសីទដែលរៀបចំដោយ ADB និងឧបត្ថម្ភថវិកាដោយ AusAID នេះ មានបំណងកំណត់ និងផ្សព្វផ្សាយផែនការវិនិយោគសាធារណៈដែលកំពុងអនុវត្តដោយរដ្ឋាភិបាលថ្នាក់ជាតិ និងអាជ្ញាធរក្នុងតំបន់ ចែករំលែកព័ត៌មានអំពីឱកាសវិនិយោគ និងសហប្រតិបត្តិការបង្ហាញពីទស្សនៈរបស់វិស័យឯកជនទៅលើឱកាស និងបញ្ហានៅក្នុងការអភិវឌ្ឍច្រករបៀងសេដ្ឋកិច្ចភាគខាងត្បូង ផ្តល់ព័ត៌មានពីគោលនយោបាយបរិស្ថាន ដែលប៉ះពាល់ដល់ការធ្វើពាណិជ្ជកម្ម ការវិនិយោគនៅតាមច្រករបៀង និងពិនិត្យមើលឡើងវិញ នូវកិច្ចសម្របសម្រួលពាណិជ្ជកម្ម ពាណិជ្ជកម្មទ្វេភាគី និងបញ្ហាដឹកជញ្ជូនដែលប៉ះពាល់ដល់ការអភិវឌ្ឍច្រករបៀងសេដ្ឋកិច្ចភាគខាងត្បូង ។
សន្និសីទនេះ មានការចូលរួមពីតំណាងអាជ្ញាធរខេត្ត និងមូលដ្ឋាន អ្នកបង្កើតគោលនយោបាយថ្នាក់ជាតិ មកពីក្រសួងពាក់ព័ន្ធដូចជា ក្រសួងសាធារណការ និងដឹកជញ្ជូន ពាណិជ្ជកម្ម ផែនការ និងក្រសួងការបរទេស និងមានតំណាងវិស័យឯកជនដែលមកពីសមាគមពាណិជ្ជកម្ម និងសភាពាណិជ្ជកម្ម នៃបណ្តាខេត្តចំនួន៤៣ ដែលមានព្រំដែនជាប់នឹងរបៀងសេដ្ឋកិច្ចភាគខាងត្បូង ។ តំណាងដៃគូអភិវឌ្ឍន៍ក៏ត្រូវបានអញ្ជើញឱ្យចូលរួមផងដែរ ។ អភិបាលខេត្តមួយចំនួនមកពីខេត្តនៅជាប់ព្រំដែននៃច្រករបៀងនេះ នឹងធ្វើបទបង្ហាញអំពីការផ្តួចផ្តើមរបស់អាជ្ញាធរមូលដ្ឋានក្នុងការផ្សព្វផ្សាយ និងសម្របសម្រួលការអភិវឌ្ឍច្រករបៀងសេដ្ឋកិច្ចភាគខាងត្បូង ផលលំបាកដែលប្រឈមក្នុងការពង្រីក វិនិយោគ និងពាណិជ្ជកម្ម និងលក្ខខណ្ឌនានាដើម្បីជម្រុញផ្សព្វផ្សាយ និងសម្របសម្រួលការអភិវឌ្ឍរវាងអាជ្ញាធរក្នុងតំបន់ និងតំណាងវិស័យពាណិជ្ជកម្ម ៕
ចែករំលែកព័តមាននេះ